ଭବାନୀପାଟଣା,୧୫।୬: କଳାହାଣ୍ଡି ଜିଲ୍ଲା ସଦର ଥାନା ଅନ୍ତର୍ଗତ ଭବାନୀପାଟଣା-କେସିଙ୍ଗା ୨୬ନଂ ଜାତୀୟ ରାଜପଥସ୍ଥିତ ପାଷ୍ଟିକୁଡି-ବେଲାମାଲ ବୁଳାଣିରେ ଟ୍ରକ୍ ଚାପାରେ ଜନୈକ ଯୁବକଙ୍କ ମୃତ୍ୟୁ ହୋଇଛି । ମୃତ ଯୁବକ ଜଣକ ପାଷ୍ଟିକୁଡି ପଂଚାୟତ ଠେମରା ଗ୍ରାମର ତୁଳସୀ ମେହେର(୨୦) ।
ରବିବାର ଗୋଟାଏ ସମୟରେ ଯୁବକ ଜଣକ ବାଇକରେ ଭବାନୀପାଟଣା ଠାରୁ ନିଜ ଗାଁକୁ ଫେରୁଥିଲେ । ବେଳାମାଲ ବୁଲାଣି ନିକଟରେ ପଛପଟୁ ଦ୍ରୁତଗତିରେ ଆସୁଥିବା ଏକ ଟ୍ରକ ବାଇକ୍ ଉପରକୁ ମାଡ଼ି ଯାଇଥିଲା । ଫଳରେ ଘଟଣା ସ୍ଥଳରେ ହିଁ ତୁଳସୀଙ୍କ ମୃତ୍ୟୁ ହୋଇଥିଲା । ଭବାନୀପାଟଣା ସଦର ପୁଲିସ୍ ଘଟଣା ସ୍ଥଳରେ ପହଂଚି ଶବ ଜବତ କରିଥିଲା । ଭବାନୀପାଟଣା ସହୀଦ ରେଣ୍ଡୋ ମାଝୀ ମେଡିକାଲରେ ଶବ ବ୍ୟବଚ୍ଛେଦ ପରେ ମୃତକଙ୍କ ସଂପର୍କିୟଙ୍କୁ ମରଶୀରର ହସ୍ତାନ୍ତର କରାଯାଇଛି । ଏନେଇ ସଦର ଥାନାରେ ଏକ ମାମଲା ରୁଜୁ ହୋଇଛି।
ମୃତକଙ୍କ ସମ୍ପର୍କୀୟମାନଙ୍କ କହିବା ଅନୁସାରେ ତୁଳସୀ ଓ ତାଙ୍କ ସାନ ଭଉଣୀ ଦୁହେଁ ଗାଁରେ ରହୁଥିଲେ । ତାଙ୍କ ବାପା ମାଆ ମହାରାଷ୍ଟ୍ରକୁ ରହି କାମ କରୁଛନ୍ତି । ତୁଳସୀଙ୍କ ମୃତ୍ୟୁ ପରେ ତାଙ୍କ ସାନ ଭଉଣୀ ଏକା ପଡିଯାଇଛନ୍ତି । ତୁଳସୀଙ୍କ ମୃତ୍ୟୁରେ ଗାଁ ସ୍ତବ୍ଦ ହୋଇଯାଇଛି ।
ମିଳିଥିବା ତଥ୍ୟ ଅନୁସାରେ ଗତ ୨୦୨୨ ରୁ ବର୍ତ୍ତମାନ ସୁଦ୍ଧା ଭବାନୀପାଟ-କେସିଙ୍ଗା ନ୍ଏଚ୍ର କେବଳ ବେଲାମାଲ ବୁଲାଣି ସ୍ଥାନରେ ୫୪ଟି ସଡ଼କ ଦୁର୍ଘଟଣା ହୋଇଥିବା ଜଣାପଡିଛି । ଏହି ସଡ଼କ ଦୁର୍ଘଟଣାଗୁଡ଼ିକରେ ୧୫ ଜଣଙ୍କ ମୃତ୍ୟୁ ହୋଇଛି ଏବଂ ଶତାଧିକ ଗୁରୁତର ହୋଇଛନ୍ତି । ଏହା ସରକାରୀ ତଥ୍ୟ କହୁଛି । ମାତ୍ର ସ୍ଥାନୀୟ ଲୋକଙ୍କ କହିବା ଅନୁସାରେ ପ୍ରତି ଦିନ ଛୋଟବଡ଼ ଦୁର୍ଘଟଣା ସେହି ସମାନ୍ ସ୍ଥାନରେ ହେଉଥିବା ଦେଖାଯାଉଛି । ପୁର୍ବରୁ ଏହି ସ୍ଥାନଟିକୁ କଳାହାଣ୍ଡି ଜିଲ୍ଲାପ୍ରଶାସନ ତଥା ଜିଲ୍ଲା ସଡ଼କ ସୁରକ୍ଷା କମିଟି ପକ୍ଷରୁ ବ୍ଲାକ୍ ସ୍ପଟ୍ ବୋଲି ଚିହ୍ନଟ କରାଯାଇଥିଲା । ସଡ଼କ ଦୁର୍ଘଟଣା ରୋକିବା ପାଇଁ ବିଭିନ୍ନ ପଦକ୍ଷେପ ନେବାକୁ ଏନ୍ଏଚ୍ , ପୂର୍ତ୍ତ ବିଭାଗ ଓ ଅଞ୍ଚଳିକ ପରିବହନ ବିଭାଗକୁ ଜିଲ୍ଲାପାଳ ନିର୍ଦ୍ଦେଶ ଦେଇଥିଲେ । ମାତ୍ର ସାଧାରଣ ସିଗ୍ନାଲ୍ କିମ୍ବା ବ୍ଲାକ୍ ସ୍ପଟ୍ ବୋଲି ବୋର୍ଡ ଟିଏ ମଧ୍ୟ ସଂଯୋଗ ହୋଇପାରିଲା ନାହିଁ । ଯାହାକି ଏବେ ମରଣଯନ୍ତା ପାଲଟିଛି । ଏହି ସ୍ଥାନରେ ରାସ୍ତା ନିର୍ମାଣରେ ତୃଟି ରହିଥିବା କୁହାଯାଉଛି । ଅଧିକ ଚିକ୍କଣ ଓ ବୁଲାଣି ଥିବାରୁ ଦୃତଗତିରେ ଯାତାୟତ ଯାନବାହାନ ପ୍ରାୟତଃ ଭାରସାମ୍ୟ ହରାଉଥିବା କୁହାଯାଉଛି ।
