ନୂଆଦିଲ୍ଲୀ: ଜମ୍ମୁ ଓ କାଶ୍ମୀରର ପୂର୍ବତନ ରାଜ୍ୟପାଳ ସତ୍ୟପାଲ ମଲିକଙ୍କ ବିରୋଧରେ ଗୁରୁବାର ଚାର୍ଜସିଟ ଫାଇଲ କରିଛି ସେଣ୍ଟ୍ରାସ ବ୍ୟୁରୋ ଅଫ ଇନଭେଷ୍ଟିଗେସନ(ସିବିଆଇ)। କିରୁ ହାଇଡ୍ରୋ ଇଲେକ୍ଟ୍ରିକ ପାୱାର ପ୍ରୋଜେକ୍ଟରେ ଅର୍ଥ ହେରଫେର ମାମଲାରେ ସାମିଲ ଥିବା ଅଭିଯୋଗରେ ଏହି ମାମଲା ରୁଜୁ ହୋଇଥିବା ଜଣାପଡିଛି। ଜମ୍ମୁର କିସ୍ତୱର ଅଞ୍ଚଳରେ କାର୍ଯ୍ୟକାରୀ ହୋଇଥିବା ଏହି ପ୍ରୋଜେକ୍ଟରେ ହୋଇଥିବା ଟେଣ୍ଡର ପ୍ରୋସେସରେ ଅନିୟମିତତା ହୋଇଥିବା ନେଇ ମଧ୍ୟ ଅଭିଯୋଗ ରହିଛି।
ଆପଣଙ୍କୁ ଜଣାଇରଖୁ ଯେ, ମଲିକ ୨୦୧୮ ମସିହା ଅଗଷ୍ଟ ୨୩ ତାରିଖରୁ ୨୦୧୯ ମସିହା ଅକ୍ଟୋବର ୩୦ ତାରିଖ ଯାଏ ଜମ୍ମୁ ଓ କାଶ୍ମୀରର ରାଜ୍ୟପାଳ ପଦରେ ରହିଥିଲେ। ତେବେ ପୂର୍ବରୁ ମଧ୍ୟ ଦୁଇଟି ଫାଇଲ କ୍ଲିଅର କରିବା ଅଭିଯୋଗରେ ତାଙ୍କ ଉପରେ ୩୦୦ କୋଟି ଟଙ୍କା ଲାଞ୍ଚ ଦେବାର ସାର୍ବଜନୀନ ଅଭିଯୋଗ ମଧ୍ୟ ରହିଛି। ଏନେଇ ଗତ ବର୍ଷ ଫେବୃୟାରୀ ମାସରେ ସିବିଆଇ ତାଙ୍କ ଦିଲ୍ଲୀ ଓ ଜମ୍ମୁ କାଶ୍ମୀର ସ୍ଥିତ ବାସଭବନ ସହ ୩୦ରୁ ଅଧିକ ସ୍ଥାନରେ ଚଢାଉ କରିଥିଲା।
ଏହି ଚଢାଉରେ ମଲିକଙ୍କ ସହଯୋଗୀ ଏବଂ କିରୁ ଜଳବିଦ୍ୟୁତ ପ୍ରକଳ୍ପର କାର୍ଯ୍ୟନିର୍ବାହୀ ସଂସ୍ଥା ଚେନାବ ଭ୍ୟାଲି ପାୱାର ପ୍ରୋଜେକ୍ଟ (ପ୍ରା) ଲିମିଟେଡ୍ (ସିଭିପିପିପିଏଲ୍) ସହିତ ଜଡିତ ଅଧିକାରୀମାନଙ୍କୁ ମଧ୍ୟ ଯାଞ୍ଚ କରାଯାଇଥିଲା। ଯେଉଁମାନଙ୍କ ମଧ୍ୟରେ ସିଭିପିପିପିଏଲ୍ ସଂସ୍ଥାର ଅଧ୍ୟକ୍ଷ ନବିନ କୁମାର ଚୌଧୁରୀ, ପୂର୍ବତନ ଅଧିକାରୀ ଏମଏସ ବାବୁ, ଏମକେ ମିତ୍ତଲ ଓ ଅରୁଣ କୁମାର ମିଶ୍ର ରହିଥିଲେ। ଏହାସହ ଏହି କଣ୍ଟ୍ରାକ୍ଟ ପାଇଁ ପ୍ରାୟ ୨,୨୦୦ କୋଟି ଟଙ୍କା ପୁରସ୍କାର ରାଶି ପାଇଥିବା ପଟେଲ ଇଞ୍ଜିନିୟରିଂ କମ୍ପାନୀ ମଧ୍ୟ ସିବାଆଇ ସ୍କାନରରେ ରହିଛି।
ଏନେଇ ସିବିଆଇ କହିଛି ଯେ, ସିଭିପିପିପିଏଲ୍ ର ୪୭ତମ ବୋର୍ଡ ମିଟିଂରେ ହୋଇଥିବା ନିଷ୍ପତ୍ତି ଅନୁଯାୟୀ ଇ-ଟେଣ୍ଡରିଂ ମାଧ୍ୟମରେ ରି-ଟେଣ୍ଡର ନହୋଇ ପଟେଲ ଇଞ୍ଜିନିୟରିଂ କମ୍ପାନୀକୁ ପୁଣି ଥରେ ଟେଣ୍ଡର ଦିଆ ଯାଇଥିଲା। ଯେଉଁଥିରେ ଘୋର ଅନିୟମିତତା ହୋଇଥିବା ନେଇ ସନ୍ଦେହ ପ୍ରକାଶ କରାଯାଉଛି।
ତେବେ ମଲିକ ଏହି ଅଭିଯୋଗକୁ ଖଣ୍ଡନ କରିବା ସହ ଉଦ୍ଦେଶ୍ୟମୂଳକ ଭାବେ ମତେ ଟାର୍ଗେଟ କରାଯାଉଛି ବୋଲି କହିଛନ୍ତି। ସେ ସାମାଜିକ ଗଣମାଧ୍ୟମ ଏକ୍ସରେ ସୂଚନା ଦେଇ ଲେଖିଛନ୍ତି ଯେ “ଦୀର୍ଘ ତିନି ଚାରି ଦିନ ହେବ ମୋ ଦେହ ଭଲନାହିଁ। ମୁଁ ଡାକ୍ତରଖାନରେ ଚିକିତ୍ସିତ ହେଉଛି। ଏହା ମଧ୍ୟରେ ମୋ ଘର ଉପରେ ଚଢାଉ ହୋଇସାରିଲାଣି। ମୋ ଗାଡି ଚାଳକ ଓ ସହାୟକଙ୍କୁ ମଧ୍ୟ ଏଥିରେ ସାମିଲ ଥିବା କହି ଯାଞ୍ଚ କରୁଛନ୍ତି। ତେବେ ମୁଁ ଜଣେ କୃଷକଙ୍କ ପୁଅ। ଏହି ଚଢାଉ ମତେ ଆଦୌ ଡରାଇ ପାରିବ ନାହିଁ। ମୁଁ ସବୁବେଳେ କୃଷକଙ୍କ ସହ ରହିଛି ଆଉ ରହିବି।”
ଲାଞ୍ଚ ପ୍ରସ୍ତାବ ସମ୍ପର୍କରେ ମଲିକଙ୍କ ସାର୍ବଜନୀନ ଅଭିଯୋଗ ପରେ ସିବିଆଇ ଏପ୍ରିଲ ୨୦୨୨ରେ ମାମଲା ପଞ୍ଜିକୃତ କରିଥିଲା। ସିବିଆଇର ତଦନ୍ତ ପରେ ଚୁକ୍ତିନାମା ପ୍ରଦାନରେ ଅବହେଳାର ପ୍ରମାଣ ମଧ୍ୟ ମିଳିଛି, ଯାହା ଫଳରେ ଚାର୍ଜସିଟ୍ ଦାଖଲ ହୋଇଛି।
