ବାଙ୍ଗିରିପୋଷି,୫/୧୨: ଆଉ ମାତ୍ର ଦିନକ ପରେ ବାଙ୍ଗିରିପୋଷି ଆସିବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ବାଙ୍ଗିରିପୋଷି ଠାରେ ବାଙ୍ଗିରିପୋଷି-ଗୋରୁମହିଷାଣି, ବୁଢ଼ାମରା-ଚାକୁଳିଆ ଏବଂ ବାଦାମପାହାଡ-କେନ୍ଦୁଝର ତିନୋଟି ରେଳ ପ୍ରକଳ୍ପର ଭିତ୍ତି ପ୍ରସ୍ତର ସ୍ଥାପନ କରିବେ ରାଷ୍ଟ୍ରପତି । ଏଥିନେଇ ସୁରକ୍ଷା ବ୍ୟବସ୍ଥା ସମୀକ୍ଷା କରିବା ସହ କାରକେଡ ରିହରସାଲ କରିଛି ପୋଲିସ ।
ଗୁରୁବାର ଏଡିଜି ରାଜେଶ କୁମାର, ଡିଆଇଜି ସତ୍ୟଜିତ ନାଏକ ଓ ଅବିନାଶ କୁମାର ପ୍ରମୁଖଙ୍କ ସହ ଜିଲ୍ଲା ଆରକ୍ଷୀ ଅଧିକ୍ଷକ ବରୁଣ ଗୁଣ୍ଟୁପାଲ୍ଲି ସମେତ ବହୁ ବରିଷ୍ଠ ପୁଲିସ ଅଧିକାରୀମାନେ ବାଙ୍ଗିରିପୋଷି ଠାରେ ପହଞ୍ଚି ଥିଲେ । ବାଙ୍ଗିରିପୋଷି ଆଦର୍ଶ ବିଦ୍ୟାଳୟ ନିକଟସ୍ଥ ଅସ୍ଥାୟୀ ହେଲିପ୍ୟାଡ ଠାରୁ ରାଷ୍ଟ୍ରପତିଙ୍କ କାର୍ଯ୍ୟକ୍ରମ ସ୍ଥଳ ପର୍ଯ୍ୟନ୍ତ ସୁରକ୍ଷା ବ୍ୟବସ୍ଥା ନୀରିକ୍ଷଣ କରିଥିଲେ। ଏଥି ସହ ରାଷ୍ଟ୍ରପତିଙ୍କ ଆଗମନ ପରେ କିପରି ତାଙ୍କର କାରକେଡ ରହିବ ସେଥିନେଇଁ ପୂର୍ବାଭ୍ୟାସ କରିଥିଲେ। ବାଙ୍ଗିରିପୋଷି ହେଲିପ୍ୟାହ ଠାରୁ କାର୍ଯକ୍ରମ ସ୍ଥଳ ପର୍ଯ୍ୟନ୍ତ ଯେପରି କୌଣସି ବ୍ୟବସ୍ଥାରେ ତ୍ରୁଟି ନରୁହେ ସେଥିନେଇଁ ବାରମ୍ୱାର ଅଭ୍ୟାସ କରାଯାଇଥିଲା । ପ୍ରାୟ ୩୦ ରୁ ଉର୍ଦ୍ଧ୍ବ ଗାଡି ଏହି କାରକେଡରେ ସାମିଲ ହୋଇଥିବା ଦେଖିବାକୁ ମିଳିଥିଲା।
