ନୂଆଦିଲ୍ଲୀ, ୨୮।୪: ମହିଳା ସଂରକ୍ଷଣ ପ୍ରସଙ୍ଗକୁ ନେଇ କେନ୍ଦ୍ରମନ୍ତ୍ରୀ କିରେନ ରିଜିଜୁ କଂଗ୍ରେସ ଉପରେ ବର୍ଷିଛନ୍ତି । ସେ କଂଗ୍ରେସର ବରିଷ୍ଠ ନେତା ତଥା ସାଂସଦ ଶଶି ଥରୁରଙ୍କ ନାଁ ନେଇ ଏକ ଚାଞ୍ଚଲ୍ୟକର ଦାବି କରିଛନ୍ତି । ରିଜିଜୁଙ୍କ କହିବା ଅନୁଯାୟୀ, ଶଶି ଥରୁର ନିଜେ ସ୍ୱୀକାର କରିଛନ୍ତି ଯେ କଂଗ୍ରେସ ଦଳ ହେଉଛି 'ମହିଳା ବିରୋଧୀ' । ସଂସଦ ଅଧିବେଶନ ପରେ ଦୁଇ ନେତାଙ୍କ ମଧ୍ୟରେ ହୋଇଥିବା ଏକ ବ୍ୟକ୍ତିଗତ ଆଲୋଚନାର ସନ୍ଦର୍ଭ ଦେଇ ରିଜିଜୁ ଏହି ସୂଚନା ଦେଇଛନ୍ତି । ନ୍ୟୁଜ୍ ଏଜେନ୍ସି ANIକୁ ଦେଇଥିବା ଏକ ସାକ୍ଷାତକାରରେ ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ କହିଛନ୍ତି ଯେ, ସଂସଦ ଅଧିବେଶନ ଶେଷ ହେବା ପରେ ସଂସଦ ଭବନ ପରିସରରେ ତାଙ୍କର ସାକ୍ଷାତ ଶଶି ଥରୁରଙ୍କ ସହ ହୋଇଥିଲା । ଏହି ସମୟରେ ଥରୁର ତାଙ୍କୁ କହିଥିଲେ, "କଂଗ୍ରେସ ପାର୍ଟି ମହିଳା ବିରୋଧୀ ହୋଇପାରେ, କିନ୍ତୁ କୌଣସି ମହିଳା ଶଶି ଥରୁରଙ୍କୁ ମହିଳା ବିରୋଧୀ କହିବେ ନାହିଁ ।"
ଏହାର ଉତ୍ତରରେ ରିଜିଜୁ କହିଥିଲେ, "ହଁ, ମୁଁ ମାନୁଛି ଯେ କେହି ଆପଣଙ୍କୁ ମହିଳା ବିରୋଧୀ କହିବେ ନାହିଁ, କିନ୍ତୁ ଆପଣଙ୍କ ଦଳ ନିଶ୍ଚିତ ଭାବେ ମହିଳା ବିରୋଧୀ ।" ରିଜିଜୁଙ୍କ ଦାବି ଅନୁଯାୟୀ, ଏହି କଥାବାର୍ତ୍ତା ମାଧ୍ୟମରେ ଥରୁର ପରୋକ୍ଷରେ ଗ୍ରହଣ କରିଛନ୍ତି ଯେ କଂଗ୍ରେସର ଆଭିମୁଖ୍ୟ ମହିଳା ସ୍ୱାର୍ଥ ରକ୍ଷା କ୍ଷେତ୍ରରେ ସକାରାତ୍ମକ ନୁହେଁ ।
କଂଗ୍ରେସକୁ ଘେରିଲେ କେନ୍ଦ୍ରମନ୍ତ୍ରୀ:
ରିଜିଜୁ କହିଛନ୍ତି ଯେ, ଯେତେବେଳେ ଥରୁର କହିଲେ ଯେ ମହିଳାମାନେ ତାଙ୍କୁ ମହିଳା ବିରୋଧୀ ମାନନ୍ତି ନାହିଁ, ସେତେବେଳେ ସେ ସ୍ପଷ୍ଟ କରିଦେଲେ ଯେ ଦଳୀୟ ଆଧାରରେ କଂଗ୍ରେସ ମହିଳାଙ୍କ ବିରୋଧରେ କାର୍ଯ୍ୟ କରୁଛି । ପୂର୍ବରୁ ମଧ୍ୟ ମହିଳା ସଂରକ୍ଷଣ ସମ୍ବନ୍ଧୀୟ ସାମ୍ବିଧାନିକ ସଂଶୋଧନ ବିଲ୍କୁ ବିରୋଧ କରିଥିବାରୁ ବିଜେପି କଂଗ୍ରେସକୁ କଡ଼ା ସମାଲୋଚନା କରିଆସିଛି । ଲୋକସଭାରେ ବିଲ୍ ପାସ୍ ନହୋଇପାରିବା ପରେ ରିଜିଜୁ କହିଥିଲେ, "କଂଗ୍ରେସ ମହିଳାମାନଙ୍କୁ ସେମାନଙ୍କ ଅଧିକାରରୁ ବଞ୍ଚିତ ରଖି ଉତ୍ସବ ପାଳନ କରୁଛି । ଦେଶର ମହିଳାମାନେ କଂଗ୍ରେସକୁ ଉଚିତ୍ ଶିକ୍ଷା ଦେବେ ।"
କାହିଁକି ହେଉଛି ବିବାଦ ?
ସୂଚନାଯୋଗ୍ୟ ଯେ, ସମ୍ବିଧାନର ୧୩୧ତମ ସଂଶୋଧନ ବିଧେୟକ ଅନୁଯାୟୀ, ୨୦୧୧ ଜନଗଣନା ଆଧାରରେ ସୀମା ନିର୍ଦ୍ଧାରଣ ପରେ ଲୋକସଭା ଆସନ ସଂଖ୍ୟା ୫୪୩ରୁ ୮୧୬କୁ ବୃଦ୍ଧି କରିବାକୁ ପ୍ରସ୍ତାବ ରହିଥିଲା । ଏହାଦ୍ୱାରା ୨୦୨୯ ନିର୍ବାଚନ ପୂର୍ବରୁ ମହିଳାଙ୍କ ପାଇଁ ୩୩ ପ୍ରତିଶତ ସଂରକ୍ଷଣ ଲାଗୁ କରିବାକୁ ଲକ୍ଷ୍ୟ ରଖାଯାଇଥିଲା । ତେବେ ବିରୋଧୀ ଦଳଗୁଡ଼ିକ ଏହି ବିଧେୟକକୁ ନେଇ କିଛି ଗୁରୁତ୍ୱପୂର୍ଣ୍ଣ ଆପତ୍ତି ଉଠାଇଛନ୍ତି । ସେଗୁଡ଼ିକ ହେଲା:
ସୀମା ନିର୍ଦ୍ଧାରଣ ବିନା ସଂରକ୍ଷଣ: ବିରୋଧୀଙ୍କ ଦାବି ହେଉଛି ଯେ ଆସନ ସଂଖ୍ୟା ନ ବଢ଼ାଇ ତୁରନ୍ତ ମହିଳା ସଂରକ୍ଷଣ ଲାଗୁ କରାଯାଉ ।
ଦକ୍ଷିଣ ଭାରତୀୟ ରାଜ୍ୟଙ୍କ ପ୍ରତି ଅନ୍ୟାୟ: ବିରୋଧୀଙ୍କ ଯୁକ୍ତି ଅନୁଯାୟୀ, ଜନସଂଖ୍ୟା ଆଧାରରେ ଆସନ ବଢ଼ାଇବା ଦ୍ୱାରା ଦକ୍ଷିଣ ଭାରତର ସେହି ରାଜ୍ୟଗୁଡ଼ିକ କ୍ଷତିଗ୍ରସ୍ତ ହେବେ ଯେଉଁମାନେ ପରିବାର ନିୟନ୍ତ୍ରଣକୁ ସଫଳତାର ସହ ଲାଗୁ କରିଛନ୍ତି ।
ରାଜନୈତିକ ଫାଇଦା: ବିରୋଧୀ ଦଳଗୁଡ଼ିକ ଦାବି କରିଛନ୍ତି ଯେ ପ୍ରସ୍ତାବିତ ସୀମା ନିର୍ଦ୍ଧାରଣ କେବଳ ବିଜେପିକୁ ଫାଇଦା ପହଞ୍ଚାଇବା ପାଇଁ କରାଯାଉଛି । ଏହି ସମସ୍ତ ବିବାଦ ମଧ୍ୟରେ କିରେନ ରିଜିଜୁଙ୍କ ଏହି ନୂଆ ଦାବି ରାଜନୈତିକ ମହଲରେ ଉଷ୍ମତା ବଢ଼ାଇ ଦେଇଛି । ଏ ପର୍ଯ୍ୟନ୍ତ ଶଶି ଥରୁର କିମ୍ବା କଂଗ୍ରେସ ପକ୍ଷରୁ ଏହି ବ୍ୟକ୍ତିଗତ କଥାବାର୍ତ୍ତା ନେଇ କୌଣସି ପ୍ରତିକ୍ରିୟା ମିଳିନାହିଁ ।
ଆହୁରି ପଢ଼ନ୍ତୁ... Bengal Election; କଂଗ୍ରେସ ପାଇଁ ସମ୍ମାନର ପ୍ରଶ୍ନ, ୨୦୨୧ରେ ବେଙ୍ଗଲରେ ଖାତା ଖୋଲିପାରିନଥିଲା
