ନୂଆଦିଲ୍ଲୀ, ୨୪/୦୪ : ଆମ ପେଟ ଯେକୌଣସି ମତେ ପୁରିଯିବ, ହେଲେ ଦେଶ ଆଗ। ଅଟାରୀ-ୱାଘା ବର୍ଡରରୁ ବ୍ୟବସାୟୀଙ୍କ ଖୋଲା ସମର୍ଥନ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନିଷ୍ପତ୍ତିକୁ ସମର୍ଥନ କଲେ ବ୍ୟବସାୟୀ। ଅଟାରୀ-ୱାଘା ସୀମାରେ ଥିବା ସମନ୍ୱିତ ଚେକ୍ ପୋଷ୍ଟ ବନ୍ଦ ନିଷ୍ପତ୍ତିକୁ ନେଇ ଢାବା ଚଳାଉଥିବା ବ୍ୟବସାୟୀ ମଞ୍ଜିତ ସିଂହ କହିଛନ୍ତି ଯେ, ଆମ ବ୍ୟାପାର ଯେକୌଣସି ମତେ ଚଳିଯିବ। ହେଲେ ପହଲଗାମରେ ଯାହା ହେଲା, ତାହା ଭୁଲ୍ ଥିଲା। ଯବାନଙ୍କ ଉପରେ ଆକ୍ରମଣ ଗୋଟେ କଥା, କାରଣ ସେମାନେ ଜବାବ ଦେବା ଜାଣିଛନ୍ତି। ହେଲେ ପର୍ଯ୍ୟଟକଙ୍କ ଉପରେ ଆକ୍ରମଣ ସମ୍ପୂର୍ଣ୍ଣ ଭୁଲ୍। ଯଦି ଆମ ବେପାରରେ ପର୍ଯ୍ୟଟକଙ୍କ ସଂଖ୍ୟା କମିଯିବ, ତାହେଲେ କିଛି କଥା ନାହିଁ। ଆମେ ଦେଶ ସାଥିରେ ଅଛୁ। ପ୍ରଧାନମନ୍ତ୍ରୀଙ୍କ ନିଷ୍ପତ୍ତି ସମ୍ପୂର୍ଣ୍ଣ ଠିକ୍। ସେହିପରି ଅନ୍ୟ ଜଣେ ସ୍ଥାନୀୟ ବ୍ୟବସାୟୀ କହିଛନ୍ତି ଯେ, ଛୋଟ ଛୋଟ ବେପାରୀଙ୍କ ପାଇଁ ଏହି ଚେକପୋଷ୍ଟ ପେଟ ପୋଷିବାର ମାଧ୍ୟମ ଥିଲା, କିନ୍ତୁ ଆଟାକ୍ ପରେ ସୁରକ୍ଷା ସର୍ବୋପରି।
ସୂଚନା ଥାଉକି, ଅଟାରି-ୱାଘା ବର୍ଡରରେ ସବୁଦିନ ସକାଳେ ଲୋକଙ୍କ ଲମ୍ବା ଧାଡ଼ି ଲାଗେ। ହେଲେ ଏହି ମାର୍ଗ ଏବେ ସମ୍ପୂର୍ଣ୍ଣ ବନ୍ଦ ହୋଇଯାଇଛି। ସ୍ଥାନୀୟ ଲୋକ ଏବଂ ବ୍ୟାପାରୀ ସରକାରଙ୍କ ନିଷ୍ପତ୍ତିକୁ ସମର୍ଥନ କରିଛନ୍ତି। ହେଲେ ଚିନ୍ତାର ବିଷୟ ଦୀର୍ଘ ଦିନ ପର୍ଯ୍ୟନ୍ତ ଚେକପୋଷ୍ଟ ବନ୍ଦ ରହିଲେ ସେମାନଙ୍କ ଜୀବନ ଜୀବିକା ଉପରେ ପ୍ରଭାବ ପଡ଼ିବ।
ଆତଙ୍କବାଦୀଙ୍କ ନରସଂହାର ପରେ ଭାରତ ପାକିସ୍ତାନ ଉପରେ ଆକ୍ସନ୍ ପରେ ଆକ୍ସନ୍ ନେଉଛି। ଅଟାରୀ-ୱାଘା ସୀମାରେ ଥିବା ସମନ୍ୱିତ ଚେକ୍ ପୋଷ୍ଟ (ଆଇସିପି)କୁ ତ୍ୱରିତ ଭିତ୍ତିରେ ସରକାର ବନ୍ଦ କରିଛନ୍ତି। ଭାରତ-ପାକିସ୍ତାନ ମଧ୍ୟରେ ଯାତାୟତ ଠପ୍ ହୋଇଯାଇଛି। ଏହି ନିଷ୍ପତ୍ତି ପରେ ବ୍ୟାପାର ପ୍ରଭାବିତ ହେବାର ଆଶଙ୍କା ବଢିଛି। ଏହି କରିଡର ବନ୍ଦ ହେବା ଯୋଗୁ ୩୮୦୦ କୋଟିର କାରବାର ପ୍ରଭାବିତ ହେବ ବୋଲି ଆକଳନ କରାଯାଇଛି ।
ଏହି ଖବରଟିକୁ ପଢନ୍ତୁ-ପହଲଗାମ୍ରେ ଆତଙ୍କବାଦୀ ହାମଲା ପରେ ଆକ୍ସନ୍: ୱାଘା- ଅଟାରୀ ସୀମା ବନ୍ଦ, ପ୍ରଭାବିତ ହେବ ୩୮୦୦ କୋଟିର କାରବାର
