ନୂଆଦିଲ୍ଲୀ: କର୍ଣ୍ଣାଟକରେ ନିଜର ଦୁଇ ଜଣ ବିଧାୟକଙ୍କୁ ଦଳରୁ ବହିଷ୍କାର କରିଛି ବିଜେପି । ଏସଟି ସୋମଶେଖର ଏବଂ ଏ ଶିବରାମ ହେବରଙ୍କୁ ୬ ବର୍ଷ ପାଇଁ ଦଳରୁ ବିଜେପି ବହିଷ୍କାର କରିଥିବା ଜଣାପଡ଼ିଛି । ବିଜେପିର କର୍ଣ୍ଣାଟକ ୟୁନିଟ୍ ସଭାପତି ବିୱାଇ ବିଜୟେନ୍ଦ୍ରଙ୍କ ଅନୁଯାୟୀ, ଦଳ ବିରୋଧୀ କାର୍ଯ୍ୟକଳାପ ଯୋଗୁଁ ଉଭୟ ବିଧାୟକଙ୍କୁ ଦଳରୁ ବହିଷ୍କାର କରାଯାଇଛି। ସେ କହିଛନ୍ତି ଯେ, ବିଜେପି ହାଇକମାଣ୍ଡ ଦୀର୍ଘ ଆଲୋଚନା ପରେ ଏହି ନିଷ୍ପତ୍ତି ନେଇଛନ୍ତି । ଏସଟି ସୋମଶେଖର କର୍ଣ୍ଣାଟକ ବିଧାନସଭାରେ ୟଶୱନ୍ତପୁରକୁ ପ୍ରତିନିଧିତ୍ୱ କରନ୍ତି ଏବଂ ଶିବରାମ ହେବର ୟେଲାପୁର ବିଧାନସଭା ଆସନରୁ ନିର୍ବାଚନ ଜିତିଥିଲେ ।
ଦଳର କେନ୍ଦ୍ରୀୟ ଶୃଙ୍ଖଳା କମିଟିର ସଦସ୍ୟ ଓମ୍ ପାଠକ ଦେଇଥିବା ସରକାରୀ ଚିଠି ଅନୁଯାୟୀ, ଦଳରେ ବିଶୃଙ୍ଖଳାର ଯୋଗୁଁ ଏହି ବଡ଼ ପଦକ୍ଷେପ ନିଆଯାଇଛି। ଉଭୟ ବିଧାୟକଙ୍କୁ ତତ୍କାଳ ପ୍ରଭାବରୁ ୬ ବର୍ଷ ପାଇଁ ଦଳର ପ୍ରାଥମିକ ସଦସ୍ୟତାରୁ ବହିଷ୍କାର କରାଯିବା ପାଇଁ ନିଷ୍ପତ୍ତି ନିଆଯାଇଛି । ଦଳର ସବୁ ପଦବୀରୁ ସେମାନଙ୍କୁ ବିଦା କରାଯାଇଛି। ଏସ୍ ଟି ସୋମଶେଖର ଏବଂ ଶିବରାମ ହେବରଙ୍କ ବିରୋଧରେ ଅନେକ ଏଫ୍ଆଇଆର୍ ଅଛି ଏବଂ ତଦନ୍ତ ଚାଲିଛି ।
The BJP Central Disciplinary Committee has expelled MLA A Shivaram Hebbar from the BJP for a period of six years. pic.twitter.com/fGK5BDaShZ
— ANI (@ANI) May 27, 2025
ମାର୍ଚ୍ଚ ୨୦୨୪ ରାଜ୍ୟସଭା ନିର୍ବାଚନରେ ସୋମଶେଖର ଦଳୀୟ ହ୍ୱିପ୍ ସତ୍ତ୍ୱେ କଂଗ୍ରେସ ପ୍ରାର୍ଥୀ ଅଜୟ ମାକେନଙ୍କୁ କ୍ରସ୍-ଭୋଟ୍ ଦେଇଥିଲେ । ସେପଟେ ଶିବରାମ ହେବର ଭୋଟ ଦେଇନଥିଲେ । ଉଭୟଙ୍କ କାର୍ଯ୍ୟକୁ ଦଳ ଭିତରେ ବିଦ୍ରୋହ ଭାବରେ ଦେଖାଯାଇଥିଲା । ଆଉ ଏବେ ଦୁଇ ବିଧାୟକଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିଛି ବିଜେପି ।
