ନୂଆଦିଲ୍ଲୀ: ବିହାରର କଟିହାର ଜିଲ୍ଲାରେ ଆଜି (ରବିବାର) ସକାଳେ ଗଙ୍ଗା ନଦୀରେ ଏକ ଡଙ୍ଗା ବୁଡ଼ି ଦୁର୍ଘଟଣା ଘଟିଛି । ଡଙ୍ଗାଟି ବିହାରର ଗୋଲାଘାଟରୁ ଝାଡ଼ଖଣ୍ଡର ସାକ୍ରି ଗଲିକୁ ଯାଉଥିଲା । ଏହି ସମୟରେ ହଠାତ୍ ନଦୀ ମଝିରେ ଓଲଟି ପଡ଼ିଥିଲା । ଏପର୍ଯ୍ୟନ୍ତ ୩ ଜଣଙ୍କ ମୃତ୍ୟୁ ନିଶ୍ଚିତ ହୋଇଛି । ତେବେ ୪ ଜଣ ନିଖୋଜ ଥିବା କୁହାଯାଉଛି। ଡଙ୍ଗାରେ ପ୍ରାୟ ୧୮ ଜଣ ଲୋକ ଥିଲେ । ମୃତକଙ୍କ ମଧ୍ୟରେ ଜଣେ ଏକ ବର୍ଷୀୟ ଶିଶୁ କନ୍ୟା ମଧ୍ୟ ସାମିଲ ଥିଲା। ତିନି ଜଣଙ୍କ ମୃତଦେହ ଉଦ୍ଧାର କରାଯାଇଛି। ସମସ୍ତ ମୃତକ ମେଘୁ ଟୋଲା କଟିହାରର ବାସିନ୍ଦା ଥିଲେ।

ଦୁର୍ଘଟଣା ସମ୍ପର୍କରେ ସୂଚନା ପାଇବା ପରେ ସ୍ଥାନୀୟ ପ୍ରଶାସନ ଘଟଣାସ୍ଥଳରେ ପହଞ୍ଚି ଲୋକ ମାନଙ୍କୁ ସମସ୍ତ ପ୍ରକାରର ସାହାଯ୍ୟର ପ୍ରତିଶ୍ରୁତି ଦେଇଥିଲେ। ଉଦ୍ଧାର କାର୍ଯ୍ୟରେ SDRF ସମେତ ଅନେକ ଦଳ ନିୟୋଜିତ ହୋଇଛନ୍ତି। ପୋଲିସର ସୂଚନା ଅନୁଯାୟୀ ଡଙ୍ଗାରେ ୧୮ ଜଣ ଲୋକ ଥିଲେ। ଏମାନଙ୍କ ମଧ୍ୟରୁ ୭ ଜଣ ସୁରକ୍ଷିତ ଭାବରେ ପହଁରି ବାହାରକୁ ଆସିପାରିଛନ୍ତି। ଚାରି ଜଣଙ୍କୁ ଉଦ୍ଧାର କରାଯାଇଛି, ତିନି ଜଣଙ୍କ ମୃତଦେହ ଉଦ୍ଧାର କରାଯାଇଛି ଏବଂ ଚାରି ଜଣଙ୍କ ସନ୍ଧାନ ଜାରି ରହିଛି।

ସ୍ଥାନୀୟ ଲୋକଙ୍କ କହିବା ଅନୁଯାୟୀ, ଡଙ୍ଗାରେ କ୍ଷମତାଠାରୁ ଅଧିକ ଲୋକ ଥିଲେ, ଯାହା ଫଳରେ ସନ୍ତୁଳନ ବିଗିଡ଼ି ଯାଇଥିଲା। ପ୍ରଶାସନ ଏହି ଘଟଣାର ତଦନ୍ତ କରୁଛି । ଦୁର୍ଘଟଣା ପରେ ଅଞ୍ଚଳରେ ଶୋକର ଛାୟା ଖେଳିଯାଇଛି। ମୃତକଙ୍କ ପରିବାରକୁ ସମସ୍ତ ପ୍ରକାରର ସାହାଯ୍ୟ ଯୋଗାଇ ଦିଆଯିବ ବୋଲି ଅଧିକାରୀ ମାନେ ପ୍ରତିଶ୍ରୁତି ଦେଇଛନ୍ତି।