ଭୁବନେଶ୍ୱର, ୦୯/୦୪: ହୋଟେଲରେ ମେଳି ବାନ୍ଧିଲେ ବିଜେଡି ନେତା । ପଟିଆସ୍ଥିତ ହୋଟେଲ୍ କ୍ରିଷ୍ଟାଲ କ୍ରାଉନ୍ରେ ବିଜେଡିର ରୁଦ୍ଧଦ୍ୱାର ବୈଠକ ଚାଲିଛି । ଏହି ବୈଠକରେ ଅନେକ ବରିଷ୍ଠ ନେତା ସାମିଲ ହୋଇଛନ୍ତି । ପ୍ରସନ୍ନ ଆଚାର୍ଯ୍ୟ, ଭୁପିନ୍ଦର ସିଂ, ଶଶିଭୂଷଣ ବେହେରା, ଅଶୋକ ପଣ୍ଡା, ବଦ୍ରୀ ପାତ୍ର, ନୃସିଂହ ସାହୁ, ଚନ୍ଦ୍ର ସାରଥୀ ବେହେରା, ଅନଙ୍ଗ ଉଦୟ ସିଂଦେଓଙ୍କ ଭଳି ନେତାଙ୍କୁ ଏଠାରେ ଦେଖିବାକୁ ମିଳିଛି ।
ତେବେ ବୈଠକର କାରଣ କ'ଣ ତାହା ବର୍ତ୍ତମାନ ଜଣାପଡନାହିଁ । ତଥାପି ୱାକଫ୍ ବିଲ୍ ସମର୍ଥନକୁ ନେଇ ଗତ କିଛି ଦିନ ହେଲା ବିଜେଡିରେ ହଲଚଲ ଦେଖିବାକୁ ମିଳିଛି । ଏହାରି ମଧ୍ୟରେ ବିଜେଡି ନେତାଙ୍କ ମେଳି ଅନେକ ପ୍ରଶ୍ନ ଉଠାଇଛି । କାରଣ ୱାକଫ୍ ବିଲ୍ ସମର୍ଥନକୁ ନେଇ ଦଳ କୌଣସି ପ୍ରକାର କାର୍ଯ୍ୟାନୁଷ୍ଠାନ ନେଇନାହିଁ ।
କହିରଖୁ କି, ମଙ୍ଗଳବାର ନବୀନ ନିବାସରେ ବସିଥିଲା ଗୁରୁତ୍ୱପୂର୍ଣ୍ଣ ବୈଠକ । ବରିଷ୍ଠ ବିଜେଡି ନେତାଙ୍କ ସହ ବୈଠକ କରିଥିଲେ ବିଜେଡି ସୁପ୍ରିମୋ । ତେବେ ଏହି ବୈଠକରେ ଓ୍ୱାକଫ୍ ବିଲ୍ ଚର୍ଚ୍ଚା ନୁହେଁ କେବଳ ନିର୍ବାଚନ ପ୍ରସଙ୍ଗରେ ଆଲୋଚନା ହୋଇଥିଲା । ବୈଠକ ପରେ ଏନେଇ ପ୍ରତିକ୍ରିୟା ରଖିଥିଲେ ନେତୃ ବୃନ୍ଦ ।
