ବୌଦ୍ଧ, ୧୨/୧୨: ବୌଦ୍ଧ ଜିଲ୍ଲାରେ ଅପରେସନ ଗ୍ରୀନ କ୍ଲିନ୍ ଅଭିଯାନ କୁ ପୋଲିସ ପକ୍ଷରୁ ଜୋରଦାର କରାଯାଇଛି । ଏହି ଅଭିଯାନରେ ଲଗାତାର ଭାବେ ଦୁଇ ଦିନରେ ୨୦ କୋଟି ଟଙ୍କାର ଗଞ୍ଜେଇ ଗଛ ପୋଡ଼ି ନଷ୍ଟ କରିଛି ପୋଲିସ। ବୌଦ୍ଧ ଆଦର୍ଶ ଥାନା, ମନମୁଣ୍ଡା ଥାନା ଓ ଘଣ୍ଟାପଡ଼ା ଥାନା ଅଞ୍ଚଳରେ ଅପରେସନ ଗ୍ରୀନ କ୍ଲିନ୍ କରିଛି ପୋଲିସ । ତିନୋଟି ଥାନା ଅଞ୍ଚଳରୁ ପ୍ରାୟ ୧୯୭ ଏକର ଜମିରୁ ୨ ଲକ୍ଷରୁ ଉର୍ଦ୍ଧ୍ବ ଗଞ୍ଜେଇ ଗଛକୁ କାଟିବା ସହିତ ତାକୁ ସମ୍ପୂର୍ଣ୍ଣ ଭାବରେ ପୋଡ଼ି ନଷ୍ଟ କରିଛି ପୋଲିସ।
ବୌଦ୍ଧ ଆଦର୍ଶ ଥାନା ପକ୍ଷରୁ ସାନବବଡା ଗ୍ରାମରୁ ୮୬ ଏକର ଜମିରେ ଚଢାଉ କରାଯାଇ ସେଠାରୁ ପ୍ରାୟ ୮୬ ହଜାରରୁ ଉର୍ଦ୍ଧ୍ବ ଗଞ୍ଜେଇ ଗଛ କାଟି ଥିବା ବେଳେ, ଘଣ୍ଟାପଡ଼ା ଥାନା ଲଣ୍ଡା ପଦର ଗ୍ରାମ ସଂରକ୍ଷିତ ଜଙ୍ଗଲରେ ଚଢାଉ କରି ୭୦ ଏକର ଜମିରୁ ପ୍ରାୟ ୬୯ ହଜାର ଗଞ୍ଜେଇ ଗଛ କଟା ଯାଇଥିବା ପୋଲିସ ସୂଚନା ଦେଇଛି । ସେହିପରି ମନମୁଣ୍ଡା ଥାନା ପଲଝାରି ଗ୍ରାମ ନିକଟରେ ଚଢାଉ କରି ୪୫ ଏକର ଜମିରୁ ପ୍ରାୟ ୫୨ ହଜାରରୁ ଉର୍ଦ୍ଧ୍ବ ଗଞ୍ଜେଇ ଗଛ କାଟି ତାକୁ ସମ୍ପୂର୍ଣ୍ଣ ଭାବେ ପୋଡ଼ି ନଷ୍ଟ କରାଯାଇଥିବା ସୂଚନା ମିଳିଛି। ତେବେ ଦୁଇ ଦିନରେ ନଷ୍ଟ ହୋଇଥିବା ଗଞ୍ଜେଇ ଗଛର ଆନୁମାନିକ ମୂଲ୍ୟ ପ୍ରାୟ ୨୦ କୋଟି ଟଙ୍କା ହେବା ନେଇ ଆକଳନ କରାଯାଇଛି।
