ଠାକୁରମୁଣ୍ଡା,୦୫/୦୫: ଘୋଡା ଘାଟିରେ ଓଏସଆରଟିସି ବସ୍ ସହିତ ଏକ ନୂଆ ହାଇୱା ମୁହାଁମୁହିଁ ଧକ୍କା ହୋଇଛି । ଏହି ଦୁର୍ଘଟଣାରେ ୧୮ଜଣରୁ ଉର୍ଦ୍ଧ୍ୱ ଆହତ ହୋଇଥିବା ବେଳେ ୨ ଚାଳକ ଚାପି ହୋଇ ରହିଛନ୍ତି। ଡ୍ରାଇଭର ଦ୍ୱୟ କ୍ଷେତ୍ରମୋହନ ମହାନ୍ତ, ବିଶାଲ ନାଏକ ବୋଲି ଜଣାପଡ଼ିଛି। ମୟୂରଭଞ୍ଜ ଜିଲ୍ଲା ଠାକୁରମୁଣ୍ଡା ବ୍ଲକ ମହୁଲଡିହା ଥାନା ଅନ୍ତର୍ଗତ ୫୩ନଂ ରାଜ୍ୟ ରାଜପଥ ଘୋଡା ଘାଟିରେ ଏହି ଦୁର୍ଘଟଣା ଘଟିଛି।
ସୂଚନା ମୁତାବକ, ଏକ ଓଏସଆରଟିସି ବସ୍ ଶାଳଚୁଆରୁ ଯାତ୍ରୀଙ୍କୁ ନେଇ ଠାକୁରମୁଣ୍ଡା ଅଭିମୁଖେ ଆସୁଥିଲା। ଟାଟାରୁ ଏକ ହାଇୱା ଠାକୁରମୁଣ୍ଡା ଦେଇ ବିଜୟୱାଡା ଯାଉଥିଲା। ଠାକୁରମୁଣ୍ଡା ବ୍ଲକ ମହୁଲଡିହା ଥାନା ଅନ୍ତର୍ଗତ ୫୩ନଂ ରାଜ୍ୟ ରାଜପଥ ଘୋଡା ଘାଟିରେ ହାଇୱାଟି ଭାରସାମ୍ୟ ହରାଇ ବସ୍କୁ ଧକ୍କା ଦେଇଥିଲା। ଫଳରେ ବସ୍ରେ ଥିବା ୧୮ ଜଣ ଯାତ୍ରୀ ଗୁରୁତର ଆହତ ହେବା ସହିତ ୨ ଡ୍ରାଇଭର ଚାପି ହୋଇ ରହିଥିଲେ। ଖବର ପାଇ ପୋଲିସ ବାହିନୀ ସହ ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ କରିଥିଲେ। ଘଟଣା ବିଷୟରେ ଅନୁଧ୍ୟାନ କରିବାକୁ ଠାକୁରମୁଣ୍ଡା ବିଡ଼ିଓ ସ୍ଵପ୍ନେଶ୍ଵର ବେହେରା ,ତହସିଲଦାର ସମ୍ବିତ କୁମାର କର ଏବଂ ମହୁଲଡିହା ଥାନା ଅଧିକରୀ ଅଶୋକ କୁମାର ପହି, ଏଏସଆଇ ସଂଜୟ ନାୟକ ଘଟଣାସ୍ଥଳରେ ପହଞ୍ଚିଥିଲେ ।
ଜେସିବି ଦ୍ଵାରା ଚାପି ହୋଇ ରହିଥିବା ୨ ଡ୍ରାଇଭର କ୍ଷେତ୍ର ମୋହନ ମହାନ୍ତ ଓ ବିଶାଲ ନାଏକଙ୍କୁ ଉଦ୍ଧାର କରାଯାଇଥିଲା। ୧୮ ଜଣ ଗୁରୁତର ଆହତଙ୍କୁ ଥାନା ଗାଡି ଏବଂ ୩ଟି ଆମ୍ବୁଲାନ୍ସ ଯୋଗେ ସାତକୋଶିଆ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ଗୁରୁତରମାନଙ୍କୁ ଆନନ୍ଦପୁର ଉପଖଣ୍ଡ ଚିକିତ୍ସାଳୟକୁ ଚିକିତ୍ସା ପାଇଁ ସ୍ଥାନାନ୍ତର କରାଯାଇଛି । ପୋଲିସ ମାମଲା ରୁଜୁ କରି ଅନୁସନ୍ଧାନ ଜାରି ରଖିଛି । ତେବେ ହାଇୱାଟି ବସ୍କୁ ଧକ୍କା ଦେଇଥିବା ପ୍ରାଥମିକ ତଦନ୍ତରୁ ଜଣାପଡିଛି ।
