ନୂଆଦିଲ୍ଲୀ, ୨।୪: ସଂସଦର ଚାଲିଥିବା ବଜେଟ୍ ଅଧିବେଶନକୁ ନେଇ ଏକ ବଡ଼ ଖବର ସାମ୍ନାକୁ ଆସିଛି । ଗୁରୁବାର ଏହି ଅଧିବେଶନ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ହେବାର ସମ୍ଭାବନା ନାହିଁ । କାରଣ ମହିଳା ସଂରକ୍ଷଣକୁ କାର୍ଯ୍ୟକାରୀ କରିବା ଏବଂ ଲୋକସଭା ଆସନ ସଂଖ୍ୟା ବୃଦ୍ଧି କରିବା ପାଇଁ ସରକାର ଏପ୍ରିଲ୍ ତୃତୀୟ ସପ୍ତାହରେ ପୁଣି ଦୁଇରୁ ତିନି ଦିନ ପାଇଁ ସ୍ୱତନ୍ତ୍ର ବୈଠକ ଡକାଇବାକୁ ଯୋଜନା କରୁଛନ୍ତି । ସୂଚନା ଅନୁସାରେ, ଜାନୁଆରୀ ୨୮ରୁ ଆରମ୍ଭ ହୋଇଥିବା ଏହି ବଜେଟ୍ ଅଧିବେଶନ ଆଜି ଶେଷ ହେବାର ଥିଲା । କିନ୍ତୁ, ସରକାର ଏହାକୁ କିଛି ଦିନର ବିରତି ପରେ ପୁଣି ଥରେ ଆରମ୍ଭ କରିବାକୁ ଚାହୁଁଛନ୍ତି । ଲୋକସଭା ବାଚସ୍ପତି ଏବଂ ରାଜ୍ୟସଭା ଅଧ୍ୟକ୍ଷ ସଦନକୁ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ନକରି ଏକ ନିର୍ଦ୍ଦିଷ୍ଟ ତାରିଖ ପର୍ଯ୍ୟନ୍ତ ସ୍ଥଗିତ ରଖିପାରନ୍ତି । ଅଧିକାଂଶ ସମ୍ଭାବନା ରହିଛି ଯେ, ଏପ୍ରିଲ୍ ୧୬ରୁ ୧୮ ପର୍ଯ୍ୟନ୍ତ ଏହି ସ୍ୱତନ୍ତ୍ର ଆଲୋଚନା ଚାଲିବ ।
ଏହା ବି ପଢ଼ନ୍ତୁ... ଦିଲ୍ଲୀ ଦରବାରରେ ରୁଷ୍ ଉପ-ପ୍ରଧାନମନ୍ତ୍ରୀ: ରୁଷ୍ ସହ ବଢ଼ିବ ବାଣିଜ୍ୟ ଓ ରଣନୈତିକ ସମ୍ପର୍କ
୮୧୬କୁ ବୃଦ୍ଧି ପାଇବ ଲୋକସଭା ଆସନ !
ସରକାରଙ୍କ ମୁଖ୍ୟ ଲକ୍ଷ୍ୟ ହେଉଛି 'ନାରୀ ଶକ୍ତି ବନ୍ଦନ ଅଧିନିୟମ'ରେ ଆବଶ୍ୟକ ସଂଶୋଧନ କରି ଏହାକୁ ତୁରନ୍ତ କାର୍ଯ୍ୟକାରୀ କରିବା । ନୂତନ ରୂପରେଖ ଅନୁସାରେ ଲୋକସଭା ଆସନ ସଂଖ୍ୟା ୫୪୩ରୁ ବୃଦ୍ଧି ପାଇ ୮୧୬ ହୋଇପାରେ । ଏହି ୮୧୬ଟି ଆସନ ମଧ୍ୟରୁ ୨୭୩ଟି ଆସନ ମହିଳାଙ୍କ ପାଇଁ ସଂରକ୍ଷିତ ରହିବ । ସରକାରଙ୍କ ଯୁକ୍ତି ହେଉଛି ଯେ, ଯଦି ୨୦୨୯ ନିର୍ବାଚନରେ ମହିଳା ସଂରକ୍ଷଣ ଲାଗୁ କରିବାର ଅଛି, ତେବେ ପରିସୀମା ନିର୍ଦ୍ଧାରଣ କମିଶନ ତୁରନ୍ତ ଗଠନ କରିବାକୁ ପଡ଼ିବ । ଅନ୍ୟପଟେ ବିରୋଧୀ ଦଳଗୁଡ଼ିକ ବିଧାନସଭା ନିର୍ବାଚନ ପରେ ଏହି ବିଲ୍ ଆଣିବାକୁ ଏବଂ ସର୍ବଦଳୀୟ ବୈଠକ ଡକାଇବାକୁ ଦାବି କରୁଛନ୍ତି ।
ଗୃହମନ୍ତ୍ରୀଙ୍କ ଆଲୋଚନା ଏବଂ ସହମତି:
ସମ୍ବିଧାନ ସଂଶୋଧନ ବିଲ୍ ଆଣିବା ପୂର୍ବରୁ ଗୃହମନ୍ତ୍ରୀ ଅମିତ ଶାହ ଏନଡିଏର ସହଯୋଗୀ ଦଳ ଏବଂ କିଛି ଆଞ୍ଚଳିକ ବିରୋଧୀ ଦଳର ନେତାମାନଙ୍କ ସହ ଆଲୋଚନା କରି ସହମତି ସୃଷ୍ଟି କରିବାକୁ ଚେଷ୍ଟା କରୁଛନ୍ତି । ଯଦିଓ ଏପର୍ଯ୍ୟନ୍ତ କୌଣସି ସରକାରୀ ବିବୃତ୍ତି ଜାରି କରାଯାଇନାହିଁ, ତଥାପି ଏପ୍ରିଲ୍ ମାସରେ ସଂସଦରେ ଏକ ବଡ଼ ହଲଚଲ୍ ଦେଖିବାକୁ ମିଳିବ ।
