ଭୁବନେଶ୍ୱର୨୯/୦୭: ବୁଧବାର ହେବ ବିଏମ୍ସି କର୍ପୋରେସନ ବୈଠକ। ତା ପୂର୍ବରୁ ସୋମବାର କଣ୍ଟ୍ରାକ୍ଟସ ଷ୍ଟାଣ୍ଡିଂ କମିଟି ବୈଠକ ସରିଛି। ଏହି ବୈଠକ ବେଶ ସରଗରମ ରହିବ । ପରିମଳ ବିଭାଗ ଏସ୍ଆଇଙ୍କ ବଦଳିକୁ ନେଇ କର୍ପୋରେଟରମାନେ ହୋହଲ୍ଲା କରିବା ସମ୍ଭାବନା ରହିଛି । ବିଏମ୍ସିରେ ଏକାବେଳକେ ୬୭ ୱାର୍ଡର ଏସ୍ଆଇମାନଙ୍କୁ ପରିବର୍ତ୍ତନ କରାଯାଇଥିଲା । ଏହାକୁ ନେଇ କର୍ପୋରେଟରମାନେ ଆପତ୍ତି ଉଠାଇଥିଲେ । ବଦଳି ଆଦେଶ ରଦ୍ଦ କରିବାକୁ ନେଇ ଧାରଣାରେ ବସିଥିଲେ । ଆସନ୍ତା କର୍ପୋରେସନ ବୈଠକ ପୂର୍ବରୁ ମେଳି ବାନ୍ଧିଛନ୍ତି କର୍ପୋରେଟର । ବିଜେଡି, ବିଜେପି ଏବଂ ସ୍ୱାଧୀନ ଏକାଠି ହୋଇଛନ୍ତି । ଯଦି ବଦଳି ଆଦେଶ ପରିବର୍ତ୍ତନ କରାନଯାଏ ବୈଠକ ଅଚଳ କରିଦେବାକୁ ଚେତାବନୀ ଦେଇଛନ୍ତି ।
ଅଗଷ୍ଟ ଶେଷରେ ସ୍ୱାୟତ୍ତ ଶାସନ ଦିବସ । ବୈଠକରେ ନୂଆ ଯୋଜନା ସମ୍ପର୍କରେ ବିସ୍ତୃତ ଆଲୋଚନା ହେବାକୁ ସ୍ଥିର ହୋଇଥିଲା । ହେଲେ ଏହାକୁ ବିରୋଧ କରିବାକୁ କର୍ପୋରେଟରମାନେ ସଜବାଜ ହେଲେଣି । ଡେଙ୍ଗୁ ମଶା ପ୍ରସଙ୍ଗ ଉଠିବ । ଚଳିତ ମଶା ସଂଖ୍ୟା ବୃଦ୍ଧି ପାଉଛି । ହେଲେ ବିଏମ୍ସି ପକ୍ଷରୁ କୌଣସି ପଦକ୍ଷେପ ନିଆଯାଉନି । ଜନ ସଚେତନତା କାର୍ଯ୍ୟକ୍ରମ କରାଯାଉନି । ମଶା ଧୂଆଁ ବି ଠିକ୍ ଭାବରେ ଦିଆଯାଉନି । ସେହିପରି ସହରରେ ଲାଗି ରହିଥିବା ଜଳବନ୍ଦୀ ସମସ୍ୟା ଉଠାଇବାକୁ କର୍ପୋରେଟର ଏକାଠି ହୋଇଛନ୍ତି ।
