ବୌଦ୍ଧ,୦୩/୧୧: ଭାରସାମ୍ୟ ହରାଇ ଗଛରେ ପିଟି ହେଲା କାର୍ । ଦୁର୍ଘଟଣାରେ ୪ ଯୁବକ ଗୁରୁତର ହୋଇଛନ୍ତି । ସମସ୍ତ ଗୁରୁତର ବୌଦ୍ଧ ସହରର କ୍ରିସ୍ ଅଗ୍ରୱାଲ, ଶ୍ରୀରାମ ଅଗ୍ରୱାଲ, ରୋହିତ ସାହୁ ଏବଂ ଧ୍ରୁବ ଅଗ୍ରୱାଲ ବୋଲି ଜଣାପଡ଼ିଛି । ସମସ୍ତଙ୍କୁ ବୌଦ୍ଧ ମେଡିକାଲରେ ଭର୍ତ୍ତି କରାଯାଇଛି । ତନ୍ମଧ୍ୟରୁ ଦୁଇ ଜଣଙ୍କୁ ସଙ୍କଟାପନ୍ନ ଅବସ୍ଥାରେ ବୁର୍ଲା ସ୍ଥାନାନ୍ତର କରାଯାଇଛି । ବୌଦ୍ଧ ଜିଲ୍ଲା ପୁରୁଣା କଟକ ଥାନା ଗେଟାମୁଣ୍ଡା ନିକଟରେ ଦୁର୍ଘଟଣା ।
ସୂଚନା ମୁତାବକ, ବୌଦ୍ଧ ସହରର ୪ ଜଣ ଯୁବକ ଏକ କାର୍ ଯୋଗେ ଫୁଲବାଣୀ ଯାଉଥିଲେ । ରବିବାର ଭୋର ସମୟରେ ଗାଡ଼ିଟି ଭାରସାମ୍ୟ ହରାଇ ପୁରୁଣା କଟକ ଥାନା ଗେଟାମୁଣ୍ଡା ନିକଟରେ ରାସ୍ତା କଡରେ ଥିବା ଏକ ଗଛରେ ପିଟି ହୋଇଥିଲା । ଫଳରେ କାର୍ଟି ରାସ୍ତାରୁ ପ୍ରାୟ ୨୦ ଫୁଟ ଦୂରରେ ଛିଟିକି ପଡ଼ିଥିଲା । ଏହି ଦୁର୍ଘଟଣାରେ କାର୍ରେ ଥିବା ୪ ଜଣ ଯୁବକ ଗୁରୁତର ହୋଇଥିଲେ । ଏହା ଦେଖି ସ୍ଥାନୀୟଲୋକେ ତୁରନ୍ତ ସମସ୍ତ ଗୁରୁତରଙ୍କୁ ଉଦ୍ଧାର କରି ବୌଦ୍ଧ ମେଡିକାଲରେ ଭର୍ତ୍ତି କରିଥିଲେ ଏବଂ ପୋଲିସକୁ ମଧ୍ୟ ଖବର ଦେଇଥିଲେ । ୪ଜଣଙ୍କ ମଧ୍ୟରୁ ୨ଜଣ ଯୁବକଙ୍କ ଅବସ୍ଥା ସଙ୍କଟାପନ୍ନ ହେବାରୁ ସେମାନଙ୍କୁ ବୁର୍ଲା ସ୍ଥାନାନ୍ତର କରାଯାଇଛି । ସମସ୍ତ ଯୁବକଙ୍କ ଚିକିତ୍ସା ଜାରି ରହିଥିବା ବେଳେ କେଉଁ ପରିସ୍ଥିତରେ ଏଭଳି ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି, ସେ ନେଇ ସୂଚନା ମିଳି ପାରିନାହିଁ । ଅନ୍ୟପଟେ ଦୁର୍ଘଟଣା ହୋଇଥିବା ଖବର ପାଇ ଘଟଣାସ୍ଥଳରେ ପୁରୁଣା କଟକ ଥାନା ପୋଲିସ ପହଞ୍ଚି ଘଟଣାର ସଦନ୍ତ ଚଳାଇଛି ।
