ପାରାଦୀପ,୨୩।୬: ନେହେରୁ ବଙ୍ଗଳା ପଥର ବନ୍ଧ ନିକଟରୁ ମତ୍ସଜୀବୀଙ୍କ ମୃତଦେହ ଉଦ୍ଧାର ହୋଇଛି । ବଜ୍ରପାତରେ ତାଙ୍କର ମୃତ୍ୟୁ ହୋଇଥିବା ସନ୍ଦେହ କରାଯାଉଛି । ସୂଚନାନୁସାରେ, ବୃନ୍ଦାବନ କଲୋନୀର ମତ୍ସଜୀବୀ ମିଥୁନ ବେହେରା ରବିବାର ସନ୍ଧ୍ୟାରେ ମାଛ ଧରିବା ପାଇଁ ନେହେରୁ ବଙ୍ଗଳା ପଥର ବନ୍ଧ ନିକଟକୁ ଯାଇଥିଲେ । ବର୍ଷା ଘଡ଼ଘଡ଼ି ମାରୁଥିବାରୁ ସ୍ତ୍ରୀ ସବିତା ବେହେରା ତାଙ୍କୁ ନ ଯିବା ଲାଗି ବାରଣ କରିଥିଲେ । ସ୍ତ୍ରୀ ବାରଣ କରିବା ସତ୍ତ୍ୱେ ମିଥୁନ ରାତିରେ ନେହେରୁ ବଙ୍ଗଳା ପଥର ବନ୍ଧ ନିକଟକୁ ଆସି ବନିସି ପକାଇ ମାଛ ଧରିଥିଲେ । ବିଳମ୍ବିତ ରାତିରେ ବଜ୍ରପାତରେ ତାଙ୍କର ମୃତ୍ୟୁ ହୋଇଥିବା ସନ୍ଦେହ କରାଯାଉଛି । ମୃତ ମିଥୁନଙ୍କର ଗୋଟେ ପୁଅ ଓ ଦୁଇ ଝିଅ ଥିବା ଜଣାପଡ଼ିଛି ।
ସୋମବାର ସକାଳୁ ପଥର ବନ୍ଧ ନିକଟରେ ଏକ ସାଇକଲ ଥୁଆ ହୋଇଥିବା ସ୍ଥାନୀୟ ଲୋକେ ଦେଖିଥିଲେ । ସେଠାକୁ ଯାଇ ଦେଖିବା ବେଳକୁ ବେଳକୁ ପଥର ସନ୍ଧିରେ ଜଣେ ଯୁବକଙ୍କ ମୃତଦେହ ପଡ଼ିଥିବା ଦେଖିବାକୁ ପାଇଲେ । ପରେ ସଙ୍ଗେ ସଙ୍ଗେ ପୁଲିସକୁ ଏନେଇ ଖବର ଦେଇଥିଲେ । ଘଟଣାସ୍ଥଳରେ ପାରାଦୀପ ସାମୁଦ୍ରିକ ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି ।
