ଭୁବନେଶ୍ୱର ୧୭/୦୭: ବିଜ୍ଞାପନ ହୋର୍ଡିଂ କ୍ଷେତ୍ରରେ ବଡ଼ ଦୁର୍ନୀତି ହୋଇଛି । କୋଟି କୋଟି ଟଙ୍କାର ରାଜସ୍ୱ ହେରଫେର ହେଉଛି । ସ୍ମାର୍ଟ ଜନପଥରେ ଅନୁମତି ମିଳିଥିବା ଜାଗାରୁ ଅଧିକ ବର୍ଗଫୁଟରେ ବିଜ୍ଞାପନ ମରାଯାଉଛି । ଏହି ଅର୍ଥ କାହା ପକେଟ୍କୁ ଯାଉଛି ସେ ସଂକ୍ରାନ୍ତରେ ବିଏମ୍ସି ଯାଞ୍ଚ କରୁନଥିବା ଅଭିଯୋଗ ହେଉଛି ।
ବାଣୀବିହାରରୁ ଶିଶୁଭବନ ସ୍ମାର୍ଟ ଜନପଥରେ ଭୁବନେଶ୍ୱର ସ୍ମାର୍ଟସିଟି ଲିମିଟେଡ୍(ବିଏସ୍ସିଏଲ) ପକ୍ଷରୁ ବିକାଶ କାର୍ଯ୍ୟ କରାଯାଇଥିଲା । ୩.୯ କିମି ଦୈଘ୍ୟ ବିଶିଷ୍ଟ ଏହି ରାସ୍ତାକୁ ପ୍ରଥମେ ନୋ ହୋର୍ଡିଂ ଜୋନ୍ କରିବାକୁ ଘୋଷଣା କରାଯାଇଥିଲା । ପରବର୍ତ୍ତୀ ସମୟରେ ଏଠାରେ ହୋର୍ଡିଂ ମାରିବାକୁ ନିଷ୍ପତ୍ତି ହୋଇଥିଲା ।
ଏଥିଲାଗି ବିଏସ୍ସିଏଲ୍ ପକ୍ଷରୁ ଟେଣ୍ଡର ଆହ୍ୱାନ କରାଯାଇଥିଲା । ଏକ ଘରୋଇ କମ୍ପାନି ଏହାର ଟେଣ୍ଡର ନେଇଥିଲା । କିଛି ବର୍ଷ ବିଏସ୍ସିଏଲ୍ ଅର୍ଥ ଆଦାୟ କରିବା ପରେ ବିଏମ୍ସି ଏଥିରେ ପଶିଥିଲା । ବିଜ୍ଞାପନ ଅର୍ଥ ଆଦାୟରେ କେବଳ ବିଏମ୍ସିର ଅଧିକାର ଥିବାରୁ ଏହା ତାଙ୍କୁ ହସ୍ତାନ୍ତର କରିବାକୁ ଦାବି ଉଠିଥିଲା । ମେୟର ଓ କର୍ପୋରେଟର ଏହାକୁ ନିଜ ଅଧୀନକୁ ଆଣିବାକୁ ଅଡ଼ି ବସିଥିଲେ । ଏହା ପରେ ବିଏମ୍ସି ହାତକୁ କ୍ଷମତା ଆସିଥିଲା ।
ବିଏମ୍ସି ଜନପଥରୁ ରାଜସ୍ୱ ଆଦାୟ କଲା ବେଳେ ନୂଆ କେଳେଙ୍କାରୀ ପଦାକୁ ଆସିଛି । ବିଜ୍ଞାପନ ପାଇଁ ଟେଣ୍ଡରରେ କିଛି ସର୍ତ୍ତ ରହିଥିଲା । ଏଥିରେ ସ୍ମାର୍ଟ କିଓସ୍କ ଉପରେ ବିଜ୍ଞାପନ ମାରିବାକୁ ଉଲ୍ଲେଖ ରହିଥିଲା । ଉକ୍ତ ଘରୋଇ କମ୍ପାନିକୁ ୪୭୦୦ ବର୍ଗଫୁଟରେ ବିଜ୍ଞାପନ ମାରିବାକୁ ଅନୁମତି ଦିଆଯାଇଥିଲା । ହେଲେ ସଂସ୍ଥା କାରସାଦି କରି ପ୍ରାୟ ୮ ହଜାରରୁ ଅଧିକ ବର୍ଗଫୁଟରେ ବିଜ୍ଞାପନ ମାରିଥିବା ନେଇ ଅଭିଯୋଗ ହୋଇଛି । ଅର୍ଥାତ ନିର୍ଦ୍ଧାରିତ ଜାଗା ଠାରୁ ପ୍ରାୟ ୨ ଗୁଣା ଜାଗାରେ ବିଜ୍ଞାପନ ମରାଯାଇଛି । ଜନପଥରେ ଥିବା ଟ୍ରାନ୍ସଫର୍ମର ଉପରେ ବିଜ୍ଞାପନ ମରାକୁ ନେଇ ମଧ୍ୟ ପ୍ରଶ୍ନ ଉଠିଛି ।ଏହା ସହ କିଓସ୍କ ଉପରେ ମରାଯାଉଥିବା ବିଜ୍ଞାପନର ଅବଧି ଗତ ଫେବ୍ରୁଆରୀରୁ ସରିଲାଣି । ହେଲେ ସମୟ ବଢ଼ାଇ ବିଜ୍ଞାପନ ମରାଯାଉଛି ।
ଏହି ଦୁର୍ନୀତି ଫଳରେ ବିଏମ୍ସି କୋଟି କୋଟି ଟଙ୍କାର ରାଜସ୍ୱ ହରାଉଛି । ଖାଲି ସ୍ମାର୍ଟ ଜନପଥ ନୁହେଁ । ରାଜଧାନୀର ବିଭିନ୍ନ ସ୍ଥାନରେ ଏଜେନ୍ସି ପକ୍ଷରୁ ନିର୍ଦ୍ଧାରିତ ବର୍ଗଫୁଟରୁ ଅଧିକ ଜାଗାରେ ହୋର୍ଡିଂ ମରାଯାଉଛି । ଲଲି ପପ୍ ବିଲ୍ ବୋର୍ଡରେ ବି କୌଣସି ନିର୍ଦ୍ଦିଷ୍ଟ ନିୟମ ରହୁନି । ମନଇଚ୍ଛା ବିଲ୍ ବୋର୍ଡ ମାରି ରାଜସ୍ୱ ଫାଙ୍କୁଛନ୍ତି । ଫଳରେ ବିଏମ୍ସିର ରାଜସ୍ୱ ହାନି ହେଉଛି । ବିଏମ୍ସି କର୍ପୋରେସନ ବୈଠକରେ ଏହି ପ୍ରସଙ୍ଗ ଉଠିଥିଲା । କର୍ପୋରେଟର ମାନେ ଜନପଥରେ ଲାଗିଥିବା ହୋର୍ଡିଂର ଯାଞ୍ଚ କରିବାକୁ ଦାବି କରିଥିଲେ । ଏ ସମ୍ପର୍କରେ ବିଏମ୍ସିର ଡେପୁଟି କମିଶନର (ରାଜସ୍ୱ) ଅଜୟ କୁମାର ମହାନ୍ତି କହିଛନ୍ତି, ଜନପଥରେ ଅଧିକ ଜାଗାରେ ହୋର୍ଡିଂ ଲାଗିଥିଲେ କାର୍ଯ୍ୟାନୁଷ୍ଠାନ ନିଆଯିବ ।
