ଭୁବନେଶ୍ୱର,୧୯/୦୧: ଦୀର୍ଘ ଆଠ ବର୍ଷ ପରେ ବନ୍ଦ ହେବାକୁ ଯାଉଛି ଭୁବନେଶ୍ୱର ସ୍ମାର୍ଟ ସିଟି ଲିମିଟେଡ୍(ବିଏସ୍ସିଏଲ୍) । ମାର୍ଚ୍ଚ ୩୧ ତାରିଖ ଏହାର ଶେଷ କାର୍ଯ୍ୟ ଦିବସ ହୋଇପାରେ । ବିଏସ୍ସିଏଲକୁ ବିଏମ୍ସି ସହିତ ମିଶାଇବାକୁ ସରକାରୀ ସ୍ତରରେ ଯୋଜନା ଚାଲିଛି । ବିଏମ୍ସିରେ ଏକ ସ୍ୱତନ୍ତ୍ର ସେଲ୍ ଖୋଲି ବିଏସ୍ସିଏଲ୍ ଅଧୀନରେ ଥିବା ପ୍ରକଳ୍ପ ପରିଚାଳନା କରିବାକୁ ବିଚାର ବିମର୍ଶ ଚାଲିଛି । ଦୁଇ ଜଣ ଡେପୁଟି କମିଶନର ଏହା ଦାୟିତ୍ୱରେ ରହିପାରନ୍ତି ।
ଆସନ୍ତା ମାର୍ଚ୍ଚ ୩୧ ତାରିଖ ଯାଏ ଦେଶରେ ସ୍ମାର୍ଟ ସିଟି ମିଶନର ଅବଧି ବଢ଼ାଯାଇଛି । ୨୦୨୦ରେ ମିଶନ ସାରିବାକୁ ଲକ୍ଷ୍ୟ ଥିଲା । ଆସନ୍ତା ମାର୍ଚ୍ଚ ପରେ ଏହାର ଅବଧି ଆଉ ବଢ଼ିବନି । ମିଶନ ବନ୍ଦ ହେବ ବୋଲି ନିଷ୍ପତ୍ତି ଏକପ୍ରକାର ଚୂଡ଼ାନ୍ତ ହୋଇଛି । ବିଏସସିଏଲ୍ ଅଧୀନରେ ଥିବା ସମସ୍ତ ପ୍ରକଳ୍ପ କାମ ପ୍ରାୟତଃ ସରିଯାଇଛି । କେବଳ ଲେକ୍ ନିଉଟ୍ରାଲ ପ୍ରକଳ୍ପକୁ ଛାଡ଼ି ବାକି ସବୁ ପ୍ରକଳ୍ପକୁ ସଫଳତାର ସହ ସାରିଛୁ ବୋଲି ବିଏସ୍ସିଏଲ୍ ଦାବି କରୁଛି । କିନ୍ତୁ ସ୍ମାର୍ଟ ସିଟି ମିଶନରେ ରାଜଧାନୀକୁ ସ୍ମାର୍ଟ କରିବାକୁ ଯେଉଁ ସୁନେଲି ସ୍ୱପ୍ନ ଦେଖାଇଥିଲେ ତାହା ପ୍ରହେଳିକା ପାଲଟିଛି । କୋଟି କୋଟି ଟଙ୍କାରେ ପ୍ରକଳ୍ପ ତିଆରି ହୋଇଛି ସତ, ହେଲେ ସ୍ମାର୍ଟ ଠାରୁ ବହୁ ପଛରେ ରହିଯାଇଛି । ଜନପଥ(ଶିଶୁଭବନରୁ ବାଣୀବିହାର ଛକ) ଟ୍ରାନଜିଟ୍ ଓରିଏଣ୍ଟେଡ୍ ଡେଭଲପମେଣ୍ଟ(ଟିଓଡି)ର ପ୍ରୟୋଗଶାଳା ହେବ । ଜନପଥକୁ ବିଶ୍ୱସ୍ତରୀୟ ରୂପ ଦିଆଯିବ । ଏହା ସିଙ୍ଗାପୁର ସହର ରାସ୍ତାର ଭ୍ରମ ସୃଷ୍ଟି କରିବ । ହାତପାଆନ୍ତାରେ ସର୍ବସାଧାରଣ ପରିବହନ ସେବା ମିଳିବ । କାର୍ ଉପରେ ନିର୍ଭରଶୀଳତା କମିବ । ଏଭଳି ଉଦ୍ଦେଶ୍ୟ ରଖି ସ୍ମାର୍ଟ ଜନପଥର ପରିକଳ୍ପନା ହୋଇଥିଲା । କିନ୍ତୁ ଏ ସବୁ କିଛି ହେଲାନି । କେବଳ କିଛି ସୌନ୍ଦର୍ଯ୍ୟକରଣ ଓ ପେଭର ବ୍ଲକ୍ କାମରେ ସ୍ମାର୍ଟ ଜନପଥ ପ୍ରକଳ୍ପ ସୀମିତ ରହିଲା ।
ଇଣ୍ଟିଗ୍ରେଟେଡ୍ ଟ୍ରାଫିକ୍ ସର୍ଭେଲାନ୍ସ ଓ କଣ୍ଟ୍ରୋଲ ସିଷ୍ଟମ୍ ପ୍ରକଳ୍ପରେ ସହରର ୫୦ଟି ଜାଗାରେ ସ୍ମାର୍ଟ ଟ୍ରାଫିକ୍ ସିଗନାଲ୍ ଲାଗିଲା । ପେଲିକାନ ସିଗନାଲ୍, ବ୍ଲିଙ୍କର୍ସ, ରେଡଲାଇଟ୍ ଭାୟୋଲେସନ୍ ସିଷ୍ଟମ୍ ସହିତ ସିସି କ୍ୟାମେରା ଛାଇ ଯାଇଥିଲା । ଆଡାପ୍ଟିଭ୍ ଟ୍ରାଫିକ୍ କଣ୍ଟ୍ରୋଲ ସିଷ୍ଟମ(ଏଟିଏସ୍ସି) ଟେକ୍ନୋଲୋଜିରେ ସ୍ୱୟଂଚାଳିତ ଟ୍ରାଫିକ୍ ପରିଚାଳନା ହେବ। ଏଟିଏସ୍ସି ଟ୍ରାଫିକ୍ ଭିଡ଼ ରିଅଲ ଟାଇମ୍ ତଥ୍ୟକୁ ନେଇ ଆପେ ରେଡ୍ ଓ ଗ୍ରୀନ୍ ସିଗନାଲ ଦେଖାଇବ । ସେଣ୍ଟ୍ରୋଲ କମାଣ୍ଡ ସେଣ୍ଟର ବା କଣ୍ଟ୍ରୋଲ ରୁମ୍ରୁ ସହରର ଟ୍ରାଫିକ୍ ବ୍ୟବସ୍ଥାକୁ ନିୟନ୍ତ୍ରଣ କରାଯିବ । କେଉଁଠି ଟ୍ରାଫିକ୍ ଭିଡ଼ ଜମିଲେ କଣ୍ଟ୍ରୋଲ ରୁମ୍ ଜରିଆରେ ଭିଡ଼ କମାଇବାକୁ ତତ୍କାଳ ପଦକ୍ଷେପ ନିଆଯିବ ବୋଲି ଯୋଜନା ଥିଲା। କିନ୍ତୁ ଏବେ ଇଣ୍ଟିଗ୍ରେଟେଡ୍ ଟ୍ରାଫିକ୍ ସର୍ଭେଲାନ୍ସ ପ୍ରହସନ ପାଲଟିଛି । ଅନେକ ଛକରେ ସ୍ମାର୍ଟ ଟ୍ରାଫିକ୍ ସିଗନାଲ କାମ କରୁନି । ଟ୍ରାଫିକ୍ ଭିଡ଼ ରୋକିବାରେ କଣ୍ଟ୍ରୋଲ ରୁମ୍ର କିଛି ଭୂମିକା ରହୁନି ।
ବିଏସ୍ସିଏଲ୍ ଗଠନ ଠାରୁ ଏବେଯାଏ ମୋଟ ୧୦୦୦ କୋଟି ଟଙ୍କାର ଅନୁଦାନ ମିଳିଛି । ସ୍ମାର୍ଟ ସିଟି ମିଶନରେ ଏହି ଅର୍ଥ ମିଳିଛି । ଏଥିରୁ କେନ୍ଦ୍ର ସରକାର ୫୦୦ କୋଟି ଟଙ୍କା ଦେଇଥିବାବେଳେ ରାଜ୍ୟ ସରକାର ବଳକା ୫୦୦ କୋଟି ଟଙ୍କା ଦେଇଛନ୍ତି । ବିଏସ୍ସିଏଲ୍ ଆଜିସୁଦ୍ଧା ୯୯୦ କୋଟି ଟଙ୍କାର ପ୍ରକଳ୍ପ ବିନିଯୋଗ ପ୍ରମାଣପତ୍ର(ୟୁସି) ଦାଖଲ କରିସାରିଛି । ଏବେ କେବଳ ୧୦ କୋଟି ଟଙ୍କା ବଜେଟ୍ର ଲେକ୍ ନିଉଟ୍ରାଲ ପ୍ରକଳ୍ପ କାମ ଚାଲିଛି । ନିକୋ ପାର୍କରୁ ବାହାରି ସତ୍ୟନଗର ଯାଏ ଆସିଥିବା ଜଳାଶୟର ପୁନରୁଦ୍ଧାର ଓ ଏହାର ପାରିପାର୍ଶ୍ୱିକ ଅଞ୍ଚଳର ବିକାଶ ଯୋଜନା ଅଛି । ବେଆଇନ ନିର୍ମାଣର ଜବରଦଖଲ ଉଚ୍ଛେଦ ହେଉନଥିବାରୁ କାମ ଆଗେଇ ପାରୁନି।
