ନୂଆଦିଲ୍ଲୀ,୨୦/୦୩: ୟୁନିଫାଏଡ୍ ପେମେଣ୍ଟ ଇଣ୍ଟର୍ଫେସ୍(ୟୁପିଆଇ)କୁ ପ୍ରୋତ୍ସାହିତ କରିବା ପାଇଁ କେନ୍ଦ୍ର କ୍ୟାବିନେଟ ୟୁପିଆଇ ଇନ୍ସେଣ୍ଟିଭ୍ ସ୍କିମ୍କୁ ଆଉ ବର୍ଷେ ବଢ଼ାଇ ଦେଇଛି । ଏ ସ୍କିମ୍ ୨୦୨୬ ମାର୍ଚ୍ଚ ୩୧ ଯାଏ ଜାରି ରହିବ ଏବଂ ଏହା ଉପରେ ପ୍ରାୟ ୧,୫୦୦ କୋଟି ଟଙ୍କା ଖର୍ଚ୍ଚ କରାଯିବ ।
କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ କ୍ୟାବିନେଟ ବୈଠକ ପରେ କହିଲେ ଯେ, ଏ ସ୍କିମ୍ରେ ରୁପେ ଡେବିଟ୍ କାର୍ଡ ଏବଂ ଭୀମ୍-ୟୁପିଆଇ ଜରିଆରେ ୨,୦୦୦ ଟଙ୍କା ପର୍ଯ୍ୟନ୍ତ ପର୍ସନ ଟୁ ମର୍ଚ୍ଚାଣ୍ଟ(ପି୨ଏମ୍) ଟ୍ରାଞ୍ଜାକ୍ସନ ଉପରେ କ୍ଷୁଦ୍ର ବ୍ୟବସାୟୀଙ୍କୁ ୦.୧୫% ଇନ୍ସେଣ୍ଟିଭ୍ ମିଳିବ । ପର୍ସନ ଟୁ ମର୍ଚ୍ଚାଣ୍ଟ ୟୁପିଆଇ ଟ୍ରାଞ୍ଜାକ୍ସନ ଅର୍ଥ ହେଉଛି ବ୍ୟବସାୟୀ ଏବଂ ଗ୍ରାହକଙ୍କ ମଧ୍ୟରେ କରାଯାଇଥିବା ୟୁପିଆଇ ଟ୍ରାଞ୍ଜାକ୍ସନ । ଏ ସ୍କିମ୍ ୨୦୨୧ ଏପ୍ରିଲ ୧ରୁ କାର୍ଯ୍ୟକାରୀ ହୋଇଛି । ରୁପେ ଡେବିଟ୍ କାର୍ଡକୁ ପ୍ରୋତ୍ସାହିତ କରିବା ଦ୍ୱାରା ଏହାର ସିଧାସଳଖ ପ୍ରଭାବ ଅନ୍ତର୍ଜାତୀୟ ପେମେଣ୍ଟ କମ୍ପାନି ଯେପରି ଭୀସା ଏବଂ ମାଷ୍ଟର୍କାର୍ଡ ଉପରେ ପଡ଼ିବ ।
ଯଦି ଜଣେ ଗ୍ରାହକ ୧୦୦୦ ଟଙ୍କାର ସାମଗ୍ରୀ କିଣୁଛନ୍ତି ଏବଂ ୟୁପିଆଇରେ ପେମେଣ୍ଟ କରନ୍ତି ତେବେ ଦୋକାନୀଙ୍କୁ ୧.୫ ଟଙ୍କାର ଇନ୍ସେଣ୍ଟିଭ୍ ମିଳିବ । ସେହିଭଳି ବ୍ୟାଙ୍କଗୁଡ଼ିକୁ ବି ଇନ୍ସେଣ୍ଟିଭ୍ ମିଳିବ। ସରକାର ବ୍ୟାଙ୍କଗୁଡ଼ିକର କ୍ଲେମ୍ର ୮୦% ରାଶିକୁ ତୁରନ୍ତ ପ୍ରଦାନ କରିବେ । ବ୍ୟାଙ୍କଗୁଡ଼ିକୁ ଅବଶିଷ୍ଟ ୨୦% ରାଶି ସେତେବେଳେ ମିଳିବ ଯେତେବେଳେ ବ୍ୟାଙ୍କଗୁଡ଼ିକର ପ୍ରଯୁକ୍ତିଗତ ତ୍ରୁଟି ୦.୭୫%ରୁ କମ୍ ହେବ ।
ପ୍ରକାଶଯୋଗ୍ୟ, ସରକାର ଡିଜିଟାଲ ପେମେଣ୍ଟ୍କୁ ତ୍ୱରାନ୍ୱିତ କରିବା ପାଇଁ କାର୍ଯ୍ୟ କରୁଛନ୍ତି । କେନ୍ଦ୍ରମନ୍ତ୍ରୀ କହିଲେ ଯେ, ସରକାରଙ୍କ ଲକ୍ଷ୍ୟ ହେଉଛି ୨୦୨୫-୨୬ରେ ୨୦,୦୦୦ କୋଟି ସଂଖ୍ୟକ ଟ୍ରାଞ୍ଜାକ୍ସନ ଲକ୍ଷ୍ୟ ପୂରଣ କରିବା । ଏହାସହିତ କ୍ଷୁଦ୍ର ସହର ଏବଂ ଗାଁ ପର୍ଯ୍ୟନ୍ତ ୟୁପିଆଇକୁ ପହଞ୍ଚାଇବା ଉଦ୍ଦେଶ୍ୟ ।
ପୂର୍ବରୁ ରୁପେ ଡେବିଟ୍ କାର୍ଡ ଏବଂ ଭୀମ୍-ୟୁପିଆଇ ଟ୍ରାଞ୍ଜାକ୍ସନ ଉପରେ ମର୍ଚ୍ଚାଣ୍ଟ ଡିସ୍କାଉଣ୍ଟ ରେଟ୍କୁ ‘ଶୂନ’ କରାଯାଇଥିଲା । ଏବେ ଏହି ଇନ୍ସେଣ୍ଟିଭ୍ ସ୍କିମ୍ ଦ୍ୱାରା କ୍ଷୁଦ୍ର ବ୍ୟବସାୟୀଙ୍କୁ ୟୁପିଆଇରେ ପେମେଣ୍ଟ ନେବା ପାଇଁ ଉତ୍ସାହିତ କରାଯିବ । କେନ୍ଦ୍ରମନ୍ତ୍ରୀ ଶ୍ରୀ ବୈଷ୍ଣବ କହିଲେ, ୟୁପିଆଇ ପେମେଣ୍ଟ ବ୍ୟବସାୟୀଙ୍କ ପାଇଁ ସହଜ, ସୁରକ୍ଷିତ ଏବଂ ଦ୍ରୁତ ପେମେଣ୍ଟ ସର୍ଭିସ । ଏହାସହିତ ବିନା କୌଣସି ଅତିରିକ୍ତ ଦେୟରେ ଟଙ୍କା ସିଧା ବ୍ୟାଙ୍କ ଖାତାକୁ ଆସିଥାଏ । ଚଳିତବର୍ଷ ଫେବ୍ରୁଆରୀରେ ଦେଶରେ ୧,୬୧୧ କୋଟି ସଂଖ୍ୟକ ୟୁପିଆଇ ଟ୍ରାଞ୍ଜାକ୍ସନ ହୋଇଛି । ଏହା ମାଧ୍ୟମରେ ମୋଟ ୨୧.୯୬ ଲକ୍ଷ କୋଟି ଟଙ୍କା ମୂଲ୍ୟର କାରବାର ହୋଇଥିବା ଜଣାପଡ଼ିଛି ।
