ଭୁବନେଶ୍ୱର, ୦୭/୦୭: ଆୟକର ବିଭାଗ କାର୍ଯ୍ୟାଳୟରେ ହାଜର ହେଲେ ପୂର୍ବତନ ମନ୍ତ୍ରୀ ସ୍ଵର୍ଗତ ନବ ଦାସଙ୍କ ପୁଅ ବିଶାଳ ଦାସ । ଆୟକର ବିଭାଗ ନୋଟିସ ପରେ ସେ ହାଜର ହୋଇଛନ୍ତି । କିଛି ଦିନ ପୂର୍ବରୁ ଆୟକର ବିଭାଗ ନବ ଦାସଙ୍କ ଘର ସମେତ ୯ଟି ସ୍ଥାନରେ ଚଢାଉ କରିଥିଲା । ଆୟକର ବିଭାଗ ପକ୍ଷରୁ ଝାରସୁଗୁଡ଼ା ସମେତ ସମ୍ବଲପୁର, ଭୁବନେଶ୍ୱର, ଦିଲ୍ଲୀ, ସୁନ୍ଦରଗଡ଼ ଓ ଅନ୍ୟାନ୍ୟ ସ୍ଥାନରେ ଥିବା ସ୍ୱର୍ଗତ ନବ ଦାସଙ୍କ ଘର, ବ୍ୟବସାୟିକ ପ୍ରତିଷ୍ଠାନ, କାର୍ଯ୍ୟାଳୟ, ତାଙ୍କ ଘନିଷ୍ଠ ସହଯୋଗୀ ଏବଂ ସଂପର୍କୀୟଙ୍କ ଠିକଣାରେ ଚଢ଼ାଉ କରାଯାଇଥିଲା ।
୨୦୨୩ ଏପ୍ରିଲ ଓ ମେ’ ମାସରେ ନବ ଦାସଙ୍କ ପୁଅ ବିଶାଳ ଦାସ ୪ଟି କମ୍ପାନିର ପାର୍ଟନର ହୋଇଥିବାବେଳେ ଏହି କମ୍ପାନିଗୁଡ଼ିକ ଝାରସୁଗୁଡ଼ା ବଡ଼ମାଲର ବୋଲି ଦର୍ଶାଯାଇଛି । ତେଣୁ ଏହି କମ୍ପାନି ଲିଙ୍କ୍ରେ ନବ ଦାସଙ୍କ ବାସଭବନରେ କାଗଜପତ୍ର ଯାଞ୍ଚ ହେଉଥିବା ଚର୍ଚ୍ଚା ହୋଇଥିଲା । ବାୟୋଫୁଏଲ୍ ବ୍ୟବସାୟରେ ବିଶାଳ ଦାସ କରିଥିବା ପୁଞ୍ଜିନିବେଶର କାଗଜପତ୍ର ଯାଞ୍ଚ କରାଯାଇଥିଲା। ଏହାଛଡ଼ା ନବଙ୍କ ଜଣେ ଘନିଷ୍ଠ ସହଯୋଗୀ ବୁଲୁ ବିଶ୍ୱାଳ ଓ ରେଙ୍ଗାଲିର ଜଣେ ମିଲ୍ ମାଲିକଙ୍କ ବାସଭବନରେ ବି ଚଢ଼ାଉ କରାଯାଇଥିଲା ।
