ଚାନ୍ଦବାଲି, ୦୭/୦୬: କଙ୍ଗାରୁ କୋର୍ଟ ନେଇ ଗଲା କି ଜୀବନ ? ବ୍ୟକ୍ତିଙ୍କୁ ଗ୍ରାସ କଲା କି ଗ୍ରାମସଭା ଜରିମାନା ? ଫାଇନ୍ ନଭରିଲେ ଗାଁରୁ ବାସନ୍ଦ ହେବା ଭୟରେ ବ୍ୟକ୍ତିଙ୍କ ମୃତ୍ୟୁ ହୋଇଥିବା ଅଭିଯୋଗ । ପରିବାରରେ ଶୋକାକୁଳ ପରିବେଶ । ଏଭଳି ଖବର ସାମ୍ନାକୁ ଆସିଛି ଭଦ୍ରକ ଜିଲ୍ଲା ଅରଡ଼ି ଫାଣ୍ଡି ଅଧିନସ୍ଥ ନାନ୍ଦପୁର ଗାଁରୁ । ଏହି ଗାଁରେ ଏବେବି କଙ୍ଗାରୁ କୋର୍ଟ ଚାଲୁଛି । ଗାଁରେ ଜାତିଆଣ ବିବାଦ ଯୋଗୁ ବିଶ୍ୱନାଥ ଦାଶଙ୍କ ମୃତ୍ୟୁ ହୋଇଥିବା ପରିବାର ଲୋକ ଅଭିଯୋଗ କରିଛନ୍ତି ।
ସୂଚନା ଅନୁଯାୟୀ, ନାନ୍ଦପୁର ଗାଁରେ କିଛି ମାସ ହେଲା ଗୋପାଳସାହି ଓ ଖଣ୍ଡାୟତ ସାହି ମଧ୍ୟରେ ବିବାଦ ଲାଗିରହିଛି । ଗତ ସୋମବାର ବିଶ୍ବନାଥ ଦାଶ ଖଣ୍ଡାୟତ ସାହିର ଜଣେ ବ୍ୟକ୍ତିଙ୍କ ଟ୍ରାକ୍ଟରରେ ବିଲ ହଳ କରିଥିଲେ । ଯାହା ଫଳରେ ଗୋପାଳ ସାହିର କିଛି ନିଦ୍ଧିଷ୍ଟ ବ୍ୟକ୍ତି ତାଙ୍କୁ ଡାକି ଗ୍ରାମସଭାରେ ତାଗିଦ କରିବା ସହିତ ୫ ହଜାର ଟଙ୍କା ଜରିମାନା ଦେବାକୁ ନିଷ୍ପତ୍ତି କରିଥିଲେ । ଟଙ୍କା ନଦେଲେ ଗାଁରୁ ବାସନ୍ଦ କରିବାକୁ ଧମକ ମଧ୍ୟ ଦେଇଥିଲେ । ଏହି ଚିନ୍ତାରେ ବିଶ୍ବନାଥ ଛାତିରେ ଯନ୍ତ୍ରଣା ଅନୁଭବ କରିଥିଲେ । ପରିବାର ଲୋକ ତାଙ୍କୁ କଟକ ବଡ଼ ମେଡିକାଲକୁ ନେଇଥିଲେ ଏବଂ ସେଠାରେ ବିଶ୍ବନାଥଙ୍କ ମୃତ୍ୟୁ ଘଟିଛି । ଜରିମାନା ଅର୍ଥରାଶି ନଦେଇ ପାରିଲେ ଗାଁରୁ ବାସନ୍ଦ ହେବା ଭୟରେ ତାଙ୍କର ମୃତ୍ୟୁ ହୋଇଛି ବୋଲି ପରିବାର ଅଭିଯୋଗ ଆଣିଛନ୍ତି । ଖଣ୍ଡାୟତ ଘର ପିଣ୍ଡାରେ ବସିବା, ତାଙ୍କ ଦୋକାନରୁ ଜିନିଷପତ୍ର କିଣିବା, ହଳରେ ଧାନ ପେଶିବା ଆଦି କଲେ ସାହିରୁ ବାସନ୍ଦ ସହ ନିଆଁପାଣି ବନ୍ଦ କରାଯିବ ବୋଲି କଙ୍ଗାରୁ କୋର୍ଟରେ କୁହାଯାଇଥିଲା ବୋଲି ବିଶ୍ୱନାଥଙ୍କ ଘର ଲୋକ କହିଛନ୍ତି ।
