ନୂଆଦିଲ୍ଲୀ: ବିଧାନସଭା ନିର୍ବାଚନ ପୂର୍ବରୁ ନୂଆଦିଲ୍ଲୀ ବିଧାନସଭା କ୍ଷେତ୍ରରେ ପଞ୍ଜାବର ଗାଡ଼ି ପ୍ରବେଶ କରୁଛି ବୋଲି ଦାବି କରିଥିଲେ ବିଜେପି ପ୍ରାର୍ଥୀ ପରବେଶ ବର୍ମା । ଏପରିକି ପଞ୍ଜାବରୁ ଆସୁଥିବା ଲୋକେ ସାଧରଣତନ୍ତ୍ର ଦିବସରେ ବିଶୃଙ୍ଖଳା କରିବାକୁ ଯୋଜନା କରୁଥିବା ନେଇ ସେ ଅଭିଯୋଗ କରିଥିଲେ । ଏହା ପରେ ପରବେଶ ବର୍ମାଙ୍କ ଅଡ଼ୁଆ ବଢ଼ିଛି । ଓକିଲ ଏବଂ ଏକାଧିକ ପଞ୍ଜାବୀଙ୍କ ପକ୍ଷରୁ ତାଙ୍କୁ ଆଇନଗତ ନୋଟିସ ପଠାଯାଇଛି । ପରବେଶ ବର୍ମା ନିଜର ଏହି ବିବାଦୀୟ ମନ୍ତବ୍ୟ ଲାଗି ସାର୍ବଜନୀନ ସ୍ଥାନରେ କ୍ଷମା ମାଗନ୍ତୁ ବୋଲି ସେମାନେ ଦାବି କରିଛନ୍ତି ।
ମଙ୍ଗଳବାର ଗଣମାଧ୍ୟମକୁ ପ୍ରତିକ୍ରିୟା ଦେଇ ନୂଆଦିଲ୍ଲୀରୁ ବିଜେପିର ପ୍ରାର୍ଥୀ ପରବେଶ ବର୍ମା କହିଥିଲେ, ପଞ୍ଜାବରେ ପଞ୍ଜିକୃତ ହଜାର ହଜାର ଗାଡ଼ି ଦିଲ୍ଲୀରେ ପ୍ରବେଶ କରିଛି। ପଞ୍ଜାବରୁ ଲୋକେ ଏଠାକୁ ଆସିଛନ୍ତି । ବିଧାନସଭା ନିର୍ବାଚନକୁ ପ୍ରଭାବିତ କରିବା ଲାଗି ଆପ୍ ଏଭଳି କରୁଛି । ପଞ୍ଜାବର ମୁଖ୍ୟମନ୍ତ୍ରୀ, ମନ୍ତ୍ରୀ ଏବଂ ବିଧାୟକମାନେ ନୂଆଦିଲ୍ଲୀ ବିଧାନସଭା କ୍ଷତ୍ରେକୁ ଆସୁଛନ୍ତି । ପଞ୍ଜାବ ଗାଡ଼ି ନମ୍ବର ଥିବା ହଜାର ହଜାର ଗାଡ଼ି ନୂଆଦିଲ୍ଲୀରେ ବୁଲୁଛି । ସାଧାରଣତନ୍ତ୍ର ଦିବସ ଲାଗି ପ୍ରସ୍ତୁତି ଚାଲିଛି, ପଞ୍ଜାବର ଲୋକମାନେ ସୁରକ୍ଷା ପ୍ରତି ବିପଦ ସୃଷ୍ଟି କରିପାରନ୍ତି । ଏହି ପ୍ରସଙ୍ଗକୁ ନେଇ ନିର୍ବାଚନ କମିଶନଙ୍କ ଦୃଷ୍ଟି ଆକର୍ଷଣ କରିବେ ବୋଲି କହିଥିଲେ ପରବେଶ ବର୍ମା ।
ସେ ଆହୁରି ଦାବି କରିଥିଲେ ଯେ, ପଞ୍ଜାବର ସରକାରୀ ଚାକିରିଆ ଆପ୍ର କର୍ମୀ ବୋଲି ପରିଚୟ ଦେଇ ଦିଲ୍ଲୀରେ ରହୁଛନ୍ତି । ସେପଟେ ପରବେଶ ବର୍ମାଙ୍କ ଏହି ମନ୍ତବ୍ୟକୁ ଜୋରଦାର ବିରୋଧ କରିଛି ଆମ ଆଦମୀ ପାର୍ଟି (ଆପ୍) । ଲକ୍ଷ ଲକ୍ଷ ପଞ୍ଜାବୀ ଦିଲ୍ଲୀରେ ରହୁଛନ୍ତି, ସେମାନଙ୍କ ପରିବାର ଏବଂ ପୂର୍ବଜ ଦେଶପାଇଁ ବଳିଦାନ ଦେଇଛନ୍ତି । କିନ୍ତୁ ବିଜେପି ପଞ୍ଜାବୀମାନଙ୍କ ବଳିଦାନକୁ ଉପହାସ କରିଛି ବୋଲି ଏକ୍ସରେ ପୋଷ୍ଟ କରିଛନ୍ତି ଅରବିନ୍ଦ କେଜ୍ରିଓ୍ବାଲ ।
ବିଜେପି ଏବେ ପଞ୍ଜାବୀଙ୍କୁ ଦେଶ ପାଇଁ ବିପଦ ବୋଲି କହୁଛି । ଦିଲ୍ଲୀରେ ରହୁଥିବା ଲକ୍ଷାଧିକ ପଞ୍ଜାବୀଙ୍କୁ ବିଜେପି ଅପମାନିତ କରିଛି । ବିଜେପି ପଞ୍ଜାବୀମାନଙ୍କୁ କ୍ଷମା ପ୍ରାର୍ଥନା କରିବା ଦରକାର ବୋଲି କେଜ୍ରିଓ୍ବାଲ ଦାବି କରିଛନ୍ତି । ସେହିଭଳି ପଞ୍ଜାବ ମୁଖ୍ୟମନ୍ତ୍ରୀ ଏବଂ ଆପ ନେତା ଭଗଓ୍ବନ୍ତ ମାନ ମଧ୍ୟ ପରବେଶଙ୍କ ମନ୍ତବ୍ୟକୁ ପଞ୍ଜାବ ବିରୋଧୀ ବୋଲି କହିଛନ୍ତି । ସେପଟେ ପରବେଶ ବର୍ମାଙ୍କୁ ଏହି ମନ୍ତବ୍ୟ ବିରୋଧରେ ପଞ୍ଜାବ ଏବଂ ଦିଲ୍ଲୀରେ ରହୁଥିବା ବହୁ ପଞ୍ଜାବୀଙ୍କ ପକ୍ଷରୁ ଲିଗାଲ ବା ଆଇନଗତ ନୋଟିସ ପଠାଯାଇଛି । ପରବେଶ ବର୍ମା ସାର୍ବଜନୀନ ଭାବରେ କ୍ଷମା ପ୍ରାର୍ଥନା ନକଲେ ଆଗକୁ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେମାନେ ଚେତାବନୀ ମଧ୍ୟ ଦେଇଛନ୍ତି ।
