ଭୁବନେଶ୍ୱର,୦୩/୦୪: କଅଁରପାଳ ଗ୍ରାମ ନିକଟରେ ଏକ ବାଙ୍କରେ ଭାରସାମ୍ୟ ହରାଇ ରାସ୍ତା କଡ଼ ଖାଲକୁ ଓଲଟି ପଡିଥିଲା କାର୍ । ଦୁର୍ଘଟଣାରେ କାର୍ଟି ଚୁରମାର ହୋଇଯାଇଥିବା ବେଳେ ଜଣେ ଗୁରୁତର ଏବଂ ଆଉ ଦୁଇ ଜଣ ଆହତ ହୋଇଛନ୍ତି । ମୟୂରଭଞ୍ଜ ଜିଲ୍ଲା ଉଦଳା ଥାନା କଅଁରପାଳ ଗ୍ରାମରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ବୁଧବାର ବିଳମ୍ବିତ ରାତିରେ କଅଁରପାଳ ଅଞ୍ଚଳରୁ ଉଦଳା ଅଭିମୁଖେ ଏକ ହୋଣ୍ଡା ସିଟି ଗାଡ଼ିରେ ଆସୁଥିଲେ ସ୍ଥାନୀୟ ଅଞ୍ଚଳର ୪ ଜଣ ଯୁବକ। କଅଁରପାଳ ଗ୍ରାମ ନିକଟରେ ଏକ ବାଙ୍କରେ ଭାରସାମ୍ୟ ହରାଇ ରାସ୍ତା କଡ଼ ଖାଲକୁ ଓଲଟି ପଡିଥିଲା କାର୍ ।ଏହା ଦେଖି ସ୍ଥାନୀୟଲୋକେ ସେମାନଙ୍କୁ କାର୍ ଭିତରୁ ବାହାର କରିଥିଲେ । ଗାଡିରେ ଥିବା ୪ ଜଣଙ୍କ ମଧ୍ୟରୁ ଜଣଙ୍କ ମୁହଁରେ ଗଭୀର ଆଘାତ ଲାଗିଥିବା ବେଳେ ଅନ୍ୟମାନେ ସାମାନ୍ୟ ଆହତ ହୋଇଛନ୍ତି। ଗୁରୁତର ଯୁବକଙ୍କୁ ଉଦଳା ଡାକ୍ତରଖାନାରେ ଚିକିତ୍ସା ନିମନ୍ତେ ଭର୍ତ୍ତି କରାଯାଇଥିବା ବେଳେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଅନ୍ୟପଟେ ସ୍ଥାନୀୟ ଲୋକଙ୍କ ସହାୟତାରେ ଓଲଟି ପଡ଼ିଥିବା କାରକୁ ସିଧା କରାଯାଇଥିବା ବେଳେ ଦୁର୍ଘଟଣା ଏତେ ତୀବ୍ର ଥିଲା ଯେ ଦାମୀ ହୋଣ୍ଡା ସିଟି ଗାଡିର ସାମ୍ନା ଏବଂ ପଛ ପାଖ ଭାଙ୍ଗି ଚୁରମାର ହୋଇଯାଇଛି।
