ନୂଆଦିଲ୍ଲୀ, ୮।୫: ସୋସିଆଲ ମିଡିଆ ପ୍ଲାଟଫର୍ମ ଫେସବୁକରେ ଲୋକଙ୍କୁ ଠକୁଥିବା ଠକଙ୍କ ବିରୁଦ୍ଧରେ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି ମେଟା । ମେଟା କହିଛି ଯେ, ଏହା ଭାରତ ଏବଂ ବ୍ରାଜିଲର ବ୍ୟବହାରକାରୀଙ୍କୁ ଟାର୍ଗେଟ କରୁଥିବା ୨୩ ହଜାରରୁ ଅଧିକ ନକଲି ଆକାଉଣ୍ଟ ଏବଂ ଫେସବୁକ ପେଜକୁ ହଟାଇଛି । ଠକମାନେ ଲୋକଙ୍କୁ ଠକିବା ପାଇଁ ପ୍ରସିଦ୍ଧ YouTubers, କ୍ରିକେଟର ଏବଂ ବ୍ୟବସାୟିକ ବ୍ୟକ୍ତିତ୍ୱଙ୍କ ନକଲି ଭିଡିଓ ତିଆରି କରିଥିଲେ । ଯେଉଁଥିରେ ଠକମାନେ ଏହି ଲୋକମାନେ କିଛି ନିବେଶ ଆପ୍ ଏବଂ ଜୁଆ ୱେବସାଇଟ ପ୍ରଚାର କରୁଥିଲେ । ପୂର୍ବରୁ, ସୋସିଆଲ ମିଡିଆ ପୋଷ୍ଟ ମାଧ୍ୟମରେ ଲୋକମାନଙ୍କୁ ‘ଶୀଘ୍ର ଟଙ୍କା ରୋଜଗାର କରନ୍ତୁ’ ଭଳି ଅଫର ଦିଆଯାଇ ଲୋକମାନଙ୍କୁ ପ୍ରଲୋଭଲ ଦେଖାଉଥିଲେ । ପରେ ସେମାନଙ୍କୁ ଚାଟିଂ ଆପ୍ସ, ଯେପରିକି ହ୍ବାଟ୍ସଆପ କିମ୍ବା ଟେଲିଗ୍ରାମକୁ ନିଆଯାଇ ନିବେଶ କରିବାକୁ ପରାମର୍ଶ ଦିଆଗଲା । ପରେ, ସେମାନଙ୍କୁ ଗୁଗୁଲ ପ୍ଲେ ଷ୍ଟୋର ପରି ଦେଖାଯାଉଥିବା ଏକ ନକଲି ଓ୍ବେବସାଇଟକୁ ପୁନଃନିର୍ଦ୍ଦେଶିତ କରାଯାଇଥିଲା, ସେଠାରୁ ସେମାନଙ୍କୁ ଜୁଆ କିମ୍ବା ନକଲି ନିବେଶ ଆପ ଡାଉନଲୋଡ କରିବାକୁ କୁହାଯାଉଥିଲା ।

ମେଟା କହିଛି ଯେ, ଏହି ଠକମାନେ ଲୋକମାନଙ୍କୁ ପ୍ରଚୁର ରିଟର୍ଣ୍ଣ ପ୍ରତିଶ୍ରୁତି ଦେଇ କ୍ରିପ୍ଟୋକରେନ୍ସି, ଷ୍ଟକ୍ ମାର୍କେଟ କିମ୍ବା ରିଅଲ ଇଷ୍ଟେଟ ଭଳି ନକଲି ଯୋଜନାରେ ଟଙ୍କା ନିବେଶ କରିବାକୁ ପ୍ରଲୋଭିତ କରନ୍ତି । କମ୍ପାନୀ ଏହା ମଧ୍ୟ କହିଛି ଯେ, ଫେସବୁକ ମାର୍କେଟପ୍ଲେସରେ ଅନେକ ଠକ ସକ୍ରିୟ ଥିଲେ, ଯେଉଁମାନେ ନିଜକୁ ପ୍ରକୃତ ବିକ୍ରେତା ଦର୍ଶାଇ ଲୋକଙ୍କଠାରୁ ଆଗୁଆ ଦେୟ ମାଗୁଥିଲେ । ଗୋଟିଏ କୌଶଳରେ, ଠକମାନେ ଜାଣିଶୁଣି କୌଣସି ଜିନିଷ ପାଇଁ ଅଧିକ ଟଙ୍କା ପଠାନ୍ତି ଏବଂ ପରେ ଟଙ୍କା ଫେରସ୍ତ ପାଇଁ ମାଗନ୍ତି । ପରେ ସେମାନେ ପ୍ରକୃତ ଦେୟ ବାତିଲ କରି ଉଭୟ ଟଙ୍କା ନେଇ ଚମ୍ପଟ ମାରନ୍ତି । ମେଟା କହିଛି ଯେ, ଏହା ଏବେ ସୋସିଆଲ ମିଡିଆ ପ୍ଲାଟଫର୍ମରେ ସତର୍କତା ବୃଦ୍ଧି କରୁଛି । ଯଦି କୌଣସି ଆକାଉଣ୍ଟ ସନ୍ଦେହଜନକ ମନେହୁଏ ତେବେ ଉପଭୋକ୍ତାଙ୍କୁ ଏକ ଚେତାବନୀ ଦିଆଯିବ ।