ପର୍ଥ,୨୧/୧୧: ସମୟ ପାଖେଇ ଆସୁଛି । ଆଉ ମାତ୍ର ଦିନକ ପରେ ଆରମ୍ଭ ହେବ ଗୁରୁତ୍ୱପୂର୍ଣ୍ଣ ବର୍ଡର-ଗାଭାସ୍କର ଟ୍ରଫି ଟେଷ୍ଟ ସିରିଜ । ଅପ୍ଟସ ଷ୍ଟାଡିୟମ୍ରେ ଉଭୟ ଦଳ ଅଭ୍ୟାସ କରୁଛନ୍ତି । ଏପଟେ କ୍ୟୁରେଟର ପିଚ୍ ପ୍ରସ୍ତୁତ କରିବାରେ ବ୍ୟସ୍ତ । ସେପଟେ ଭାରତ ଏକାଦଶ ଚୂଡ଼ାନ୍ତ କରିବା ପାଇଁ ଜୋରଦାର ପରୀକ୍ଷା ନିରୀକ୍ଷା ଚଳାଇଛି ।
ପ୍ରଥମ ଟେଷ୍ଟ ପାଇଁ ପ୍ରସ୍ତୁତ କରାଯାଇଥିବା ପିଚ୍ ୱାକା ଗ୍ରାଉଣ୍ଡର ପିଚ୍ ଭଳି ପେସ୍ ବୋଲରଙ୍କୁ ସହାୟତା କରିବ । ଏହି ପିଚ୍ରେ ବହଳିଆ ଘାସର ଆବରଣ ରହିବ ବୋଲି କ୍ୟୁରେଟର ସ୍ପଷ୍ଟ କରିଛନ୍ତି । ତେଣୁ ପେସ୍ ବୋଲରମାନେ ଦିନ ତମାମ ବଲ୍କୁ ସୁଇଂ କରାଇପାରିବେ । ତଥାପି ପାରମ୍ପରିକ ୱାକା ପିଚ୍ ଭଳି ଏଠାରେ ପିଚ୍ ଫାଟିବ ନାହିଁ । ତେଣୁ ବ୍ୟାଟରଙ୍କୁ ବିଶେଷ ସଂଘର୍ଷ କରିବାକୁ ପଡ଼ିବ ନାହିଁ । କ୍ରିଜ୍ରେ ଥରେ ଜମିଗଲେ ଓ ବଲର ଗତି ଓ ବାଉନ୍ସ ସହ ଖାପ ଖୁଆଇ ନେଲେ ରନ୍ ସଂଗ୍ରହ ସହଜ ହୋଇଯିବ ।
ସୂଚନାଯୋଗ୍ୟ, ୱାକା ଗ୍ରାଉଣ୍ଡ୍ରେ ଟେଷ୍ଟ ମ୍ୟାଚ୍ ସମୟରେ ଦ୍ୱିତୀୟ କିମ୍ବା ତୃତୀୟ ଦିନ ଆଡକୁ ପିଚ୍ରେ ଫାଟ ସୃଷ୍ଟି ହୋଇଥାଏ । ଫଳରେ ଏହି ଫାଟରେ ବଲ୍ ପଡ଼ିବା ମାତ୍ରେ ଖେଳିବା କଷ୍ଟକର ହୋଇଯାଏ । ଏଥର ପର୍ଥରେ ଅଦିନିଆ ବର୍ଷା ହେଉଥିବାରୁ ପିଚ୍କୁ ସେଭଳି ଶୁଷ୍କ ରଖିବା କଷ୍ଟକର ହୋଇଯାଉଛି । ପିଚ୍ରେ ପାଖା ପାଖି ୧୦ମିଲି ମିଟର ଉଚ୍ଚ ଘାସ ରହିଛି । ଜଳବାୟୁରେ ଆଦ୍ରତା ଯୋଗୁଁ ପିଚରେ ଫାଟ ସୃଷ୍ଟି ହେବ ନାହିଁ ବୋଲି କ୍ୟୁରେଟର ପ୍ରକାଶ କରିଛନ୍ତି ।
ଫୋକସ୍ରେ ପେସ ବୋଲିଂ
ବିଭାଗ ପ୍ରଥମ ଟେଷ୍ଟ ପାଇଁ ଭାରତ ବର୍ତ୍ତମାନ ଏକାଦଶ ପ୍ରସ୍ତୁତ କରିବାରେ ବ୍ୟସ୍ତ ରହିଛି । ଅଧିନାୟକ ରୋହିତ ଶର୍ମା ଅଷ୍ଟ୍ରେଲିଆରେ ପହଞ୍ଚି ନଥିବାବେଳେ ଶୁଭମନ ଗିଲ ଆହତ ହୋଇ ବାଦ ପଡ଼ିଛନ୍ତି । ଫଳରେ ବ୍ୟାଟିଂ ବିଭାଗରେ ବଡ଼ ପରିବର୍ତ୍ତନ ନିଶ୍ଚିତ ରହିଛି । ପେସ୍ ବୋଲିଂ ବିଭାଗରେ ମଧ୍ୟ ପରିବର୍ତ୍ତନ ନିଶ୍ଚିତ । ପ୍ରଥମ ଟେଷ୍ଟରେ ଭାରତର ୨ଜଣ ଖେଳାଳି ପଦାର୍ପଣ କରିବେ ବୋଲି ଜଣା ପଡ଼ିଛି । ବ୍ୟାଟିଂ ବିଭାଗ ଏକ ପ୍ରକାର ଚୂଡ଼ାନ୍ତ ହୋଇ ସାରିଛି । କେଏଲ ରାହୁଲ ଓପନର ଓ ଦେବଦତ୍ତ ପାଡ଼ିକଲ ୩ନଂ ସ୍ଥାନରେ ବ୍ୟାଟିଂ କରିବେ । ସେହିପରି ଫର୍ମରେ ଥିବା ଧ୍ରୁବ ଜୁରେଲଙ୍କୁ ୬ନଂ ସ୍ଥାନ ମିଳିବ । ବ୍ୟାଟିଂ ବିଭାଗର ସବୁ ସଦସ୍ୟ ଟେଷ୍ଟ ପଦାର୍ପଣ କରିସାରିଛନ୍ତି । ତେଣୁ ବୋଲିଂ ବିଭାଗ ଉପରେ ବର୍ତ୍ତମାନ ନଜର । ଅଲ୍ରାଉଣ୍ଡର ନୀତିଶ କୁମାର ରେଡ୍ଡୀ ପଦାର୍ପଣ କରିବାର ଯଥେଷ୍ଟ ସମ୍ଭାବନା ରହିଛି । କିନ୍ତୁ ଅନ୍ୟ ଯୁବ ପେସ୍ ବୋଲର ହର୍ଷିତ ରାଣାଙ୍କୁ ଖେଳାଇବାକୁ ଯୋଜନା ହେଉଛି । ସେ ଖେଳିଲେ ଆକାଶ ଦୀପ ଏକାଦଶରୁ ବାଦ ପଡ଼ିବେ ।
ନୀତିଶଙ୍କ ଉପରେ ଗୁରୁ ଦାୟିତ୍ୱ: ମୋର୍କେଲ ୨୧ ବର୍ଷୀୟ ଯୁବ ଅଲ୍ରାଉଣ୍ଡର ନୀତିଶ କୁମାର ରେଡ୍ଡୀ ପ୍ରଥମ ଟେଷ୍ଟ ଖେଳିବା ଏକ ପ୍ରକାର ନିଶ୍ଚିତ ହୋଇସାରିଥିବା ବୋଲିଂ କୋଚ୍ ମର୍ଣ୍ଣ ମୋର୍କେଲଙ୍କ ମନ୍ତବ୍ୟରୁ ସ୍ପଷ୍ଟ ହୋଇ ଯାଇଛି । ନୀତିଶଙ୍କ ଉପରେ ପେସ୍ ବୋଲିଂ ବିଭାଗ ନିର୍ଭର କରିବ ବୋଲି ମୋର୍କେଲ ଆଜି ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ପ୍ରକାଶ କରିଛନ୍ତି । ତାଙ୍କ ଦକ୍ଷତା ଉପରେ ଦଳ ଭରସା ରଖିଥିବା ମୋର୍କେଲ ସ୍ପଷ୍ଟ କରିଦେଇଛନ୍ତି ।
ସେ କହିଛନ୍ତି, ପ୍ରତ୍ୟେକ ଦଳ ପେସ୍ ବୋଲିଂ ଅଲ୍ରାଉଣ୍ଡର ଆବଶ୍ୟକ କରନ୍ତି । ନୀତିଶଙ୍କ ଦକ୍ଷତା ବେଶ ପ୍ରଭାବିତ କରିଛି । ତାଙ୍କ ବ୍ୟାଟିଂ ବେଶ୍ ଚମତ୍କାର । ବଲ୍କୁ ନିର୍ମମ ପ୍ରହାର କରିବାର କ୍ଷମତା ତାଙ୍କ ନିକଟରେ ରହିଛି । ଏହା ବ୍ୟତୀତ ନିୟମିତ ଭାବେ ଗୋଟିଏ ଲାଇନ ଓ ଲେଙ୍ଗ୍ଥରେ ସେ ଲମ୍ବା ସ୍ପେଲ୍ ପକାଇ ପାରିବେ । ନୀତିଶଙ୍କ ଉପସ୍ଥିତି ଦଳର ବାକି ମୁଖ୍ୟ ପେସ ବୋଲରଙ୍କୁ ବିଶ୍ରାମ ସମୟ ଯୋଗାଇ ପାରିବ । ସେହିପରି ହର୍ଷିତ ନିୟମିତ ଭାବେ ୧୪୦କିଲୋ ମିଟର ପ୍ରତି ଘଣ୍ଟା ବେଗରେ ବୋଲିଂ କରୁଛନ୍ତି । କେବଳ ସେତିକି ନୁହେଁ, ସେ ପିଚ୍ରୁ ଅତିରିକ୍ତ ବାଉନ୍ସ ପାଉଛନ୍ତି । ତେଣୁ ତାଙ୍କ ବୋଲିଂ ଦଳରେ ବିଭିନ୍ନତା ଆଣିବ ।
ଟସ୍ ପୂର୍ବରୁ ଗିଲଙ୍କ ଉପରେ ନିଷ୍ପତ୍ତି: ମୋର୍କେଲ ଇନ୍ଟ୍ରା ସ୍କ୍ୱାଡ ମ୍ୟାଚ୍ରେ ଆହତ ହୋଇଥିବା ଶୁଭମନ ଗିଲ ଧିରେ ଧିରେ ସୁସ୍ଥ ହେଉଥିବା ମୋର୍କେଲ ପ୍ରକାଶ କରିଛନ୍ତି । ସେ କହିଛନ୍ତି, ଗିଲଙ୍କ ଚିକିତ୍ସା ଉପରେ ଧ୍ୟାନ ରଖାଯାଇଛି । ଧିରେ ଧିରେ ତାଙ୍କ ଆଙ୍ଗୁଳିରୁ ଯନ୍ତ୍ରଣା କମୁଛି ଓ ସେ ସୁସ୍ଥ ହେଉଛନ୍ତି । ଟସ୍ ପର୍ଯ୍ୟନ୍ତ ତାଙ୍କୁ ଅପେକ୍ଷା କରାଯିବ । ଆଜି ଗିଲ୍ ଅଭ୍ୟାସ ଶିବିରରେ ଯୋଗ ଦେଇଥିଲେ ଓ ହାଲକା ୱାର୍ମ ଅପ୍ କରିଥିଲେ । ନେଟ୍ସରେ ବ୍ୟାଟିଂ କରିନଥିଲେ । କେବଳ ସାଥୀ ଖେଳାଳି ଓ କୋଚମାନଙ୍କ ସହ ଆଲୋଚନା କରି ହୋଟେଲକୁ ଫେରି ଯାଇଥିଲେ ।
ଖଲିଲ ଆହତ, ଦୟାଲଙ୍କୁ ଡାକରା
ଭାରତୀୟ ଦଳର ରିଜର୍ଭ ଖେଳାଳି ଭାବେ ଅଷ୍ଟ୍ରେଲିଆ ଯାତ୍ରା କରିଥିବା ବାମ ହାତି ପେସ୍ ବୋଲର ଖଲିଲ ଅହମ୍ମଦ ଆହତ ହୋଇଛନ୍ତି । ଫଳରେ ତାଙ୍କ ସ୍ଥାନରେ ଉତ୍ତର ପ୍ରଦେଶର ବାମ ହାତି ପେସ୍ ବୋଲର ୟଶ ଦୟାଲଙ୍କୁ ଡାକରା ମିଳିଛି । ସେ ଭାରତୀୟ ଟି-ଟ୍ୱେଣ୍ଟି ଦଳରେ ସ୍ଥାନ ପାଇ ଦକ୍ଷିଣ ଆଫ୍ରିକା ଯାତ୍ରା କରିଥିଲେ । ମାତ୍ର ସେଠାରେ ତାଙ୍କୁ ଖେଳିବାକୁ ସୁଯୋଗ ମିଳିନଥିଲା । ଏପଟେ ଖଲିଲ ଆହତ ହେବା ଫଳରେ ଦୟାଲଙ୍କୁ ଅଷ୍ଟ୍ରେଲିଆ ଯିବାକୁ ନିର୍ଦ୍ଦେଶ ମିଳିଥିଲା । ସେ ସିଧା ଜୋହାନ୍ସବର୍ଗରୁ ପର୍ଥ ଅଭିମୁଖେ ଯାତ୍ରା କରିଛନ୍ତି । ସୂଚନାଯୋଗ୍ୟ, ଅଷ୍ଟ୍ରେଲିଆର ମିଚେଲ ଷ୍ଟାର୍କଙ୍କ ପାଇଁ ପ୍ରସ୍ତୁତ ହେବା ଉଦ୍ଦେଶ୍ୟରେ ଖଲିଲଙ୍କୁ ଭାରତୀୟ ଦଳ ସହ ଅଷ୍ଟ୍ରେଲିଆ ପଠା ଯାଇଥିଲା । ସେ ଅଭ୍ୟାସ ବେଳେ ଆହତ ହୋଇଥିଲେ । ତେଣୁ ତାଙ୍କ ସ୍ଥାନରେ ଅନ୍ୟ ବାମ ହାତି ବୋଲର ଦୟାଲଙ୍କୁ ଡାକରା ମିଳିଛି ।
