ଖଲ୍ଲିକୋଟ,୦୪/୦୮: ଗଞ୍ଜାମ ଜିଲ୍ଲା ଖଲ୍ଲିକୋଟ ସହର ମଧ୍ୟରେ ସୋମବାର ଭୋରରୁ ଘଟିଛି ଦୁର୍ଘଟଣା । ଖଲ୍ଲିକୋଟ ସ୍ଥିତ ଶ୍ରୀ ଅରବିନ୍ଦ ପୂର୍ଣ୍ଣାଙ୍ଗ ଶିକ୍ଷାକେନ୍ଦ୍ର ନିକଟରେ ବିଦ୍ୟୁତ୍ ଖୁଣ୍ଟକୁ ଏକ କାର୍ ଧକ୍କା ଦେଇଥିବା ବେଳେ କାର୍ରେ ଡ୍ରାଇଭର ସହ ଅନ୍ୟ ଜଣେ ଗୁରୁତର ହୋଇଥିବା ଜଣାପଡ଼ିଛି। ଦୁଇ ଗୁରୁତର ପୁରୁଷୋତ୍ତମପୁର ଅରଖପୁର ଗାଁର କାହ୍ନୁ ଚରଣ ନାୟକ ଓ ଖଲ୍ଲିକୋଟ ଖୋଜାପଲ୍ଲୀ ଗାଁର ଜୟରାମ ସ୍ୱାଇଁ ବୋଲି ଜଣାପଡିଛି ।
ସୂଚନା ଅନୁଯାୟୀ, ସୋମବାର ଭୋର ପ୍ରାୟ ୪ ଟା ସମୟରେ ଏକ କାର୍ କୋଦଳା ପଟୁ ଖଲ୍ଲିକୋଟ ଅଭିମୁଖେ ଆସୁଥିଲା । ଏହି ସମୟରେ ହଠାତ କାର୍ଟି ଭାରସାମ୍ୟ ହରାଇ ଖଲ୍ଲିକୋଟ ସ୍ଥିତ ଅରବିନ୍ଦ ସ୍କୁଲ ନିକଟରେ ରାସ୍ତା କଡ଼ରେ ଥିବା ବିଦ୍ୟୁତ୍ ଖୁଣ୍ଟକୁ ଧକ୍କା ଦେଇଥିଲା । ଯାହା ଫଳରେ ବିଦ୍ୟୁତ ଖୁଣ୍ଟଟି ବଙ୍କା ହୋଇଯାଇଥିବା ବେଳେ କାର୍ଟିର ଅଗ୍ରଭାଗ କ୍ଷତିଗ୍ରସ୍ତ ହୋଇଛି । ଫଳରେ କାର୍ ଭିତରେ ଥିବା ଡ୍ରାଇଭର ସହ ଅନ୍ୟ ଜଣେ ଗୁରୁତର ହୋଇଥିଲେ । ତୁରନ୍ତ ଦୁହିଁଙ୍କୁ ଉଦ୍ଧାର କରାଯାଇ ଚିକିତ୍ସା ପାଇ ଖଲ୍ଲିକୋଟ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା । ସେଠାରେ ଜୟରାମଙ୍କୁ ପ୍ରାଥମିକ ଚିକିତ୍ସା କରାଯାଇ ତାଙ୍କୁ ବ୍ରହ୍ମପୁର ବଡ଼ ମେଡ଼ିକାଲକୁ ସ୍ଥାନାନ୍ତର କରାଯାଇଥିବା ବେଳେ କାହ୍ନୁ ଖଲ୍ଲିକୋଟ ମେଡ଼ିକାଲରେ ଚିକିତ୍ସାଧୀନ ଥିବା ସୂଚନା ମିଳିଛି । ଏହି ଘଟଣା ସମ୍ପର୍କରେ ଖବର ପାଇ ଖଲ୍ଲିକୋଟ ଥାନା ପୁଲିସ ଦୁର୍ଘଟଣା ସ୍ଥଳରେ ପହଞ୍ଚି କାର୍କୁ ଜବତ କରି ଘଟଣାର ତଦନ୍ତ ଆରମ୍ଭ କରିଥିବା ଜଣାପଡିଛି । ଦୁର୍ଘଟଣା ପରେ ଖଲ୍ଲିକୋଟ ସହରରେ ଦୀର୍ଘ ସମୟ ଧରି ବିଦ୍ୟୁତ ସରବରାହ ବନ୍ଦ ରହିଥିବାରୁ ପ୍ରବଳ ଗରମରେ ଲୋକମାନେ ଆଉଟୁ ପାଉଟୁ ହେଉଥିବା ଦେଖିବାକୁ ମିଳିଛି । ଅରବିନ୍ଦ ସ୍କୁଲ ଠାରୁ ଶ୍ରୀ ଜଗନ୍ନାଥ ମନ୍ଦିର ଛକ ପର୍ଯ୍ୟନ୍ତ ଆସିକା- ଭୁବନେଶ୍ୱର ରାସ୍ତା ଅଣ ଓସାରିଆ ହୋଇଥିବାରୁ ଏହି ରାସ୍ତାରେ ଏନେକ ଦୁର୍ଘଟଣା ଘଟୁଛି । ରାସ୍ତାକୁ ବିଦ୍ୟୁତ ଖୁଣ୍ଟ ଗୁଡିକ ଲାଗି ରହିଥିବାରୁ ବହୁବାର ଗାଡି ବିଦ୍ୟୁତ ଖୁଣ୍ଟକୁ ଧକ୍କା ଦେଉଛି ଏବଂ ଦୀର୍ଘ ସମୟ ଧରି ବିଦ୍ୟୁତ ସରବରାହ ବନ୍ଦ ରହୁଛି । ଫଳରେ ଜନସାଧାରଣ ଘୋର ଅସୁବିଧାର ସମ୍ମୁଖୀନ ହେଉଛନ୍ତି । ତେଣୁ ଏହି ରାସ୍ତାର ପ୍ରଶସ୍ତିକରଣ କରିବା ସହିତ ବିଦ୍ୟୁତ ଖୁଣ୍ଟ ଗୁଡିକ ରାସ୍ତାଠାରୁ ଦୁରେଇ ରଖିବା ପାଇଁ ସାଧାରଣରେ ଦାବି ହେଉଛି ।
