ଭୁବନେଶ୍ୱର,୨୫/୦୯: କ୍ୟାପିଟାଲ ହସ୍ପିଟାଲରେ ହଙ୍ଗାମା ଘଟଣାରେ କ୍ୟାପିଟାଲ ଥାନା ପୁଲିସ ଜଣେ ୟୁଟ୍ୟୁବରଙ୍କୁ ଗିରଫ କରିଛି । ସେ ହେଲେ, ଦୀପକ ନାୟକ । ଘର ଭଦ୍ରକ ଜିଲ୍ଲା ନଈକାଣ୍ଡହି ଥାନାର ପୁରୁଷୋତ୍ତମପୁର ଗାଁରେ । ତଦନ୍ତରୁ ଜଣାପଡ଼ିଛି ଯେ ଦୀପକ ଘଟଣାଦିନ ଲାଇଭ୍ ଭିଡିଓ କରି ଅଶ୍ରାବ୍ୟ ଭାଷାରେ ଗାଳିଗୁଲଜ କରିଥିଲେ । ଏମିତିକି ସୁରକ୍ଷାକର୍ମୀମାନଙ୍କୁ ମାରି ଦେବା ପାଇଁ ଅଟୋ ଡ୍ରାଇଭରମାନଙ୍କୁ ଉସକାଇଥିଲେ ।
କ୍ୟାପିଟାଲ ହସ୍ପିଟାଲରେ ଅଟୋ ଡ୍ରାଇଭରଙ୍କ ଆକ୍ରମଣରେ ସୁବ୍ରତ ବିଶ୍ୱାଳ ନାମକ ସୁରକ୍ଷାକର୍ମୀଙ୍କ ମୁଣ୍ଡ ଫାଟିଥିଲା । ସେ ଥାନାରେ କରିଥିବା ଲିଖିତ ଅଭିଯୋଗ ଅନୁସାରେ ଗତ ୨୨ ତାରିଖରେ ଶିଶୁ ଚିକିତ୍ସା ୱାର୍ଡରେ ଏକ ଶିଶୁର ମୃତ୍ୟୁ ପରେ ସ୍ମାର୍ଟ ସିଟି ଅଟୋ ଗ୍ରୁପର ଡ୍ରାଇଭରମାନେ କ୍ୟାପିଟାଲ ହସ୍ପିଟାଲରେ ହଙ୍ଗାମା କରୁଥିଲେ । ଶତାଧିକ ଅଟୋ ଡ୍ରାଇଭର ମଧ୍ୟାହ୍ଣ ୧ ଟାରେ ସୁବ୍ରତଙ୍କୁ ଆକ୍ରମଣ କରିବାକୁ ଉଦ୍ୟମ କରିଥିଲେ । ସେମାନେ ଶିଶୁ ୱାର୍ଡରୁ କାଜୁଆଲିଟି ଆଡ଼କୁ ଧାଉଁଥିବା ବେଳେ ଦୀପକ ସେମାନଙ୍କ ସହ ମିଶି ଦୌଡ଼ିଥିଲେ । ଫେସ୍ବୁକରେ ଲାଇଭ ଭିଡିଓ କରି ସୁବ୍ରତଙ୍କୁ ଇଙ୍ଗିତ କରି "ୟାକୁ ଜୀବନରୁ ମାରିଦିଅ" କହି ଅଟୋ ଡ୍ରାଇଭରମାନଙ୍କୁ ଉସୁକାଇଥିଲେ । ଏମିତିକି ଅଟୋ ଡ୍ରାଇଭରଙ୍କ ସହ ମିଶି ଦୀପକ ସୁବ୍ରତଙ୍କୁ ମାରଣାସ୍ତ୍ରରେ ଆକ୍ରମଣ କରିଥିଲେ । ଯାହା ଫଳରେ ତାଙ୍କ ମୁଣ୍ଡରେ ଗଭୀର ଆଘାତ ଲାଗି ପ୍ରଚୁର ରକ୍ତସ୍ରାବ ହୋଇଥିଲା । ଦୀପକ ଘଟଣାଦିନ ଅନ୍ୟ ହସ୍ପିଟାଲ କର୍ମଚାରୀଙ୍କୁ ଆକ୍ରମଣ କରିବା ସହ ଅଶ୍ରବ୍ୟ ଭାଷାରେ ଗାଳି କରିଥିଲେ । ପୁଲିସ ତଦନ୍ତରୁ ଜଣାପଡ଼ିଛି ଯେ, ଦୀପକ ନାଁରେ କ୍ୟାପିଟାଲ ଥାନାରେ ଆହୁରି ତିନୋଟି ମାମଲା ରୁଜୁ ହୋଇଛି । ବର୍ତ୍ତମାନ ଏହି ମାମଲାର ଅଧିକ ତଦନ୍ତ ଚାଲୁଛି ।
