ନୂଆଦିଲ୍ଲୀ,୧୧/୦୭: ଚଳିତ ବିହାରରେ ନିର୍ବାଚନ । ରାଜନୈତିକ ଦଳ ମାନେ ଆରମ୍ଭ କରି ଦେଲେଣି ପ୍ରସ୍ତୁତି । ଭୋଟର ପରିଚୟ ପତ୍ର ଆବେଦନ ମଧ୍ୟ ଜାରି ରହିଛି । ଏହାରି ଭିତରେ ଏକ ଚକିତ କଲା ଭଳି ଖବର ସାମ୍ନାକୁ ଆସିଛି । ଜଣେ ମହିଳାଙ୍କ ଭୋଟର ପରିଚୟ ପତ୍ରରେ ବିହାର ମୁଖ୍ୟମନ୍ତ୍ରୀଙ୍କ ଫଟୋ ସ୍ଥାନ ପାଇଛି । ୩୦ ବର୍ଷୀୟା ମହିଳାଙ୍କ ଭୋଟର ପରିଚୟ ତାଙ୍କ ନାଁ ଅଭିଳାଶା କୁମାରୀ ଲେଖାଯାଇଛି । ହେଲେ ତାଙ୍କ ଫଟୋ ବଦଳରେ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ଫଟୋ ସ୍ଥାନ ପାଇଛି । ଯାହାକୁ ନେଇ ବିହାରରେ ଏବେ ଚର୍ଚ୍ଚା ।
ସୂଚନା ଅନୁଯାୟୀ, ଅଭିଳାଶା କୁମାରୀ ନିଜ ଭୋଟର ପରିଚୟପତ୍ରରେ ଠିକଣା ସଂଶୋଧନ କରିବାକୁ ଆବେଦନ କରିଥିଲେ । ସମ୍ପୃକ୍ତ ଅଧିକାରୀ ଠିକଣାକୁ ସଂଶୋଧନ କରିଥିଲେ, ମାତ୍ର ପରିଚୟ ପତ୍ରରେ ଆଉ ଗୋଟିଏ ନୂଆ ଭୁଲ କରିଦେଛନ୍ତି । ବିହାର, ମାଧେପୁରା ମ୍ୟୁନିସିପାଲ କାଉନ୍ସିଲର ଅଭିଳାଶା କୁମାରୀ ନିକଟରେ ନିଜର ସଂଶୋଧିତ ଭୋଟର ପରିଚୟପତ୍ର ପାଇଲେ । କାର୍ଡରେ ନାଁ ଓ ଅନ୍ୟ ବିବରଣୀ ଠିକ୍ ଥିଲା । କିନ୍ତୁ ଫଟୋ ମୁଖ୍ୟମନ୍ତ୍ରୀ ନୀତୀଶଙ୍କର ଥିଲା । ଏ ଘଟଣା ପାଇଁ ଅଭିଳାଶା ଓ ତାଙ୍କ ସ୍ୱାମୀ, ଭୋଟର ପରିଚୟପତ୍ର ପ୍ରସ୍ତୁତ କରୁଥିବା ସରକାରୀ ଏଜେନ୍ସିଙ୍କ ଅବହେଳାକୁ ଦାୟୀ କରିଛନ୍ତି । ଆଗକୁ ଯେମିତି ଏଭଳି ଘଟଣା ନ ହେଉ,ସେଥିପାଇଁ ଉଭୟ ଏହାର ଯାଞ୍ଚ୍ ଦାବି କରିଛନ୍ତି । ସେତିକି ନୁହେଁ, ଆଖି ଉପରେ ହାତ ଦେଇ ଖରାରେ ଚାହିଁଥିବା ନୀତୀଶଙ୍କର ସେହି ନିର୍ଦ୍ଦିଷ୍ଟ ଫଟୋକୁ ଭୋଟର ଆଇକାର୍ଡରେ ସ୍ଥାନ ଦେବାର କାରଣ ଉପରେ ମଧ୍ୟ ସେମାନେ ପ୍ରଶ୍ନ କରିଛନ୍ତି । ଦମ୍ପତି ଏ ନେଇ ସମ୍ପୃକ୍ତ ବୁଥ୍ ସ୍ତରୀୟ ଅଧିକାରୀଙ୍କ ପାଖକୁ ଯାଇଥିଲେ । ଏହି ଘଟଣା ବିଷୟରେ କାହାକୁ ନ ଜଣାଇବାକୁ ଅଧିକାରୀମାନେ ଦମ୍ପତିଙ୍କୁ କହିଲେ । ଇତିମଧ୍ୟରେ ଏହି ତ୍ରୁଟି ବିଧାନସଭା ନିର୍ବାଚନ ପାଇଁ ପ୍ରସ୍ତୁତ ହେଉଥିବା ବିହାର ଶାସକ ଦଳ ଉପରେ ରାଜନୈତିକ ଦଳମାନଙ୍କୁ ଆକ୍ରମଣର ସୁଯୋଗ ଦେଇଛି । ରିପୋର୍ଟ ଅନୁସାରେ, ମାମଲାର ଯାଞ୍ଚ୍ ଆଦେଶ ଦିଆଯାଇଛି ।
