ଧର୍ମଗଡ, ୨୧/୧୧ : ଧର୍ମଗଡ ଆଞ୍ଚଳିକ କୃଷକ ସଙ୍ଗଠନ ପକ୍ଷରୁ ଆଜି ରବି ଚାଷ ପାଇଁ ଇନ୍ଦ୍ରାବତୀ ଜଳଭଣ୍ଡାରରୁ ଧର୍ମଗଡ ଉପଖଣ୍ଡ ଅଞ୍ଚଳର ଚାଷୀଙ୍କୁ ଜଳସେଚନ ପାଇଁ ଧର୍ମଗଡଠାରେ ରାସ୍ତା ଅବରୋଧ କରିବା ସହ ପ୍ରତିବାଦ କରାଯାଇଛି । ଇନ୍ଦ୍ରାବତୀ ଜଳଭଣ୍ଡାରରେ ଚଳିତ ବର୍ଷ ଜଳସ୍ତର କମ ରହିଥିବା ଦର୍ଶାଇ ରବି ଚାଷ ପାଇଁ ଜଳସେଚନ ବନ୍ଦ ରହିବା ନେଇ ଇନ୍ଦ୍ରାବତୀ ବିଭାଗୀୟ ଅଧିକାରୀ ବିଜ୍ଞପ୍ତି ଜାରି କରିଛନ୍ତି । ଏହାକୁ ପ୍ରତିବାଦ କରି ଚାଷୀ ସଙ୍ଗଠନ ପକ୍ଷରୁ ଧର୍ମଗଡ ଚାରିଛକ ନିକଟରେ ଆନ୍ଦୋଳନ କାରୀ ଚାଷୀ ନେତା ଓ ବିଭିନ୍ନ ଦଳୀୟ କର୍ମକର୍ତ୍ତା ମାନେ ଶତାଧିକ ଚାଷୀ ଙ୍କ ସହ ଆନ୍ଦୋଳନ କରିଥିଲେ । ତେବେ ପରେ ଘଟଣାସ୍ଥଳରେ ଧର୍ମଗଡ ଉପ ଜିଲ୍ଲାପାଳ ଆସି ଚାଷୀ ନେତା ଓ ଜନ ପ୍ରତିନିଧିଙ୍କ ସହ ଆଲୋଚନା କରିବା ସହ ଜଳସେଚନ ନେଇ ବିଚାର ବିମର୍ଷ ଚାଲିଛି ଓ କିଛିଦିନ ସମୟ ମାଗିଥିଲେ ପରେ ରାସ୍ତା ଅବରୋଧ ହଟିଥିବା ସୂଚନା ମିଳିଛି।