ନୀଳଗିରି, ୧୯/୬: ବାଲେଶ୍ୱର ଜିଲ୍ଲା ନୀଳଗିରିରେ ଦୁର୍ବଳ ହେଉଛି ବିଜେଡି । କିଛିଦିନ ପୂର୍ବରୁ ଜଡ଼ିଦା ପଞ୍ଚାୟତର ସରପଞ୍ଚ, ୩ ଜଣ ପୂର୍ବତନ ସରପଞ୍ଚ, ୭ଜଣ ୱାର୍ଡ ମେମ୍ବର ବିଜେଡି ଛାଡ଼ି ବିଜେପିରେ ଆନୁଷ୍ଠାନିକ ଭାବେ ସାମିଲ ହୋଇଥିଲେ । ଏହାକୁ ନେଇ ନୀଳଗିରି ରାଜନୀତି ସରଗରମ ହୋଇଉଠିଥିଲା। ଏବେ ୧୩ନଂ ଜୋନର କିଛି ତୁଙ୍ଗ ନେତା ବିଜେଡି ଛାଡି ବିଜେପିରେ ମିଶିବା ନେଇ ଚର୍ଚ୍ଚା ଜୋର ଧରିଛି । ଫଳରେ ନୀଳଗିରି ରାଜନୀତି ପାଣିପାଗ ଗୋଳିଆ ହୋଇଛି।
ସୂଚନାଯୋଗ୍ୟ, ନୀଳଗିରି ନିର୍ବାଚନ ମଣ୍ଡଳୀରେ ବିଜେଡି ୫ବର୍ଷ କ୍ଷମତାରେ ରହିବା ପରେ ୨୦୧୯ରେ ନେତା ଅଦଳବଦଳକୁ ଭୋଟର ସହଜରେ ହଜମ କରିପାରିନଥିଲେ ଏବଂ ବିଜେପିକୁ ସମର୍ଥନ କରିଥିଲେ । ବରିଷ୍ଠ ନେତା ସନ୍ତୋଷ ଖଟୁଆ ମଧ୍ୟ ବିଜେଡି ଛାଡି ବିଜେପି ବିଧାୟକ ହେଲାପରେ ଏବେ ବିଜେଡି ଦଳର ତୁଙ୍ଗନେତାମାନେ ବିଜେପି ମୁହାଁ ହୋଇଛନ୍ତି। ବିଜେଡି ଦଳର ଜଣେ ଟାଣୁଆ ନେତା କୁହାଯାଉଥିବା ୧୩ ନମ୍ବର ଜୋନର ଜିଲ୍ଲାପରିଷଦ ଗତିକୃଷ୍ଣ ନନ୍ଦ ଦିନେ ସନ୍ତୋଷ ଖଟୁଆଙ୍କର ଆନୁଗତ୍ୟ ଥିଲେ। ୨୦୨୪ରେ ସନ୍ତୋଷ ବିଜେପିକୁ ଗଲାପରେ ଗତିକୃଷ୍ଣ ଦଳ ପରିବର୍ତ୍ତନ କଲେ କାଳେ ଜିଲ୍ଲା ପରିଷଦ ସଭ୍ୟ ପଦ ଯିବ ଏନେଇ ପଛଘୁଞ୍ଚା ଦେଇ ବିଜେପିକୁ ଯାଇନଥିଲେ। ଏପରିକି ବିଜେଡି ସରକାର ଗଠନ କରିବ ନାହିଁ ବୋଲି ସେ ବିଶ୍ୱାସ ମଧ୍ୟ କରିନଥିଲେ। ହେଲେ ଏବେ ଓଡ଼ିଶା ରାଜନୀତିର ପାଣିପାଗ ଦେଖି ବରିଷ୍ଠ ନେତା ଗତିକୃଷ୍ଣ ନନ୍ଦ ବିଜେପି ଆଡ଼କୁ ଢଳିଥିବା ଚର୍ଚ୍ଚା ହେଉଛି। ସେ ବିଜେପିରେ ଖୁବଶୀଘ୍ର ମିଶିବା ନେଇ ବିଶେଷ ସୂତ୍ରରୁ ସୂଚନା ମିଳିଥିବା ବେଳେ ତାଙ୍କ ସହ ଅନ୍ୟ ଜଣେ ଜିଲ୍ଲାପରିଷଦ ସଭ୍ୟ ଓ ବିଜେଡି କର୍ମୀ, ସରପଞ୍ଚ ପଦ୍ମ ଧରିବା ନେଇ ଚର୍ଚ୍ଚା ହେଉଛି । ତେବେ ତାଙ୍କ ସହିତ ନରଣପୁର, ତେଲିପାଳ, ଜାମୁଡିହା, ସଜନାଗଡ଼, ଆରବନ୍ଦ, ଶ୍ୟାମସୁନ୍ଦରପୁର, କାଣ୍ଡଗରଡ଼ିହି, ଈଶ୍ୱରପୁର, ରାଧାକିଶୋରପୁର ପଞ୍ଚାୟତର କିଛି ତୁଙ୍ଗ ନେତାମାନେ ବିଜେପିରେ ମିଶିବା ସୂଚନା ରହିଛି।
