ଭୁବନେଶ୍ୱର ୨୪/୦୬: ବକ୍ସ ଅଫିସ୍ରେ ବାବୁସାନ୍ଙ୍କ ରାଜ୍ । କ୍ରମାଗତ ଭାବେ ‘ଦମନ', ‘ପାବାର୍' ପରେ ଏବେ ‘ବୋଉ ବୁଟୁ ଭୂତ'ର ଅବିଶ୍ୱସନୀୟ ସଫଳତା । ବକ୍ସ ଅଫିସ୍ରେ ସବୁ ରେକର୍ଡ ଭାଙ୍ଗି ବ୍ଲକ୍ବଷ୍ଟର୍ ସୁପର୍ହିଟ୍ ସହ ଇତିହାସ ରଚିଛି । ୧୧ ଦିନରେ ଆୟ ୧୦ କୋଟି ଟପିଛି । ଯାହା ସୁପର୍ଷ୍ଟାର୍ ବାବୁସାନ୍ଙ୍କୁ ‘ବକ୍ସ ଅଫିସ୍ କିଙ୍ଗ'ର ମାନ୍ୟତା ଦେଇଛି । ରଜ ଅବସରରେ ଜୁନ୍ ୧୨ରେ ମୁକ୍ତିଲାଭ କରିଥିଲା ବାବୁସାନ୍ଙ୍କ ଅଭିନୀତ ‘ବୋଉ ବୁଟୁ ଭୂତ' । ପ୍ରଥମ ଦିନ ୫୧.୨ ଲକ୍ଷ ଆୟ କରି ଏହା ଅନୁଭବଙ୍କ ‘କର୍ମ'ର ରେକର୍ଡକୁ ଭାଙ୍ଗିଥିଲା ଏବଂ ଓଡ଼ିଆ ସିନେମାରେ ଏତେ ଆୟ କରିବାର ଇତିହାସ ଲେଖିଥିଲା । ପରେ ‘ଦମନ'- ୭.୫ କୋଟି, ‘କର୍ମ’- ୬.୫୦ କୋଟି ଓ ‘ପାବାର୍’ - ୩.୫୦ କୋଟିରୁ ଅଧିକ ବେପାରର ରେକର୍ଡକୁ ଭାଙ୍ଗି ନୂଆ ରେକର୍ଡ ସ୍ଥାପନ କରିଛି । ଏମିତି ଗୋଟିଏ ପରେ ଗୋଟିଏ ସଫଳତାକୁ ଡେଇଁ ପ୍ରଥମ ସପ୍ତାହରେ ୭.୧୫ କୋଟିରେ ପହଞ୍ଚିଥିଲା । ୧୧ ଦିନରେ ୧୦ କୋଟିରୁ ଅଧିକ ଆୟ କରି ଓଡ଼ିଆ ଚଳଚ୍ଚିତ୍ର କ୍ଷେତ୍ରରେ ଏକ ସର୍ବକାଳୀନ ରେକର୍ଡ ବା କୀର୍ତ୍ତିମାନ ସ୍ଥାପନ କରିଛି ।
ବଡ଼ କଥା ହେଲା, ରିଲିଜ୍ର ୧୨ ଦିନ ମଧ୍ୟରେ ‘ବୋଉ ବୁଟୁ ଭୂତ' ଓଡ଼ିଶାରେ ସର୍ବଭାରତୀୟସ୍ତରର ସିନେମା ‘ପଠାନ୍’ର ଲାଇଫ୍ ଟାଇମ୍ କଲେକ୍ସନ୍ (୧୦.୪୦ କୋଟି) କୁ ବି କାଟିବ । କାରଣ ୧୧ ଦିନରେ ଏହାର ଆୟ ୧୦.୩୬ କୋଟିରୁ ଅଧିକ ରହିଛି । ଆଗାମୀ ଦିନରେ ୧୫ କୋଟି ଟପିବାରେ ବି ପ୍ରଥମ ଓଡ଼ିଆ ସିନେମା ହୋଇପାରେ । ଏହା ହେଲେ ଓଡ଼ିଶାରେ ଆୟ କରିଥିବା ‘ଯବାନ'- ୧୪.୭୫ କୋଟି, ‘କେଜିଏଫ୍-୨' - ୧୫.୨୫ କୋଟି ଓ ‘ବାହୁବଳୀ-୨'- ୧୫.୫୦ କୋଟି ବଳି ବଡ଼ ବ୍ଲକ୍ବଷ୍ଟର୍ ସିନେମାକୁ ବି ପଛରେ ପକାଇ ଦେବେ । ଏହାପରେ ଓଡ଼ିଶାରେ ୨୨ କୋଟି କମେଇଥିବା ରେକର୍ଡ ହୋଲ୍ଡର୍ ‘ପୁଷ୍ପା-୨’ ସହ ଲଢ଼ିବ । ଏବେ ତ ଅମିର ଖାନ୍ଙ୍କ ଅଭିନୀତ ହିନ୍ଦୀ ସିନେମା ‘ସୀତାରେ ଜମିନ୍ ପର୍'କୁ ବି ପଛରେ ଛାଡ଼ି ଦେଇଛି ‘ବୋଉ ବୁଟୁ ଭୂତ' ।
ଓଡ଼ିଶା ତଥା ବାହାରେ ୯୦ଟି ପ୍ରେକ୍ଷାଳୟରେ ମୁକ୍ତିଲାଭ କରିଥିବା ବେଳେ ୬୦୦ରୁ ଅଧିକ ଶୋ' ହାଉସ୍ଫୁଲ୍ ଯାଇଛି । ଆଗକୁ ଆହୁରି ଭଲ ପ୍ରଦର୍ଶନ କରିବ ବୋଲି ପ୍ରଯୋଜନା ସଂସ୍ଥା ଆଶା ରଖିଛି । ତେବେ ବେପାର ୧୦ କୋଟି ଟପିବା ପରେ ବାବୁସାନ୍ ସଫଳତାର ଶ୍ରେୟ ସମସ୍ତ ଓଡ଼ିଶାବାସୀ ଓ ଓଡ଼ିଆ ସିନେପ୍ରେମୀଙ୍କୁ ଦେଇଛନ୍ତି । ଏତେ ମାତ୍ରାରେ ଭଲପାଇବା ପାଇଁ ଦର୍ଶକଙ୍କୁ କୃତଜ୍ଞତା ଜଣାଇଛନ୍ତି । ସିନେମା ସହ ଜଡ଼ିତ ପ୍ରତ୍ୟେକଙ୍କୁ ଶ୍ରେୟ ଦେବା ସହ ଶୁଭେଚ୍ଛା ଜଣାଇଛନ୍ତି । ଏହା ଆଗାମୀ ଦିନରେ ଭଲ ସିନେମା କରିବାକୁ ନିର୍ମାତାମାନଙ୍କୁ ସାହସ ଦେବ ଏବଂ ପ୍ରେରଣା ଯୋଗାଇବ ବୋଲି ବାବୁସାନ୍ କହିଛନ୍ତି । ଏହି ଅବସରରେ ଫିଲ୍ମର ଟ୍ରେଲର୍ ୨.୦କୁ ରିଲିଜ୍ କରି ପ୍ରତିଶ୍ରୁତି ଦେଇଛନ୍ତି କି, ଆଗକୁ ପ୍ରଯୋଜନା ସଂସ୍ଥା ବହୁତ ଭଲ ଭଲ ସିନେମା ଭେଟି ଦେବ । ତେବେ ରଥଯାତ୍ରା ଆସୁଛି । ଯେଉଁମାନେ ଏପର୍ଯ୍ୟନ୍ତ ‘ବୋଉ ବୁଟୁ ଭୂତ' ଦେଖିନାହାନ୍ତି, ସେମାନେ ଟିକଟ୍ ବୁକ୍ କରି ଶୀଘ୍ର ଦେଖନ୍ତୁ ଏବଂ ଆହୁରି ଭଲ ପାଇବା ଦେଇ ଚାଲନ୍ତୁ ବୋଲି ବାବୁସାନ୍ କହିଛନ୍ତି ।
