ଭଦ୍ରକ,୨୩।୪ : ହାଇକୋର୍ଟଙ୍କ ନିର୍ଦ୍ଦେଶକୁ ଅଣଦେଖା କରିବା ସହିତ ବିନା ନୋଟିସରେ ସ୍ଥିତିବାନ ସଂପତ୍ତିରେ ପ୍ରଶାସନ ପକ୍ଷରୁ ଚାଲିଲା ବୁଲଡୋଜର। ଆଉ ଉଜାଡି ଦେଲା ଏକାଧିକ ପରିବାରଙ୍କ ପରିବା ଚାଷ । ଏପରି ଅଭିଯୋଗ ଆଣିଛନ୍ତି ଭଦ୍ରକ ଜିଲ୍ଲା ବନ୍ତ ତହସିଲ ଅଧୀନ ଗୋବିନ୍ଦପୁର ଗ୍ରାମର ଏକାଧିକ ପରିବାର।
ସୂଚନା ଅନୁଯାୟୀ ଗ୍ରାମର କିଛି ଗୋଚର ଜମିକୁ କେତେକ ମୁଷ୍ଟିମେୟ ଲୋକ ଜବରଦଖଲ କରିଥିବା ଅଭିଯୋଗ ହୋଇଥିଲା । ଯାହାକୁ ନେଇ ହାଇକୋର୍ଟ ସଂପୃକ୍ତ ଗୋଚର ଜମିକୁ ଜବର ଦଖଲ ମୁକ୍ତ କରିବାକୁ ନିର୍ଦ୍ଦେଶ ଦେଇଥିଲେ। ବନ୍ତ ତହସିଲର ଏକ ଟିମ ପୋଲିସ ଉପସ୍ଥିତରେ ଗୋଚର ଜମିରୁ ଜବର ଦଖଲ ଉଛେଦ ପାଇଁ ପହଞ୍ଚିଥିଲା ।
ମାତ୍ର ଗୋଚର ଜମି ପରିବର୍ତ୍ତେ ଗ୍ରାମର କେତେକ ପରିବାର ଲୋକଙ୍କ ସ୍ଥିତିବାନ ଜମି ଉପରେ ବୁଲଡୋଜର ଚଲାଇ ବାଡ଼ ଭାଙ୍ଗିବା ସହିତ ଚାଷକୁ ନଷ୍ଟ କରିଦେଇଥିବା ଆୟୋଜିତ ସାମ୍ବାଦିକ ସମ୍ମିଳନୀରେ ଅଭିଯୋଗ ହୋଇଛି । ତହସିଲ କର୍ତ୍ତୃପକ୍ଷଙ୍କ ଏକତରଫା କାର୍ଯ୍ୟକୁ ବିରୋଧ କରିବା ସହିତ ଜାତୀୟ ମାନବାଧିକାର କମିସନ, ରାଜ୍ୟ ମାନବାଧିକାର କମିସନରଙ୍କ ସମେତ ମୁଖ୍ୟମନ୍ତ୍ରୀଙ୍କ ଦ୍ବାରସ୍ଥ ହୋଇଛନ୍ତି କ୍ଷତିଗ୍ରସ୍ତ ପରିବାର । ତୁରନ୍ତ ସେମାନଙ୍କୁ କ୍ଷତି ପୂରଣ ଦେବାକୁ ଦାବୀ କରିଛନ୍ତି ।
