ନୂଆଦିଲ୍ଲୀ, ୦୬/୦୩ : ବଦଳିବ ବିହାର। ସିଏମ୍ ରୁ ସାଂସଦ ହେବେ ନୀତୀଶ କୁମାର। ଜେଡିୟୁ ମୁଖ୍ୟଙ୍କ ବିହାରରୁ ଦିଲ୍ଲୀ ଯାତ୍ରା ଆରମ୍ଭ। ଗୁରୁବାର ବିହାରବାସୀଙ୍କୁ ଚକିତ କରି ନୀତୀଶ କୁମାର ରାଜ୍ୟସଭା ନିର୍ବାଚନ ଲାଗି ପ୍ରାର୍ଥିପତ୍ର ଦାଖଲ କରିଛନ୍ତି। ନୀତୀଶଙ୍କ ନାମାଙ୍କନ ଦାଖଲ ପରେ ରାଜ୍ୟ ରାଜନୀତିରେ ହଇଚଇ ସୃଷ୍ଟି ହୋଇଛି। ତାଙ୍କ ପରେ ନୂଆ ମୁଖ୍ୟମନ୍ତ୍ରୀ ନିର୍ବାଚିତ ହେବେ। କୁହାଯାଉଛି ଏଥର ମୁଖ୍ୟମନ୍ତ୍ରୀ ଆସନ ବିଜେପି ଭାଗକୁ ଯାଇପାରେ । ତେଣୁ ମୁଖ୍ୟମନ୍ତ୍ରୀ ଦୌଡ଼ରେ ସବା ଆଗରେ ସମ୍ରାଟ ଚୌଧୁରୀ ଅଛନ୍ତି । ତାଙ୍କ ପରେ କେନ୍ଦ୍ରମନ୍ତ୍ରୀ ନିତ୍ୟାନନ୍ଦ ରାୟ, ବିଧାୟକ ସଞ୍ଜୀବ ଚୌରାସିଆ ଏବଂ ଏମ୍ଏଲ୍ସି ଜନକ ରାୟଙ୍କ ନାମ ମଧ୍ୟ ଆସୁଛି।
କ'ଣ କହୁଛି ବିହାର ରାଜନୈତିକ ଗଣିତ ?
ଉପମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀଙ୍କୁ ବର୍ତ୍ତମାନ ମୁଖ୍ୟମନ୍ତ୍ରୀ ପଦ ପାଇଁ ସବୁଠାରୁ ଦୃଢ଼ ଦାବିଦାର ବୋଲି ବିବେଚନା କରାଯାଉଛି। ସେ ବିହାର ଗୃହ ମନ୍ତ୍ରଣାଳୟରେ ଅଛନ୍ତି ଏବଂ ନୀତିଶ କୁମାରଙ୍କ ସହିତ କାମ କରିବାର ତାଙ୍କର ରାଜନୈତିକ ଅଭିଜ୍ଞତା ଅଛି। ତାଙ୍କୁ ପ୍ରଧାନମନ୍ତ୍ରୀ ମୋଦି ଏବଂ ଅମିତ ଶାହଙ୍କ ଅତ୍ୟନ୍ତ ବିଶ୍ୱସ୍ତ ବ୍ୟକ୍ତି ବୋଲି କୁହାଯାଉଛି। କୁଶୱାହା ସମ୍ପ୍ରଦାୟରୁ ହୋଇଥିବାରୁ ସେ "ଲବ-କୁଶ" ସମୀକରଣ ପାଇଁ ସମ୍ପୂର୍ଣ୍ଣ ଫିଟ୍ ବୋଲି କୁହାଯାଉଛି।
ସେହିପରି କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟ ମୁଖ୍ୟମନ୍ତ୍ରୀ ରେସ୍ ରେ ଦ୍ଵିତୀୟରେ ରହିଛନ୍ତି। ନିତ୍ୟାନନ୍ଦଙ୍କୁ ଅମିତ ଶାହଙ୍କ ନିକଟତର ବୋଲି ବିବେଚନା କରାଯାଏ। ସେ ୨୦୧୯ ମସିହାରୁ କେନ୍ଦ୍ର ମନ୍ତ୍ରୀ ଅଛନ୍ତି ଏବଂ ଅମିତ ଶାହଙ୍କ ସହିତ ଗୃହ ମନ୍ତ୍ରଣାଳୟର ଦାୟିତ୍ୱ ମଧ୍ୟ ବହନ କରିଛନ୍ତି। ସେ ବିହାର ବିଜେପି ସଭାପତି ଭାବରେ କାର୍ଯ୍ୟ କରିଛନ୍ତି ଏବଂ ତାଙ୍କର ସାଂଗଠନିକ ଅଭିଜ୍ଞତା ମଧ୍ୟ ଅଛି। ସେ ଯାଦବ ସମ୍ପ୍ରଦାୟର। ସମ୍ରାଟ ଚୌଧୁରୀ ଏବଂ ନିତ୍ୟାନନ୍ଦ ରାୟ ଉଭୟ ଓବିସି ସମ୍ପ୍ରଦାୟର ଏବଂ ଅମିତ ଶାହଙ୍କ ନିକଟତର। ଏହା ବ୍ୟତୀତ ଉଭୟ ବିହାରରେ ବିଜେପିର ରାଜ୍ୟ ସଭାପତି ଭାବରେ କାର୍ଯ୍ୟ କରିଛନ୍ତି। ଉଭୟ ବିହାରର ଜାତି ରାଜନୀତିରେ ଫିଟ୍। ହେଲେ ବିଜେପି ଏହି ଦୁଇ ଜଣଙ୍କ ମଧ୍ୟରୁ କାହାକୁ ମୁଖ୍ୟମନ୍ତ୍ରୀ କରିବ ତାହା ଦେଖିବାକୁ ବାକି ରହିଲା।
କିଏ ହେବେ ଡେପୁଟି ସିଏମ୍ ?
ନୂଆ ସରକାରରେ ଦୁଇଜଣ ଉପମୁଖ୍ୟମନ୍ତ୍ରୀ ରହିପାରନ୍ତି । ଜେଡିୟୁ ସୂତ୍ର ଅନୁସାରେ, ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ପୁଅ ନିଶାନ୍ତ କୁମାର ଆସନ୍ତା ରବିବାର ଦଳରେ ଯୋଗଦେବେ । ଏହାପରେ ଦଳରେ ତାଙ୍କର ପରବର୍ତ୍ତୀ ଭୂମିକାକୁ ନେଇ ନିଷ୍ପତ୍ତି ନିଆଯିବ । ଦଳର ବରିଷ୍ଠ ନେତା ଏ ବାବଦରେ ବୈଠକରେ ଚର୍ଚ୍ଚା କରିବେ । ତେବେ ନିଶାନ୍ତଙ୍କ ଯୋଗଦାନକୁ ନୀତୀଶ ସବୁଜ ସଙ୍କେତ ଦେଇସାରିଛନ୍ତି । ନୀତୀଶଙ୍କ ନାମାଙ୍କନ ପରେ ସ୍ୱରାଷ୍ଟ୍ର ମନ୍ତ୍ରୀ ଶାହ କହିଛନ୍ତି, ତାଙ୍କ କାର୍ଯ୍ୟକାଳ ବିହାର ଇତିହାସରେ ସ୍ୱର୍ଣ୍ଣାକ୍ଷରରେ ଲେଖାଯିବ । ବିହାରର ବିକାଶକୁ ସବୁ ଦିଗରୁ ଗତି ଦେବା ଲାଗି ସେ କାମ କରିଛନ୍ତି । ସେ ନିଜ ଶାସନ କାଳରେ ବିହାରକୁ ଜଙ୍ଗଲରାଜରୁ ମୁକ୍ତ କରିବାର କାର୍ଯ୍ୟ କରିଥିଲେ । ବିଧାୟକ, ସାଂସଦ, ମୁଖ୍ୟମନ୍ତ୍ରୀ ଓ କେନ୍ଦ୍ରମନ୍ତ୍ରୀ ରହିଥିଲା ବେଳେ ତାଙ୍କ କାର୍ଯ୍ୟରେ ଦାଗ ଲାଗି ନ ଥିଲା। ବିନା ଦୁର୍ନୀତି ଅଭିଯୋଗରେ ସେ ନିଜ ରାଜନୈତିକ ଯାତ୍ରା ଜାରି ରଖିଛନ୍ତି । ମୁଖ୍ୟମନ୍ତ୍ରୀ ଭାବେ ତାଙ୍କ ଯାତ୍ରାକୁ ବିହାର ଜନତା ସବୁବେଳେ ମନେରଖିବେ ଓ ତାଙ୍କୁ ସମ୍ମାନ କରିବେ।
ଏହି ଖବରଟିକୁ ପଢନ୍ତୁ- ବିହାର ମୁଖ୍ୟମନ୍ତ୍ରୀ ପଦ ଛାଡି କାହିଁକି ରାଜ୍ୟସଭା ଯିବାକୁ ପସନ୍ଦ କଲେ ନୀତିଶ କୁମାର ? ଜାଣନ୍ତୁ ଏହା ପଛର ମୁଖ୍ୟ କାରଣ...
ଉଲ୍ଲେଖଥାଉ କି ୧୦ ରାଜ୍ୟର ୩୭ ରାଜ୍ୟସଭା ଆସନ ପାଇଁ ଆସନ୍ତା ୧୬ ତାରିଖରେ ଭୋଟିଂ ହେବ । ନାମାଙ୍କନ ଦାଖଲ ପରେ ନୀତୀଶ ସିଏମ୍ ହାଉସ୍ ଫେରିଯାଇଛନ୍ତି । ବିହାରର ଜନତା ନୀତୀଶଙ୍କୁ ବିକାଶ ପୁରୁଷ ନାମ ଦେଇଥିଲେ । ୨୦୦୫ ଓ ତାହା ପରେ ସମସ୍ତ ବିଧାନସଭା ନିର୍ବାଚନ ତାଙ୍କ ନାମରେ ଲଢ଼ାଯାଇଥିଲା । ୨୦୧୫ରେ ସେ ଏନ୍ଡିଏ ଛାଡ଼ି ମହାମେଣ୍ଟକୁ ବାଛିଥିଲେ । ୨୦୨୦ରେ ସେ ଏନ୍ଡିଏ ସହ ମିଶି ଲଢ଼ିଥିଲେ । ବିଜେପି ତୁଳନାରେ ଜେଡିୟୁକୁ କମ୍ ଭୋଟ ମିଳିବା ସତ୍ତ୍ଵେ ନୀତୀଶ ମୁଖ୍ୟମନ୍ତ୍ରୀ ହୋଇଥିଲେ । ୨୦୨୫ ନିର୍ବାଚନରେ ବି ସମାନ ଘଟଣା ଘଟିଥିଲା ଏବଂ ନୀତୀଶ ଦଶମ ଥର ପାଇଁ ମୁଖ୍ୟମନ୍ତ୍ରୀ ପଦରେ ଶପଥ ନେଇଥିଲେ ।
