ଲକ୍ଷ୍ନୌ: ଉତ୍ତରପ୍ରଦେଶର ଲକ୍ଷ୍ନୌରେ ଜଣେ ରିଅଲ ଇଷ୍ଟେଟ ବ୍ୟବସାୟୀ କରଜରେ ବୁଡ଼ି ଫେସବୁକ ଲାଇଭରେ ନିଜର ଆର୍ଥିକ ସଙ୍କଟ ବର୍ଣ୍ଣନା କରି ନିଜକୁ ଗୁଳି ମାରି ଆତ୍ମହତ୍ୟା କରିଛନ୍ତି। ଲାଇଭ ଭିଡିଓରେ ସେ କହିଥିଲେ ଯେ ସେ ତାଙ୍କ ଡାଇବେଟିସ ରୋଗୀ ଝିଅ ପାଇଁ ଜୀବନ ରକ୍ଷାକାରୀ ଇନସୁଲିନ ଇଞ୍ଜେକ୍ସନ କିଣିବାକୁ ମଧ୍ୟ ସକ୍ଷମ ନୁହନ୍ତି। ଏହାସହ ବ୍ୟବସାୟୀ ଜଣଙ୍କ ବହୁ ସମୟ କାକୁତିମିନତି ହେବା ପରେ ଏକ ରାଇଫଲ ବ୍ୟବହାର କରି ନିଜକୁ ଗୁଳି କରିଥିଲେ।
ଫେସବୁକ ଲାଇଭ ଭିଡିଓରେ ବ୍ୟବସାୟୀ ଜଣକ ସେଲିବ୍ରିଟି ଓ ଶିଳ୍ପପତିମାନଙ୍କୁ ତାଙ୍କ ପରିବାର ପାଇଁ ସାହାଯ୍ୟ କରିବାକୁ ଅପିଲ କରିଥିଲେ। ସେ କହିଥିଲେ ଯେ ବିପୁଳ କର୍ଜ ଓ ଆର୍ଥିକ ଦାୟିତ୍ୱର ଚାପ ସେ ଆଉ ବହନ କରିପାରୁ ନାହାନ୍ତି। ସେ ନିଜ ଝିଅର ଡାଇବେଟିସ ଚିକିତ୍ସା ପାଇଁ ଇନସୁଲିନ କିଣିବାରେ ଅସମର୍ଥତା ପ୍ରକାଶ କରି ଅତ୍ୟନ୍ତ ଭାଙ୍ଗି ପଡ଼ିଥିଲେ।
ପୁଲିସ ଦେଇଥିବା ସୂଚନା ଅନୁସାରେ, ତାଙ୍କ ପରିବାର ସଦସ୍ୟମାନେ ଫେସବୁକ ଲାଇଭ ଦେଖି ପୁଲିସକୁ ଖବର ଦେଇଥିଲେ ଓ ଘଟଣାସ୍ଥଳରେ ପହଞ୍ଚିଥିଲେ। କିନ୍ତୁ ତାଙ୍କ ପହଞ୍ଚିବା ପୂର୍ବରୁ ବ୍ୟବସାୟୀ ଜଣକ ନିଜକୁ ନିଜେ ଗୁଳି ମାରି ସାରିଥିଲେ। ତେବେ ବ୍ୟବସାୟି ଜଣଙ୍କ ନିଜ ଅଫିସରେ କାର୍ଯ୍ୟ କରୁଥିବା ସୁରକ୍ଷାକର୍ମୀଙ୍କ ବନ୍ଧୁକ ଯୋଗେ ଆତ୍ମହତ୍ୟା କରିଥିବା ଜଣାପଡିଛି।
ଏହି ଘଟଣା ସାମାଜିକ ଗଣମାଧ୍ୟମରେ ବ୍ୟାପକ ଚର୍ଚ୍ଚା ସୃଷ୍ଟି କରିଛି। ଯେଉଁଠାରେ ଅନେକ ଲୋକ ଆର୍ଥିକ ସଙ୍କଟ ଓ ମାନସିକ ସ୍ୱାସ୍ଥ୍ୟ ସମସ୍ୟା ଉପରେ ଆଲୋଚନା କରୁଛନ୍ତି। ଏହାସହ କେହି କେହି ଭାରତରେ ଇନସୁଲିନର ଉଚ୍ଚ ମୂଲ୍ୟ ଏବଂ ସ୍ୱାସ୍ଥ୍ୟସେବା ଉପରେ ପ୍ରଶ୍ନ ଉଠାଇ ସରକାରଙ୍କୁ ମଧ୍ୟ ଟାର୍ଗେଟ କରୁଛନ୍ତି।
ପୁଲିସ ଏକ ମାମଲା ଜାରି କରି ଏହି ଘଟଣାର ତଦନ୍ତ ଜାରି ରଖିଛି, କିନ୍ତୁ ବ୍ୟବସାୟୀଙ୍କ ପରିଚୟ ଏପର୍ଯ୍ୟନ୍ତ ଯାଏ ପ୍ରକାଶ କରାଯାଇ ନାହିଁ। ଏହାସହ ତାଙ୍କ ଅଫିସରେ କାର୍ଯ୍ୟରତ ସୂରକ୍ଷାକର୍ମୀଙ୍କୁ ମଧ୍ୟ ପୁଲିସ ନିଜ ହେପାଜତକୁ ନେଇଛି। ତେବେ ବ୍ୟବସାୟି ଜଣଙ୍କର ପରିବାର ଓ ତାଙ୍କ ସହଯୋଗୀମାନଙ୍କୁ ପୁଲିସ ପଚରାଉଚରା ଜାରି ରଖିଛି।
