ରାଞ୍ଚି: ସଢ଼େଇକଳା ଆସନରୁ ପ୍ରାର୍ଥୀ ହୋଇଥିବା ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଏବଂ ବିଜେପି ନେତା ଚମ୍ପାଇ ସୋରେନ୍ ବିଜୟୀ ହୋଇଛନ୍ତି । ସେ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା (ଜେଏମଏମ୍)ର ପ୍ରାର୍ଥୀ ଗଶେଶ ମହାଲିଙ୍କୁ ପରାସ୍ତ କରିଛନ୍ତି । ନିର୍ବାଚନ କମିଶନଙ୍କ ଅନୁସାରେ, ସୋରେନ୍ ୧,୧୯,୩୭୯ ଖଣ୍ଡ ଭୋଟ ପାଇଥିବା ବେଳେ ତାଙ୍କ ନିକଟତମ ପ୍ରତିଦ୍ବନ୍ଦୀ ମହାଲି ୯୮,୯୩୨ ଭୋଟ ପାଇଛନ୍ତି । ଚମ୍ପାଇ ସୋରେନ୍ ୨୦, ୪୪୭ ଭୋଟ ବ୍ୟବଧାନରେ ବିଜୟୀ ହୋଇଛନ୍ତି ।
ବିଶିଷ୍ଟ ରଜାନେତା ଏବଂ ଜେଏମଏମର ପ୍ରତିଷ୍ଠାତା ଶିବୁ ସୋରନେଙ୍କ ନିକଟତମ ସହଯୋଗୀ ଚମ୍ପାଇ ସୋରେନ୍ ନିର୍ବାଚନ ପୂର୍ବରୁ ବିଜେପିରେ ସାମିଲ ହୋଇଥିଲ । ୨୦୦୫ରେ ଝାଡ଼ଖଣ୍ଡର ପ୍ରଥମ ନର୍ବାଚନ ପାଖରୁ ସଢ଼େଇକଳା ଚମ୍ପାଇ ସୋରେନଙ୍କ ଗଡ଼ ରହିଆସିଛି । ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ ଗିରଫ ହେବା ପରେ ଗତ ଜାନୁଆରୀରରେ ଚମ୍ପାଇ ସୋରେନ ରାଜ୍ୟର ମୁଖ୍ୟମନ୍ତ୍ରୀ ହୋଇଥିଲେ । ହେମନ୍ତ ସୋରେନ ଜେଲରୁ ମୁକୁଳିବା ପରେ ଚମ୍ପାଇଙ୍କୁ ମୁଖ୍ୟମନ୍ତ୍ରୀ ଚୌକି ଛାଡ଼ିବାକୁ ପଡ଼ିଥିଲା । ଏଥିରେ ଅସନ୍ତୋଷ ପ୍ରକାଶ କରି ଜେଏମଏମ୍ ଛାଡ଼ି ବିଜେପି ଶିବିରରେ ଯୋଗ ଦେଇଥିଲେ ଚମ୍ପାଇ । କିନ୍ତୁ ଝାଡ଼ଖଣ୍ଡ ନିର୍ବାଚନରେ ବିଜେପି ନେତୃତ୍ବାଧୀନ ଏନଡିଏକୁ ମାତ ଦେଇଛି ଇଣ୍ଡି ମେଣ୍ଟ ।
ସେପଟେ ବିଜେପିର ପରାଜୟ ପରେ ଲୋକଙ୍କ ମତକୁ ସ୍ବୀକାର କରୁଛି ବୋଲି ଚମ୍ପାଇ ସୋରେନ୍ କହିଛନ୍ତି । ଝାଡ଼ଖଣ୍ଡ ବିଧାନସଭା ନିର୍ବାଚନ ଦୁଇଟି ପର୍ଯ୍ୟାୟ ନଭେମ୍ବର ୧୩ ଏବଂ ୨୦ରେ ହୋଇଥିଲା । ୮୧ ଆସନ ଲାଗି ଏନଡିଏ ଏବଂ ଇଣ୍ଡି ମେଣ୍ଟ ମଧ୍ୟରେ ଜୋରଦାର ଲଢ଼େଇ ହୋଇଥିଲା । ହେଲେ ଶେଷରେ ଜେଏମଏମ୍ ନେତୃତ୍ବାଧୀନ ଇଣ୍ଡି ମେଣ୍ଟ ପାଖରୁ ପରାସ୍ତ ହୋଇଛି ଏନଡିଏ । ଏଥର ବିଜେପି ୬୮ ଜଣ ପ୍ରାର୍ଥୀ ଦେଇଥିବା ବେଳେ ଏହାର ସହଯୋଗୀ ଏଜେଏସୟୁ, ଜେଡିୟୁ ଏବଂ ଲୋକ ଜନଶକ୍ତି (ରାମବିଳାସ) ପାର୍ଟି ଯଥାକ୍ରମେ ୧୦, ୨ ଏବଂ ଗୋଟିଏ ଆସନରେ ନିର୍ବାଚନ ଲଢ଼ିଥିଲେ । ଅନ୍ୟପଟେ ଜେଏମଏମ ୪୩ ଆସନରେ ପ୍ରାର୍ଥୀ ଦେଇଥିଲା। ଏହାର ସହଯୋଗୀ ଦଳ କଂଗ୍ରେସ ଏବଂ ଆଜରଜେଡି ଯଥାକ୍ରମେ ୩୦ ଏବଂ ୬ ଆସନରେ ପ୍ରାର୍ଥୀ ଦେଇଥିଲେ ।
