ବାଲିଅନ୍ତା,୧୪/୦୩: ହୋଲି ପୂର୍ବରୁ ବାଲିଅନ୍ତା ଥାନା ଅଧୀନ ଅଣ୍ଡିଲୋ ଗାଁ ଦାଣ୍ଡ ରକ୍ତର ହୋଲି ଖେଳିଛି । ସାଇକେଲ ଚୋରି ସନ୍ଦେହରେ ଜଣେ ବ୍ୟକ୍ତି ଖଣ୍ଡାରେ ଗୋଡ଼ାଇ ଗୋଡ଼ାଇ ଜଣେ ଯୁବକଙ୍କୁ ହାଣିଛନ୍ତି । ଘଟଣାସ୍ଥଳରେ ଯୁବକଙ୍କ ପ୍ରାଣବାୟୁ ଉଡି ଯାଇଛି । ମୃତ ଯୁବକ ଜଣକ ହେଲେ ବାଲିଅନ୍ତା ପଞ୍ଚାୟତ ଅଣ୍ଡିଲୋ ୫ ନମ୍ବର ୱାର୍ଡର ସୌମ୍ୟରଞ୍ଜନ ଭୋଇ(୩୨) ଓରଫ ମିଲୁ । ତାଙ୍କୁ ରକ୍ଷା କରିବାକୁ ଯାଇ ମା' ମୀନା ଭୋଇ ଗୁରୁତର ଆହତ ହୋଇଛି । ମୀନାଙ୍କ ଅଣ୍ଟା ଓ ହାତରେ ଖଣ୍ଡା ଚୋଟ ବାଜିଛି । ଏତିକିରେ ଆକ୍ରମଣକାରୀର ଆତଙ୍କ ଥମିନଥିଲା । ତା’ ଖଣ୍ଡା ଚୋଟରେ ସୌମ୍ୟରଞ୍ଜନଙ୍କ ସାଙ୍ଗ ଶେଖ୍ ଅଜିତ ମଧ୍ୟ ଗୁରୁତର ଆହତ ହୋଇଛନ୍ତି । ବାଲିଅନ୍ତା ଥାନା ପୁଲିସ ଏହି ଘଟଣାରେ ତରୁଣ ଭୋଇ ଓରଫ ଟିମ (୪୮) ନାମକ ଯୁବକକୁ ଗିରଫ କରିଛି ।
ପୁଲିସ ସୂଚନା ମୁତାବକ, ଗାଁରୁ ଗତକାଲି ତରୁଣର ସାଇକେଲ ଚୋରି ଯାଇଥିଲା । ସାଇକେଲଟିକୁ ସୌମ୍ୟରଞ୍ଜନ ଓ ତାଙ୍କର ସାଙ୍ଗ ଶେଖ ଅଜିତ ଚୋରି କରି ନେଇଥିବା ତରୁଣ ସନ୍ଦେହ କରିଥିଲା । ବୁଧବାର ଉଭୟଙ୍କୁ ପଚରାଉଚରା କରିଥିଲା । କିନ୍ତୁ ସେମାନଙ୍କ ଉତ୍ତର ସନ୍ତୋଷଜନକ ନଥିବାରୁ ତରୁଣର ସନ୍ଦେହ ଆହୁରି ବଢ଼ିଥିଲା । ଗତକାଲିଠୁ ସେ ଉଭୟ ସୌମ୍ୟରଞ୍ଜନ ଓ ଅଜିତକୁ ପାନେ ଦେବାକୁ ସୁଯୋଗ ଖୋଜୁଥିଲା । ଗୁରୁବାର ସଂଧ୍ୟା ସାଢ଼େ ୭ଟା ବେଳେ ସୌମ୍ୟରଞ୍ଜନ ଓ ଶେଖ ଅଜିତ କାମ ସାରି ବାଇକରେ ଗାଁକୁ ଫେରୁଥିଲେ । ପୂର୍ବରୁ ଗାଁ ଦାଣ୍ଡରେ ଖଣ୍ଡା ଧରି ଛକି ବସିଥିବା ତରୁଣ ଉଭୟଙ୍କୁ ଅଟକାଇ ସାଇକେଲ ବିଷୟରେ ପଚାରିଥିଲା । ଯାହାକୁ ନେଇ ଉଭୟଙ୍କ ଭିତରେ ଯୁକ୍ତିତର୍କ ହୋଇଥିଲା । ତରୁଣ ଖଣ୍ଡା ଧରି ଗୋଡ଼ାଇବାରୁ ଉଭୟେ ଖସି ପଳାଇବାକୁ ଚେଷ୍ଟା କରିଥିଲେ । ବାଇକ ପଛରେ ବସିଥିବା ସୌମ୍ୟରଞ୍ଜନଙ୍କ ବେକକୁ ତରୁଣ ଚୋଟ ପରେ ଚୋଟ ମାରି ଚାଲିଥିଲା । ସୌମ୍ୟରଞ୍ଜନଙ୍କୁ ବଞ୍ଚାଇବାକୁ ଯାଇ ସେଠାକୁ ଦୌଡ଼ି ଆସିଥିବା ତାଙ୍କର ମା’ ମୀନା ଆକ୍ରମଣର ଶିକାର ହୋଇଥିଲେ । ଶେଖ ଅଜିତ ମଧ୍ୟ ତରୁଣ ଆକ୍ରମଣରୁ ବର୍ତ୍ତି ପାରିନଥିଲେ । ଖଣ୍ଡା ଚୋଟ ଦେହରେ ବାଜିଥିଲେ ମଧ୍ୟ ବାଇକ ଛାଡ଼ି ଦୌଡ଼ି ପଳାଇବାରୁ ରକ୍ଷା ପାଇଯାଇଥିଲେ । ଅଜିତ କ୍ଷତାକ୍ତ ହୋଇଥିଲେ ହେଁ ଅଳ୍ପକେ ରକ୍ଷା ପାଇଯାଇଛନ୍ତି । ଏନେଇ ଘଟଣାସ୍ଥଳରେ ଭୀଷଣ ଉତ୍ତେଜନା ଦେଖାଦେଇଥିଲା । ସ୍ଥାନୀୟ ଲୋକେ ତରୁଣକୁ କାବୁ କରି ବାଲିଅନ୍ତା ଥାନା ପୁଲିସକୁ ଜଣାଇଥିଲେ ।
ଖବର ପାଇ ବାଲିଅନ୍ତା ଥାନା ପୁଲିସ ସୌମ୍ୟରଞ୍ଜନଙ୍କ ମୃତଦେହ ଜବତ କରିଥିଲା । ଆହତ ମୀନା ଓ ଅଜିତକୁ କ୍ୟାପିଟାଲ ହସ୍ପିଟାଲ ପଠାଇଥିଲା । ପୁଲିସ ଘଟଣାସ୍ଥଳରୁ ତରୁଣକୁ ଗିରଫ କରିବା ସହିତ ତା ନିକଟରୁ ଆକ୍ରମଣରେ ବ୍ୟବହୃତ ଖଣ୍ଡାକୁ ମଧ୍ୟ ଜବତ କରିଛି । ଚୋରି ସନ୍ଦେହରେ ତରୁଣ ଏଭଳି ବର୍ବରକାଣ୍ଡ ଘଟାଇଥିବା ସନ୍ଦେହ କରାଯାଉଥିଲେ ହେଁ ଆଉ ଏକ ଦିଗ ସାମ୍ନାକୁ ଆସିଛି । ଦେଢ଼ ବର୍ଷ ତଳେ ତରୁଣର ସ୍ତ୍ରୀ ଜଣେ ଯୁବକ ସହ ଖସି ପଳାଇଥିଲା । ସମ୍ପୃକ୍ତ ଯୁବକ ହେଉଛନ୍ତି ସୌମ୍ୟରଞ୍ଜନଙ୍କ ସହକର୍ମୀ । ସେବେଠୁ ତରୁଣ ମାନସିକସ୍ତରରେ ଭାଙ୍ଗି ପଡି଼ଥିଲା । ପୂର୍ବରୁ ଏହି ଘଟଣାକୁ ନେଇ ସୌମ୍ୟରଞ୍ଜନଙ୍କ ସହ ବଚସା ହୋଇଥିବା ଗ୍ରାମବାସୀ କହିଛନ୍ତି ।
ସୂର୍ଯ୍ୟନଗରରେ ଯୁବକଙ୍କୁ ମରଣାନ୍ତକ ଆକ୍ରମଣ, ଗୋଡ଼ାଇ ଗୋଡ଼ାଇ ଖଣ୍ଡାରେ ହାଣିଲେ ଦୁର୍ବୃତ୍ତ
