ସ୍ୱଚ୍ଛ ପାନୀୟ ଜଳ ପାଇଁ ପ୍ରାୟ ପ୍ରତ୍ୟେକ ଘରେ RO ୱାଟର ପ୍ୟୁରିଫାୟର ଲଗାଯାଉଛି। ଦାବି କରାଯାଉଛି ଯେ, ଏହି ପ୍ୟୁରିଫାୟରଗୁଡ଼ିକ ପାଣିରୁ ବ୍ୟାକ୍ଟେରିଆ, ଭାଇରସ ଏବଂ ଅନ୍ୟାନ୍ୟ ଅଶୁଦ୍ଧତା ଦୂର କରିଦିଏ, ଯାହା ଏହାକୁ ପିଇବା ପାଇଁ ନିରାପଦ କରିଥାଏ । ତଥାପି, ଅନେକ ଗବେଷଣା RO ପାଣିର ଅତ୍ୟଧିକ ବ୍ୟବହାରର ବିପଦ ବିଷୟରେ ଉଲ୍ଲେଖ କରିଛି । ଆସନ୍ତୁ ଜାଣିବା ଅତ୍ୟଧିକ RO ପାଣି ପିଇବା ଦ୍ୱାରା କେଉଁ ରୋଗର ଆଶଙ୍କା ବୃଦ୍ଧି ପାଏ? 

RO ଦ୍ୱାରା ପାଣି କିପରି ବିଶୁଦ୍ଧ କରାଯାଏ?

RO କିମ୍ବା ରିଭର୍ସ ଅସମୋସିସ୍ ହେଉଛି ଏକ ପ୍ରଯୁକ୍ତିବିଦ୍ୟା ଯେଉଁଥିରେ ପାଣିକୁ ଏକ ଅର୍ଦ୍ଧ-ପାରଗମ୍ୟ ପରଦା ମାଧ୍ୟମରେ ଛାଣି ପଠାଯାଏ । ଏହି ପରଦା ପାଣିରୁ ବ୍ୟାକ୍ଟେରିଆ, ଭାଇରସ, ଆର୍ସେନିକ୍, ସୀସା ଭଳି ଭାରୀ ଧାତୁ ଏବଂ ଅନ୍ୟାନ୍ୟ ଅଶୁଦ୍ଧତାକୁ ବାହାର କରିଦିଏ। ତଥାପି ଏହି ପ୍ରକ୍ରିୟାରେ କ୍ୟାଲସିୟମ, ମ୍ୟାଗ୍ନେସିୟମ, ପୋଟାସିୟମ ଏବଂ ସୋଡିୟମ ଭଳି ୯୨-୯୯% ଅତ୍ୟାବଶ୍ୟକୀୟ ଖଣିଜ ପଦାର୍ଥ ମଧ୍ୟ ପାଣିରୁ ବାହାର କରିଦିଆଯାଏ। ଏହି କାରଣରୁ RO ରୁ ମିଳୁଥିବା ପାଣିରେ TDS ସ୍ତର ବହୁତ କମ୍ ଥାଏ, ଯାହା କେତେକ ସମୟରେ ୫୦ ମିଲିଗ୍ରାମରୁ କମ୍ ହୋଇଯାଏ। WHO ଅନୁଯାୟୀ, ପାନୀୟ ଜଳରେ TDSର ସର୍ବନିମ୍ନ ସ୍ତର ଲିଟର ପିଛା ୧୦୦ ମିଲିଗ୍ରାମ ହେବା ଉଚିତ । ଯାହା ଦ୍ୱାରା ଅତ୍ୟାବଶ୍ୟକୀୟ ଖଣିଜ ପଦାର୍ଥ ମିଳିପାରିବ।

RO ପାଣିର ଲାଭ-

RO ରୁ ମିଳୁଥିବା ସ୍ୱଚ୍ଛ ପାଣି ସପକ୍ଷରେ ଅନେକ ଯୁକ୍ତି ରହିଛି । ଡାକ୍ତରଙ୍କ ମତ ଅନୁଯାୟୀ, RO ପ୍ରଯୁକ୍ତିବିଦ୍ୟା ପାଣିରୁ ସୀସା, ଆର୍ସେନିକ୍ ଏବଂ କ୍ଲୋରିନ୍ ଭଳି କ୍ଷତିକାରକ ପ୍ରଦୂଷକକୁ ଦୂର କରିବାରେ ପ୍ରଭାବଶାଳୀ। ଭାରତ ଭଳି ଦେଶରେ ଭୂତଳ ଜଳରେ ଭାରୀ ଧାତୁ ଏବଂ ପ୍ରଦୂଷଣ ରହିବା ସାଧାରଣ। ଏପରି ପରିସ୍ଥିତିରେ, RO ପାଣି ଡାଇରିଆ, କଲେରା ଏବଂ ଟାଇଫଏଡ୍ ଭଳି ଅନେକ ଜଳବାହୀ ରୋଗକୁ ରୋକିପାରିବ। RO ପାଣିର ସ୍ୱାଦ ମଧ୍ୟ ଭଲ ହୋଇଥାଏ କାରଣ ଏହା ଦୁର୍ଗନ୍ଧ ଏବଂ ମଇଳା ଦୂର କରିଥାଏ। 

RO ପାଣିର ସମ୍ଭାବ୍ୟ ଅସୁବିଧା-

RO ପାଣିର ଶୁଦ୍ଧତା ଉପରେ କୌଣସି ବିବାଦ ନାହିଁ, କିନ୍ତୁ ଅନେକ ଗବେଷଣା ଏହାର ଅତ୍ୟଧିକ ବ୍ୟବହାରର ବିପଦ ବିଷୟରେ ଉଲ୍ଲେଖ କରିଛି। WHO ୨୦୧୯ରେ କହିଥିଲା ଯେ, ଲଗାତାର ଖଣିଜ ପଦାର୍ଥ ନଥିବା ପାଣି ପିଇବା ସ୍ୱାସ୍ଥ୍ୟ ପାଇଁ କ୍ଷତିକାରକ ହୋଇପାରେ। ଏହା ଅନେକ ପ୍ରକାରର ରୋଗ ସୃଷ୍ଟି କରିପାରେ।

ଖଣିଜ ଅଭାବ: RO ପାଣି ହାଡ଼, ହୃତପିଣ୍ଡ ଏବଂ ମାଂସପେଶୀ ପାଇଁ ଆବଶ୍ୟକ କ୍ୟାଲସିୟମ ଏବଂ ମ୍ୟାଗ୍ନେସିୟମ ଭଳି ଖଣିଜ ପଦାର୍ଥକୁ ଦୂର କରିଦିଏ। ଡାକ୍ତରଙ୍କ ମତ ଅନୁଯାୟୀ, ଆମେ ଖାଦ୍ୟରୁ ଅଧିକାଂଶ ପୋଷକ ତତ୍ତ୍ୱ ପାଇଥାଉ, କିନ୍ତୁ ପାଣିରେ ଥିବା ଖଣିଜ ପଦାର୍ଥ ମଧ୍ୟ ଗୁରୁତ୍ୱପୂର୍ଣ୍ଣ । RO ପାଣି ନିରନ୍ତର ପିଇବା ଦ୍ୱାରା ପିଲାମାନଙ୍କ ହାଡ଼ ଭାଙ୍ଗିବା, ଗର୍ଭବତୀ ମହିଳାମାନଙ୍କ ସମୟ ପୂର୍ବରୁ ପ୍ରସବ ଏବଂ ବୟସ୍କମାନଙ୍କ ହୃଦରୋଗର ଆଶଙ୍କା ବଢ଼ିପାରେ। ଅନେକ ଅଧ୍ୟୟନରୁ ଜଣାପଡ଼ିଛି ଯେ, ପାଣିରେ କମ୍ ଟିଡିଏସ୍ ଏବଂ ହୃଦରୋଗ ମଧ୍ୟରେ ଏକ ସମ୍ପର୍କ ମିଳିଛି । ପ୍ରକୃତରେ ମ୍ୟାଗ୍ନେସିୟମ୍ ଅଭାବ ଉଚ୍ଚ ରକ୍ତଚାପ ଏବଂ ଅନିୟମିତ ହୃଦସ୍ପନ୍ଦନ ସୃଷ୍ଟି କରିପାରେ। 

କ୍ୟାଲସିୟମର ଅଭାବ ହାଡ଼କୁ ପ୍ରଭାବିତ କରିପାରେ। ଏକ ଅଧ୍ୟୟନରୁ ଜଣାପଡିଛି ଯେ ଯେଉଁ ପିଲାମାନେ RO ପାଣି ପିଅନ୍ତି ସେମାନଙ୍କ ହାଡ଼ ଭାଙ୍ଗିବାର ଆଶଙ୍କା ଅଧିକ ଥାଏ। ସେହିପରି RO ପାଣିର ସାମାନ୍ୟ ଏସିଡିକ୍ ପ୍ରକୃତି (PH ୬.୦-୬.୫) ପାଚନ ପ୍ରଣାଳୀକୁ ପ୍ରଭାବିତ କରିପାରେ।