ମଣ୍ଟେ କାର୍ଲୋ,୧୪/୦୪: ସ୍ପେନର ଷ୍ଟାର୍ ଖେଳାଳି କାର୍ଲୋସ ଅଲ୍କାରାଜ ପ୍ରଥମ ଥର ଏଟିପି ମଣ୍ଟେ କାର୍ଲୋ ମାଷ୍ଟର୍ସ ଚାମ୍ପିଅନ୍ ହୋଇଛନ୍ତି । ପୁରୁଷ ବର୍ଗ ଫାଇନାଲ୍ରେ ସେ ୩-୬, ୬-୧, ୬-୦ ସେଟ୍ରେ ଇଟାଲୀର ଲରେଞ୍ଜୋ ମୁସେଟ୍ଟିଙ୍କୁ ପରାସ୍ତ କରିଥିଲେ । ମ୍ୟାଚ୍ ଜିତିବା ପାଇଁ ତାଙ୍କୁ ୧ଘଣ୍ଟା ୪୬ମିନିଟ୍ ଲାଗିଥିଲା । ୪ଥର ଗ୍ରାଣ୍ଡସ୍ଲାମ୍ ଚାମ୍ପିଅନ୍ ଅଲ୍କାରାଜ କ୍ୟାରିୟରରେ ଷଷ୍ଠ ମାଷ୍ଟର୍ସ ୧୦୦୦ ଟାଇଟଲ ଜିତିଛନ୍ତି । କ୍ଲେ-କୋର୍ଟରେ ଏହା ତାଙ୍କର ତୃତୀୟ ମାଷ୍ଟର୍ସ ଟାଇଟଲ ରହିଥିଲା ।
କ୍ୟାରିୟରରେ ପ୍ରଥମ ମାଷ୍ଟର୍ସ ୧୦୦୦ ଫାଇନାଲ୍ ଖେଳିଥିବା ମୁସେଟ୍ଟି ପ୍ରଥମ ସେଟ୍ରେ ଅତି ଚମତ୍କାର ପ୍ରଦର୍ଶନ କରି ୬-୩ରେ ବିଜୟ ହାସଲ କରିଥିଲେ । ମାତ୍ର ଏହାପରେ ଲୟ ହରାଇ ବସିଥିଲେ । ପରବର୍ତ୍ତୀ ସେଟ୍ରେ ଅଲ୍କାରାଜ ଦୃଢ଼ ପ୍ରତ୍ୟାବର୍ତ୍ତନ କରିଥିଲେ । ସେ କ୍ରମାନ୍ୱୟରେ ୨ଟି ସେଟ୍ ଜିତି ଟାଇଟଲ୍ ହାତେଇବାରେ ସଫଳ ହୋଇଥିଲେ । ଚାମ୍ପିଅନ୍ ହେବା ସହ ଏଟିପି ମାନ୍ୟତା ତାଲିକାରେ ଗୋଟିଏ ସ୍ଥାନ ଉନ୍ନତି ଘଟାଇ ଦ୍ୱିତୀୟ ସ୍ଥାନ ପକ୍କା କରିଛନ୍ତି ।
