ଭୁବନେଶ୍ୱର,୨୦/୧୦: ନାମୀ ସଂସ୍ଥାରେ ଚାକିରି କରାଇବା ବାହାନାରେ ଟଙ୍କା ମାଗୁଥିଲା । ଏମିତିକି ଫଟୋ ଭିଡିଓ ଭାଇରାଲ କରିଦେବାର ଧମକ ଦେଉଥିଲା । ପୁରୁଷ ବନ୍ଧୁଙ୍କ ଏଭଳି ବ୍ଲାକମେଲିଂ ସହିପାରିଲେନି । ଶେଷରେ ଜୀବନ ହାରିଲେ । ୟୁନିଟ୍-୮ ଦେବରାୟ କଲେଜ ନିକଟରେ ଜଣେ ଯୁବତୀ ଆତ୍ମହତ୍ୟା କରିଛନ୍ତି ।
ମୃତକ ହେଲେ ୨୨ ବର୍ଷୀୟା ରଶ୍ମିତା ଦାସ । ସେ ଦେବରାୟ କଲେଜ ନିକଟରେ ଏକ ଭଡ଼ା ଘରେ ରହୁଥିଲେ । ଶୁକ୍ରବାର ବିଳମ୍ବିତ ରାତିରେ ସେ ବେକରେ ଓଢ଼ଣି ଲଗାଇ ଝୁଲି ପଡିଥିଲେ । ନୂଆପଲ୍ଲୀ ଥାନା ପୁଲିସ ତାଙ୍କ ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲକୁ ପଠାଇଛି । ପୁଲିସ ୬୦/୨୪ରେ ଏକ ଅପମୃତ୍ୟୁ ମାମଲା ରୁଜୁ କରିଛି।
ରଶ୍ମିତାଙ୍କ ଘର ଜଗତସିଂହପୁର କର୍ତ୍ତୋଲ ଗାଁରେ । ସେ ୬ ମାସ ତଳେ ଚାକିରି ସନ୍ଧାନରେ ରାଜଧାନୀକୁ ଆସିଥିଲେ । ଦେବରାୟ କଲେଜ ନିକଟରେ ଏକ ଘରେ ଭଡ଼ାସୂତ୍ରରେ ରହୁଥିଲେ । କିଛି ଦିନ ତଳେ ସେ ଏକ ଘରୋଇ ସଂସ୍ଥାରେ ଚାକିରି ପାଇଥିଲେ । ଉକ୍ତ ସଂସ୍ଥାରେ ସପ୍ତାହେ ଧରି ତାଙ୍କର ତାଲିମ୍ ଚାଲିଥିଲା । ଚାକିରି ଖବର ଶୁଣି ତାଙ୍କ ପରିବାର ଲୋକ ଖୁସି ଥିଲେ । ଗତକାଲି ସନ୍ଧ୍ୟାରେ ସେ ରୁମ୍କୁ ଭିତରପଟୁ କିଳି ଦେଇଥିଲେ । ରଶ୍ମିତାଙ୍କ ରୁମ୍ ପାଖରେ ରହୁଥିବା ଅନ୍ୟଜଣେ ଯୁବତୀ ରାତି ୧୧ଟା ବେଳେ ତାଙ୍କୁ ବାରମ୍ବାର ଡାକିଥିଲା । କିନ୍ତୁ ରଶ୍ମିତା କବାଟ ଖୋଲି ନଥିଲେ । ରାତି ୨ଟା ବେଳେ ପୁଲିସ ଘଟଣାସ୍ଥଳରେ ପହଞ୍ଚି କବାଟ ଭାଙ୍ଗିଥିଲା । ରଶ୍ମିତାଙ୍କ ଝୁଲନ୍ତା ମୃତଦେହ ଦେଖି ପରିବାର ଲୋକଙ୍କୁ ଖବର ଦେଇଥିଲା । ଶନିବାର ସକାଳେ ତାଙ୍କ ପରିବାର ଲୋକ ଆସିବା ପରେ ମୃତଦେହକୁ ଖୋଲାଯାଇ କ୍ୟାପିଟାଲ ହସ୍ପିଟାଲ ନିଆଯାଇଥିଲା ।
ରଶ୍ମିତାଙ୍କ ପରିବାର ଲୋକଙ୍କ କହିବା ମୁତାବକ, ଅଜିତ ଦାସ ନାମକ ଜଣେ ଯୁବକଙ୍କ ସହ ତାଙ୍କର ୪ ବର୍ଷ ଧରି ପ୍ରେମ ଚାଲିଥିଲା । ଅଜିତ ବେଙ୍ଗାଲୁରୁରେ ଚାକିରି କରୁଛନ୍ତି । ଅଧିକାଂଶ ସମୟରେ ସେ ନାନା ବାହାନାରେ ରଶ୍ମିତାଙ୍କୁ ହଜାର ହଜାର ଟଙ୍କା ମାଗୁଥିଲା । ରଶ୍ମିତାଙ୍କ ନୂଆ ଚାକିରିରେ ଖୁସି ନଥିଲା । ବରଂ ବେଙ୍ଗାଲୁରୁରେ ଭଲ ଜାଗାରେ ଚାକିରି କରାଇବା ଲୋଭ ଦେଖାଇଥିଲା । ଏଥିପାଇଁ ୫ ଲକ୍ଷ ଟଙ୍କା ଡିମାଣ୍ଡ କରିଥିଲା । ରଶ୍ମିତାଙ୍କ ପରିବାର ଲୋକ ପୋଷ୍ଟାଲରେ ସଞ୍ଚିଥିବା ୭୦ ହଜାର ଟଙ୍କା ଅଜିତକୁ ଦେଇଥିଲେ । ତଥାପି ବାରମ୍ବାର ବାକି ଟଙ୍କା ମାଗୁଥିଲା । ନହେଲେ, ଫଟୋ ଭିଡିଓ ଭାଇରାଲ କରିବାର ଧମକ ଦେଉଥିଲା । ରଶ୍ମିତା ଏଥିପାଇଁ ମାନସିକସ୍ତରରେ ଭାଙ୍ଗି ପଡ଼ିଥିଲେ।
ସେପଟେ ପୁଲିସ କହିଛି, ଅଭିଯୋଗ ମୁତାବକ ତଦନ୍ତ ଚାଲିଛି । ମୃତକଙ୍କ ମୋବାଇଲ୍ ଫୋନ୍ ଓ ସୋସିଆଲମିଡିଆ ଆକାଉଣ୍ଟ ଯାଞ୍ଚ କରାଯାଉଛି । ଯଦି କିଛି ପ୍ରମାଣ ମିଳେ, ଆତ୍ମହତ୍ୟା ପାଇଁ ଉସ୍କେଇବା ଦଫା ଲାଗିବ । ପୁରୁଷବନ୍ଧୁଙ୍କୁ ଜେରା ପାଇଁ ଡକାଯିବ ।
