ବଡ଼ବିଲ, ୨୪/୦୬ : କେନ୍ଦୁଝର ଜିଲ୍ଲା ଯୋଡ଼ା ଥାନା କଣ୍ଡ୍ରା ଟୋଲ୍ ପ୍ଲାଜା ନିକଟରେ ମର୍ମନ୍ତୁଦ ଦୁର୍ଘଟଣା। ଟ୍ରକ୍କୁ ପିଟିଲା କନ୍ୟାଯାତ୍ରୀ ବସ୍। ଜଣେ ମୃତ ୧୩ ଗୁରୁତର ଆହତ। ସୋମବାର ମଧ୍ୟରାତ୍ରୀରେ ଏହି ମର୍ମନ୍ତୁଦ ଦୁର୍ଘଟଣା ଘଟିଛି। ମୃତକ ଜଣକ ବସ୍ର ହେଲ୍ପର୍ ବୋଲି ଜଣାପଡ଼ିଛି।
ସୂଚନାନୁଯାୟୀ, ରବିବାର ଯୋଡ଼ା ଥାନା ବଳିତା ଗ୍ରାମର ଭରତ ନାଏକଙ୍କ ଝିଅ ସୁଲେଖା ନାଏକଙ୍କ ବିବାହ ବାଂଶପାଳ ବ୍ଲକ ନାୟାକୋଟ ଥାନା ଜାଗର ଗାଁର ସୁରେଶ ନାଏକଙ୍କ ସହିତ ସମ୍ପନ୍ନ ହୋଇଥିଲା । ସୋମବାର ଦିନ କନ୍ୟାଘର ପକ୍ଷରୁ ୫୦ରୁ ଅଧିକ କନ୍ୟାଯାତ୍ରୀ ଏକ ବସ୍ ଯୋଗେ ବର ଘରକୁ ଯାଇଥିଲେ । ସେଠାରୁ ଭୋଜି ଖାଇ ଫେରିବା ବେଳେ ମଧ୍ୟରାତ୍ରୀରେ କଣ୍ଡ୍ରା ଟୋଲ୍ ପ୍ଲାଜା ପାରହେବା ପରେ ବସ୍ଟି ରାସ୍ତା କଡ଼ରେ ଠିଆ ହୋଇଥିବା ଏକ ଟ୍ରକ୍ ପଛରେ ଜୋରଦାର୍ ଧକ୍କା ଦେଇଥିଲା। ଏହି ଦୁର୍ଘଟଣାରେ ବସ୍ର ହେଲ୍ପର୍ଙ୍କ ମୃତ୍ୟୁ ହୋଇଥିବା ବେଳେ ୧୩ ଜଣ ଗୁରୁତର ଆହତ ହୋଇଥିଲେ। ଖବର ପାଇ ଯୋଡ଼ା ଥାନା ପୁଲିସ ଓ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଗୁରୁତରଙ୍କୁ ଉଦ୍ଧାର କରି ନିକଟସ୍ଥ ବାସୁଦେବପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ପଠାଇଥିଲେ। ଜଣଙ୍କ ଅବସ୍ଥା ସଙ୍କଟାପନ୍ନ ଥିବାରୁ ତାଙ୍କୁ କେନ୍ଦୁଝର ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ଆହତଙ୍କ ମଧ୍ୟରେ ମହିଳା ଓ ଛୋଟ ପିଲାମାନେ ରହିଛନ୍ତି। ଦୁର୍ଘଟଣା ପରେ ବସ୍ ଡ୍ରାଇଭର ଘଟଣା ସ୍ଥଳରୁ ଫେରାର ହୋଯାଇଥିବା କୁହାଯାଉଛି। ଯୋଡ଼ା ପୁଲିସ ଘଟଣାର ତଦନ୍ତ ଚଳାଇଛି।
