ଭୁବନେଶ୍ୱର,୧୨/୧୧: ବର୍ଷକୁ ଥରେ ଆସେ ଡଙ୍ଗା ଭସା । ଏହି ସମୟରେ ମୁଁ ମୋ କଳାକୁ ଡଙ୍ଗା ମାଧ୍ୟମରେ ଦେଖାଏ । ଡଙ୍ଗା ଭସା ସିନା କାର୍ତ୍ତିକରେ ହୁଏ, କିନ୍ତୁ ଏହାର ପ୍ରସ୍ତୁତି ମୁଁ ଶ୍ରାବଣରୁ ଆରମ୍ଭ କରିଦିଏ । ହେଲେ ଏବର୍ଷ ଡଙ୍ଗା ତିଆରି କରିବାରେ ବିଳମ୍ବ ହୋଇଯାଇଛି । ବୟସ ଦିନକୁ ଦିନ ବଢୁଥିବାରୁ ଆଗ ଭଳି ଆଉ କାମ କରିପାରୁନି । ହେଲେ ଡଙ୍ଗା ହେଉଛି ମୋର ପରିଚୟ । ଜୀବନ ଥିବା ପର୍ଯ୍ୟନ୍ତ ଏମିତି ଡଙ୍ଗା କରିଚାଲିଥିବି । ଯେଉଁ ଦିନ ମୋ ଜୀବନ ଡଙ୍ଗା ବୁଡ଼ିଯିବ ସେହିଦିନ ବୁଡ଼ିଯିବ ମୋ କାର୍ତ୍ତିକ ଡଙ୍ଗା । ଏହା କହିଛନ୍ତି ଗତ ୩୦ ବର୍ଷ ଧରି ଡଙ୍ଗା ତିଆରି କରିଆସୁଥିବା କାରିଗର ବିଜୟ ବେହେରା ।
ଘର ପୁରୁଣା ଭୁବନେଶ୍ୱର ନଳାମୁହଁ ସାହି । ବୟସ ୬୦ ଛୁଇଁଲାଣି । ଦେହ ବି ଭଲ ରହୁନି । ହେଲେ ମନ ଦବିନି । ଆଜିବି ସିଏ ପୂର୍ବ ଉତ୍ସାହର ସହ ଡଙ୍ଗା ତିଆରି କରୁଛନ୍ତି । ବେଉସାରେ ସେ ହେଉଛନ୍ତି ଜଣେ ରାଜମିସ୍ତ୍ରୀ । କିନ୍ତୁ ଦକ୍ଷତା କୌଣସି ନିଖୁଣ କାରିଗରଠୁ କମ୍ ନୁହେଁ । ସୋଲକୁ ବ୍ୟବହାର କରି ଗଢିବସନ୍ତି ନାନା କିସମର ଡଙ୍ଗା । ସୋଲକୁ ହଂସ ଆକୃତିର କାଟି ଆଲ୍ପିନ୍, ଅଠା, ଜିଙ୍କ୍ ଦେଇ କରୁଥିବା ଡଙ୍ଗାରେ ଥାଏ ଅନେକ ଆଦର । ତେବେ ତାଙ୍କର ସବୁଠୁ ଆକର୍ଷଣୀୟ ଡଙ୍ଗା ଭିତରେ ହଂସ ହିଁ ମୁଖ୍ୟ । ସୋଲରେ ହଂସର ଏପରି ଆକୃତି କରନ୍ତି ଯେ, ପାଣିରେ ହଂସ ଭାସିବାର ଭ୍ରମ ସୃଷ୍ଟି ହୋଇଥାଏ । ତାଙ୍କର ଏ କଳା ଯୋଗୁଁ ଦୂର ଦୂରାନ୍ତରରୁ ଲୋକେ ଆସି ୧୫ ଦିନ ଆଗରୁ ଡଙ୍ଗାର ବରାଦି ଦେଇଥାନ୍ତି । ଏକ ନମ୍ବର ହାଟର ବ୍ୟବସାୟୀମାନେ ତାଙ୍କ ପାଖରୁ ଡଙ୍ଗା ନିଅନ୍ତି । ତାଙ୍କ ଡଙ୍ଗାର ମୂଲ୍ୟ ୩୦ ଟଙ୍କାରୁ ଆରମ୍ଭ ହୋଇ ୨ ହଜାର ଟଙ୍କା ପର୍ଯ୍ୟନ୍ତ ରହିଛି।
ଏଥିପାଇଁ ତାଙ୍କୁ ୪ ମାସ ପୂର୍ବରୁ କାମ ଆରମ୍ଭ କରିବାକୁ ପଡ଼ିଥାଏ । ହେଲେ ଚଳିତ ବର୍ଷ ସ୍ୱାସ୍ଥ୍ୟଗତ କାରଣରୁ ଡଙ୍ଗା ତିଆରି ବିଳମ୍ବ ହୋଇଛି । ଚଳିତ ବର୍ଷ ମଧ୍ୟ ସେ କେବଳ ହଂସ ଡଙ୍ଗା ହିଁ କରିପାରିଛନ୍ତି । ସେ ମୁଖ୍ୟତଃ ଡାଙ୍ଗା ତିଆରି କରିବା ପାଇଁ ସୋଲ, ଥର୍ମୋକୁଲ, ଜିଙ୍କ୍, ଆଲପିନ୍, କଣ୍ଟା ଆଦି ବ୍ୟବହାର କରିଥାନ୍ତି । କେବଳ ଡଙ୍ଗା କାହିଁକି ଅନ୍ୟ ସମୟରେ ପିଲାମାନଙ୍କ ପ୍ରୋଜେକ୍ଟ ପାଇଁ ମଧ୍ୟ ବିଭିନ୍ନ ପ୍ରକାର ସାମଗ୍ରୀ ତିଆରି କରିଥାନ୍ତି । ବିଜୟ ଯେ କେବଳ ସୋଲରେ କାରିଗରୀ ଚାତୁରୀ ଦେଖାନ୍ତି ତାହା ନୁହେଁ ସେ ଶିଙ୍ଗ କାମରେ ମଧ୍ୟ ବେଶ ଧୁରନ୍ଧର । ଏଥିପାଇଁ ସେ ତାଲିମ୍ ମଧ୍ୟ ନେଇଛନ୍ତି । ମାତ୍ର କଞ୍ଚାମାଲ୍ର ଅଭାବ ଏବଂ ବ୍ୟବସାୟିକ ବାଟର ଅଜ୍ଞତା ଯୋଗୁଁ ତାଙ୍କ ଶିଳ୍ପୀ ଜୀବନ ବାଲି ସିମେଣ୍ଟ୍ରେ ସୀମିତ ରହିଯାଇଛି ।
