ଭୁବନେଶ୍ୱର,୧୪/୦୫: ଜାତୀୟସ୍ତରରେ ଜନସଂଖ୍ୟାର ୫୧.୨% ଅବିବାହିତ । ୫୬.୪% ଅବିବାହିତ ପୁରୁଷ ବର୍ଗ ରହିଥିଲା ବେଳେ ୪୫.୮% ମହିଳା ବର୍ଗ ରହିଛନ୍ତି । ଓଡ଼ିଶାରେ ଜନସଂଖ୍ୟାର ୪୬.୫% ଅବିବାହିତ ଅଛନ୍ତି । ୫୧.୬% ପୁରୁଷ ଏବଂ ୪୧.୨% ମହିଳା ଅବିବାହିତ ଅଛନ୍ତି । ମହିଳାଙ୍କ ଅପେକ୍ଷା ପୁରୁଷମାନେ ଅଧିକ ମାତ୍ରାରେ ବିବାହ ପ୍ରତି ବିମୁଖ ଅଛନ୍ତି । କେନ୍ଦ୍ର ସରକାରଙ୍କ ପକ୍ଷରୁ ପ୍ରକାଶିତ ଏକ ରିପୋର୍ଟରେ ଏହା ପ୍ରକାଶ ପାଇଛି ।
ଦେଶ ହେଉ ବା ରାଜ୍ୟ ବିବାହ ପ୍ରତି ପିଲାଙ୍କ ଆଗ୍ରହ କମୁଛି । ସେମାନେ ପରିବାର ଜଞ୍ଜାଳ ଭିତରେ ଜୀବନ ଅତିବାହିତ କରିବାକୁ ଇଚ୍ଛା ପ୍ରକାଶ କରୁନାହାନ୍ତି । ଆର୍ଥିକ ସମସ୍ୟା ହେଉ ବା ପାରିବାରିକ, ଏକାକୀ ଜୀବନ ବଞ୍ଚିବାକୁ ପସନ୍ଦ କରୁଛନ୍ତି । ଦେଶରେ ଜନସଂଖ୍ୟାର ୪୫.୫% ବିବାହିତ । ୪୨.୫% ପୁରୁଷ ଓ ୪୯% ମହିଳା ବର୍ଗ ବିବାହ କରିଛନ୍ତି । ଆଉ ଜନସଂଖ୍ୟାର ୩.୩% ମଧ୍ୟରେ ବିଧବା,ସ୍ୱାମୀ ବା ସ୍ତ୍ରୀ ପରିତ୍ୟକ୍ତା ଓ ବିବାହ ବିଚ୍ଛେଦ ବର୍ଗ ଅଛନ୍ତି । ଏହି ବର୍ଗରେ ୧.୫% ପୁରୁଷ ରହିଥିଲା ବେଳେ ୫.୨% ମହିଳା । ଓଡ଼ିଶାରେ ୪୯.୨% ବିବାହିତ । ୪୨.୨% ପୁରୁଷ ଓ ୪୬.୭% ମହିଳା ବର୍ଗ ବିବାହ କରିଛନ୍ତି । ଏହାଛଡ଼ା ରାଜ୍ୟରେ ୪.୩% ମଧ୍ୟରେ ବିଧବା, ସ୍ୱାମୀ ବା ସ୍ତ୍ରୀ ପରିତ୍ୟକ୍ତା ଓ ବିବାହ ବିଚ୍ଛେଦ ବର୍ଗ ଅଛନ୍ତି । ଏହି ବର୍ଗରେ ୧.୭% ପୁରୁଷ ରହିଥିଲା ବେଳେ ୬.୯% ମହିଳା ।
ରାଜ୍ୟରେ ଏହି ବର୍ଗରେ ମହିଳାଙ୍କ ସଂଖ୍ୟା ଅଧିକ । ଅର୍ଥାତ ସମାଜରେ ଅଧିକ ମାତ୍ରାରେ ମହିଳାମାନେ ବିବାହ ଜନିତ ଯନ୍ତ୍ରଣା ଭୋଗୁଛନ୍ତି। ଜାମ୍ମୁ ଓ କଶ୍ମୀରରେ ସର୍ବାଧିକ ଅବିବାହିତ ଅଛନ୍ତି । ଜନସଂଖ୍ୟାର ୫୭.୩% ଅବିବାହିତ । ଏହି ରାଜ୍ୟ ପଛକୁ ଦ୍ୱିତୀୟରେ ରହିଛି ଉତ୍ତର ପ୍ରଦେଶ। ସେଠାରେ ୫୬.୮% ଅଛନ୍ତି । ବିହାରରେ ସର୍ବାଧିକ ୬୩.୧% ପୁରୁଷ ଅବିବାହିତ । ଦ୍ୱିତୀୟରେ ଉତ୍ତରାଖଣ୍ଡରେ ୬୧.୭% ଅବିବାହିତ। ଅବିବାହିତ ପୁରୁଷ ବର୍ଗରେ ଓଡ଼ିଶା ୧୭ତମ ସ୍ଥାନରେ ରହିଛି । ସେହିପରି ମହିଳାଙ୍କ କ୍ଷେତ୍ରରେ ବିହାରରେ ମଧ୍ୟ ସର୍ବାଧିକ ମହିଳା ଅବିବାହିତ । ସେଠାରେ ୫୪.୫% ମହିଳା ଅଛନ୍ତି । ଏହି ବର୍ଗରେ ଓଡ଼ିଶା ୧୬ତମ ସ୍ଥାନରେ ରହିଛି । ଦେଶରେ ବିଧବା,ସ୍ୱାମୀ ବା ସ୍ତ୍ରୀ ପରିତ୍ୟକ୍ତା ଓ ବିବାହ ବିଚ୍ଛେଦ ବର୍ଗରେ ତାମିଲନାଡ଼ୁରେ ସର୍ବାଧିକ ୫.୯% ଅଛନ୍ତି । ଏହି ବର୍ଗରେ ଓଡ଼ିଶା ୧୬ତମ ସ୍ଥାନରେ ରହିଛି ।
