ଭୁବନେଶ୍ୱର,୨୭/୧୧ : ଢେର ସମୟ ନେଲଣି । ଜମି ଅଧିଗ୍ରହଣରେ ବିଳମ୍ବ ଆଉ ବରଦାସ୍ତ କରାଯିବନି । ଯେତେ ଶୀଘ୍ର ପାରୁଛ, ଦଖଲକୁ ଜମି ଆଣ । ଏକାମ୍ର ପ୍ରକଳ୍ପ କାମ ତ୍ୱରାନ୍ୱିତ କର । ବିଭାଗୀୟ ସରକାରୀ ଅଧିକାରୀଙ୍କୁ ଏମିତି ତାଗିଦ କରିଛନ୍ତି ବିଏମ୍ସି କମିଶନର ରାଜେଶ ପ୍ରଭାକର ପାଟିଲ ।
ମଙ୍ଗଳବାର ବିଏମ୍ସି ମୁଖ୍ୟାଳୟରେ କମିଶନରଙ୍କ ଅଧ୍ୟକ୍ଷତାରେ ଏକାମ୍ର ପ୍ରକଳ୍ପର ସମୀକ୍ଷା ବୈଠକ ବସିଥିଲା । ଏଥିରେ ଜିଲ୍ଲା ପ୍ରଶାସନ ଏବଂ ଓବିସିସିର ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ । ବୈଠକରେ ଏକାମ୍ର ନିର୍ମାଣ କାର୍ଯ୍ୟ ସମ୍ପର୍କରେ ଆଲୋଚନା ହୋଇଥିଲା । ସରକାରୀ ଜମି ଅଧିଗ୍ରହଣ ସରିଥିବା ବେଳେ କିଛି ଘରୋଇ ଜମି ଅଧିଗ୍ରହଣ କରିବାକୁ ବାକି ଅଛି । ତେବେ ଏହାକୁ ତୁରନ୍ତ ସାରିବାକୁ କମିଶନର ନିର୍ଦ୍ଦେଶ ଦେଇଥିଲେ । ମୋଟ୍ ୪୬ ଏକର ସରକାରୀ ଜମିରେ ଏକାମ୍ର ପ୍ରକଳ୍ପ ନିର୍ମାଣ ଚାଲିଛି । ସେଥିମଧ୍ୟରେ ୨୫ ଏକର ଜମି ବେସରକାରୀ ରହିଛି। ବର୍ତ୍ତମାନ ସୁଦ୍ଧା ୮ ଏକର ବେସରକାରୀ ଜମି ଅଧିଗ୍ରହଣ ସରିଛି। ମନ୍ଥର ପ୍ରକଳ୍ପ କାର୍ଯ୍ୟକୁ ନେଇ କମିଶନର କ୍ଷୋଭ ପ୍ରକାଶ କରିଥିଲେ। ଉପସ୍ଥିତ ଅଧିକାରୀମାନଙ୍କୁ ଯୁଦ୍ଧକାଳୀନ ଭିତ୍ତିରେ କାମ ଆଗେଇ ନେବାକୁ ନିର୍ଦ୍ଦେଶ ଦେଇଥିଲେ।
