ନୂଆଦିଲ୍ଲୀ: ପର୍ତ୍ତୁଗାଲର ସଂସଦରେ ସାର୍ବଜନୀନ ସ୍ଥାନରେ ବୁର୍ଖା ଏବଂ ନିକାବ ପିନ୍ଧିବା ଉପରେ ରୋକ ଲଗାଇବାକୁ ନେଇ ଏକ ବିଲ ପାସ ହୋଇଛି । ଦକ୍ଷିଣପନ୍ଥୀ ଦଳ ଚେଗା ଦ୍ୱାରା ଏହି ବିଲ୍ ଆଗତ କରାଯାଇଥିଲା । ତେବେ ଏହାକୁ ରାଷ୍ଟ୍ରପତିଙ୍କ ଅନୁମୋଦନ ମିଳିବା ପରେ ଆଇନ୍ରେ ପରିଣତ ହେବ ।
ଏହି ଆଇନ ଅନୁଯାୟୀ, ସାର୍ବଜନୀନ ସ୍ଥାନରେ ବୁର୍ଖା ପିନ୍ଧିଥିବା ଯେକୌଣସି ମହିଳାଙ୍କୁ ୨୦,୦୦୦ ରୁ ୪ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନା ହୋଇପାରେ। ଏହା ବ୍ୟତୀତ, ଯଦି କେହି କାହାକୁ ବୁର୍ଖା ପିନ୍ଧିବାକୁ ବାଧ୍ୟ କରିବାକୁ ଚେଷ୍ଟା କରନ୍ତି ତେବେ ତାଙ୍କୁ ତିନି ବର୍ଷ ପର୍ଯ୍ୟନ୍ତ ଜେଲଦଣ୍ଡ ହୋଇପାରେ।
ବିମାନରେ, ଧାର୍ମିକ ସ୍ଥଳରେ ଏବଂ ଦୂତାବାସରେ ବୁର୍ଖା ପିନ୍ଧିବାକୁ ଅନୁମତି ରହିବ। ରାଷ୍ଟ୍ରପତି ମାର୍ସେଲୋ ରେବେଲୋ ଡି ସୌସା ଏପର୍ଯ୍ୟନ୍ତ ବିଲ୍ ଉପରେ ସ୍ୱାକ୍ଷର କରିନାହାନ୍ତି। ସେ ଏହା ଉପରେ ଆପତ୍ତି ଉଠାଇ ପାରିବେ କିମ୍ବା ତଦନ୍ତ ପାଇଁ କୋର୍ଟକୁ ପଠାଇ ପାରିବେ। ଯଦି ସେ ବିଧେୟକ ଉପରେ ହସ୍ତାକ୍ଷର କରନ୍ତି, ତେବେ ଏହା ଆଇନ୍ରେ ପରିଣତ ହୋଇଯିବ ।
ସଂସଦରେ ବିତର୍କ ସମୟରେ, କିଛି ବାମପନ୍ଥୀ ମହିଳା ସାଂସଦ ଏହି ନିୟମକୁ ବିରୋଧ କରିଥିଲେ ଏବଂ 'ଚେଗା' ଦଳର ନେତା ଆଣ୍ଡ୍ରେ ଭେଣ୍ଟୁରାଙ୍କ ସହ ଯୁକ୍ତିତର୍କ କରିଥିଲେ । କିନ୍ତୁ ଅନ୍ୟ ଦକ୍ଷିଣପନ୍ଥୀ ଦଳଗୁଡ଼ିକର ସମର୍ଥନରେ ବିଧେୟକ ପାସ ହୋଇଥିଲା ।
ଶାସକ ଦଳର ସାଂସଦ ଆଣ୍ଡ୍ରିଆ ନେଟୋ କହିଛନ୍ତି, ‘ଏହି ନିୟମ ପୁରୁଷ ଏବଂ ମହିଳାଙ୍କ ମଧ୍ୟରେ ସମାନତା ପାଇଁ। କାହାକୁ ମୁହଁ ଘୋଡ଼ାଇ ରଖିବାକୁ ବାଧ୍ୟ କରାଯିବା ଉଚିତ୍ ନୁହେଁ।’
ସେପଟେ ଏହି ବିଲକୁ ରାଷ୍ଟ୍ରପତିଙ୍କ ଅନୁମତି ମିଳିବା ପରେ ପର୍ତ୍ତୁଗାଲ ୟୁରୋପୀୟ ଦେଶ ଅଷ୍ଟ୍ରିଆ, ଫ୍ରାନ୍ସ, ବେଲଜିୟମ ଏବଂ ନେଦରଲ୍ୟାଣ୍ଡ ଭଳି ଦେଶଙ୍କ ତାଲିକାରେ ସାମିଲ ହୋଇଯିବ । ଏହି ସବୁ ଦେଶରେ ସଂପୂର୍ଣ୍ଣ କିମ୍ବା ଆଂଶିକ ଭାବରେ ବୁର୍କା ଏବଂ ନିକାବ ଉପରେ ରୋକ ଲାଗିଛି ।
