ଫିରିଙ୍ଗିଆ, ୧୬/୧୧ : ଯାତ୍ରା ଦେଖି ଘରକୁ ଫେରୁଥିବା ବେଳେ ଭାରସାମ୍ୟ ହରାଇ ଗଛରେ ପିଟିହେଲା ବାଇକ୍। ଏହି ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଥିବା ବେଳେ ୨ ଜଣ ଗୁରୁତର ହୋଇଛନ୍ତି। ଫିରିଙ୍ଗିଆ ବ୍ଲକ ସାଡିଙ୍ଗିଆ ଅଞ୍ଚଳରେ ଏଭଳି ମର୍ମନ୍ତୁଦ ଦୁର୍ଘଟଣା ଘଟିଛି। ମୃତକ ଜଣକ ହେଲେ ସାଡିଙ୍ଗିଆ ପଞ୍ଚାୟତ ପିଡିଆକୁଟି ଗ୍ରାମର କାଣ୍ଡି ବାଙ୍କ (୧୭ ବର୍ଷ)। ସେହିପରି ଗୁରୁତରମାନେ ହେଲେ ବାନ୍ଦାଦଣୀର ସନାତନ କହଁର ଓ ଡାଙ୍ଗାଣିପଦରର ମାନସ ମଲିକ।
ସୂଚନା ଅନୁସାରେ, ଶୁକ୍ରବାର ସାଡିଙ୍ଗିଆ ଠାରେ ଚାଲିଥିବା ରାହାସ ଯାତ୍ରା ଦେଖିବା ପାଇଁ କାଣ୍ଡି ବାଙ୍କ, ସନାତନ କହଁର ଓ ମାନସ ମଲିକ ଏକ ବାଇକରେ ଆସିଥିଲେ। ଯାତ୍ରା ସରିବା ପରେ ନିଜ ଗାଁକୁ ଫେରୁଥିଲେ। ଏତିକି ବେଳେ ସାଡିଙ୍ଗିଆ-ବାନ୍ଦାଦଣୀ ରାସ୍ତାର କିଆମୁଣ୍ଡା ଟିକାରପଦର ଘାଟି ରାସ୍ତା ପାର୍ଶ୍ୱରେ ଥିବା ଏକ ଶାଳ ଗଛରେ ବାଇକଟି ଭାରସାମ୍ୟ ହରାଇ ପିଟି ହୋଇଥିଲା। ସ୍ଥାନୀୟ ଲୋକେ ସେମାନଙ୍କୁ ଏକ ଅଟୋ ରିକ୍ସାରେ ନେଇ ଫିରିଙ୍ଗିଆ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ଡାକ୍ତର କାଣ୍ଡିଙ୍କୁ ମୃତ ଘୋଷଣା କରିଥିଲେ। ଫିରିଙ୍ଗିଆ ପୁଲିସ ମେଡିକାଲରେ ପହଞ୍ଚି ଶବ ଜବତ କରିବା ସହ ବ୍ୟବଚ୍ଛେଦ ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଥିବା ଫିରିଙ୍ଗିଆ ଥାନା ଅଧିକାରୀ ସୂଚନା ଦେଇଛନ୍ତି।
