ଦୁବାଇ,୦୯/୦୩: ଆଜି ଚାମ୍ପିଅନ୍ସ ଟ୍ରଫି ଫାଇନାଲ୍ । ସାରା ବିଶ୍ୱର କ୍ରିକେଟ୍ ପ୍ରେମୀ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ହେବାକୁ ଥିବା ମହାମୁକାବିଲା ଦେଖିବାକୁ ଉତ୍ସୁକତାର ସହ ଅପେକ୍ଷା କରିଛନ୍ତି । ଆୟୋଜକ ପାକିସ୍ତାନ ସମେତ ଅଷ୍ଟ୍ରେଲିଆ, ଇଂଲଣ୍ଡ ଭଳି ବଡ଼ ଦଳ ନାହାନ୍ତି । ତଥାପି ଦର୍ଶକରେ ପୁରି ଉଠୁଛି ଦୁବାଇ ଅନ୍ତର୍ଜାତୀୟ ଷ୍ଟାଡ଼ିୟମ୍ । ଖାଲି ମ୍ୟାଚ୍ ଦେଖିବା ପାଇଁ ନୁହେଁ ବେଟିଂ ପାଇଁ ମଧ୍ୟ ଦୁବାଇରେ ଭିଡ଼ ଜମୁଥିବା ଅନୁସନ୍ଧାନରୁ ଜଣାପଡ଼ିଛି । ସାରା ବିଶ୍ୱର ବୁକି ଦୁବାଇରେ ଏକତ୍ର ହୋଇଛନ୍ତି । କେବଳ ଫାଇନାଲ୍ ମ୍ୟାଚ୍ ପାଇଁ ୫୦୦୦ କୋଟିରୁ ଊଦ୍ଧ୍ୱର୍ ଟଙ୍କାର ବେଟିଂ ହୋଇଛି । ବେଟିଂରେ କୁଖ୍ୟାତ ଅଣ୍ଡର ୱାର୍ଲ୍ଡ ଡନ୍ ଦାଉଦ ଇବ୍ରାହିମର ଡି’ କମ୍ପାନୀର ଲିଙ୍କ୍ ମଧ୍ୟ ରହିଛି । ଫାଇନାଲ୍ ମ୍ୟାଚ୍ରେ ଭାରତର ବିଜୟ ପଛରେ ସର୍ବାଧିକ ଅର୍ଥ ଲାଗିଥିବା ଜଣା ପଡ଼ିଛି । ଗତ ଅଷ୍ଟ୍ରେଲିଆ ବିପକ୍ଷ ସେମି ଫାଇନାଲ୍ ମୁକାବିଲା ସମୟରେ ଦିଲ୍ଲୀ କ୍ରାଇମବ୍ରାଞ୍ଚ ୫ଜଣ ବୁକିଙ୍କୁ ଗିରଫ କରିବା ପରେ ସବୁ ଖବର ପଦାକୁ ଆସିଛି ।
ପ୍ରବୀଣ କୋଚର ଓ ସଞ୍ଜୟ କୁମାର ନାମକ ୨ ଜଣ ବୁକି ଭାରତ-ଅଷ୍ଟ୍ରେଲିଆ ସେମି ମ୍ୟାଚ୍ରେ ବେଟିଂ ଚଳାଇଥିବା ସମୟରେ ଧରା ପଡ଼ିଥିଲେ । ଉଭୟଙ୍କ ଠାରୁ କ୍ରାଇମବ୍ରାଞ୍ଚ ପୁଲିସ୍ ସମସ୍ତ ଇଲେକଟ୍ରୋନିକ୍ ସରଞ୍ଜାମ ଜବତ କରିଛି ।
ତଦନ୍ତ ରିପୋର୍ଟ ଅନୁଯାୟୀ ପ୍ରବୀଣ ଏକ ବେଟିଂ ‘ଲକି ଡଟ୍-କମ୍’ ନାମକ ୱେବ ସାଇଟ୍ରୁ ମାଷ୍ଟର ଆଇଡି କିଣିବା ପରେ ଭିନ୍ନ ଭିନ୍ନ ବେଟିଂ ଆଇଡି ପ୍ରସ୍ତୁତ କରି ବିକ୍ରି କରୁଥିଲା। ଏଥିପାଇଁ ସେ ପ୍ରତି ବେଟିଂ ପଛରେ ୩% କମିଶନ ନେଉଥିଲା । ଅଫ-ଲାଇନ୍ ବେଟିଂ ପାଇଁ ଟେଲିଫୋନ ବ୍ୟବହାର କରାଯାଉଥିଲା । ଗତ ୨ ବର୍ଷ ଧରି ପ୍ରବୀଣ ଦିଲ୍ଲୀରେ ମାସିକ ୩୦,୦୦୦ ଟଙ୍କାର ଏକ ଘର ଭଡ଼ା ନେଇ ବେଟିଂ କରୁଥିଲା । ପ୍ରତି ମ୍ୟାଚ୍ରେ ସେ ୪୦,୦୦୦ ଟଙ୍କା ଆୟ କରୁଥିଲା । ସମସ୍ତ ବେଟିଂ ନେଟ୍ୱର୍କ ଦୁବାଇରେ ନିୟନ୍ତ୍ରିତ ହେଉଥିବା ଜେରା ସମୟରେ ପ୍ରବୀଣ ପ୍ରକାଶ କରିଛି ।
ସେହିପରି ପଶ୍ଚିମ ଦିଲ୍ଲୀର ବାସିନ୍ଦା ଛୋଟୁ ବଂଶଲ କାନାଡ଼ାରେ ଏକ ବେଟିଂ ଆପ ପ୍ରସ୍ତୁତ କରିଥିଲା । ବର୍ତ୍ତମାନ ସେ ଦୁବାଇରେ ରହୁଛି । ବୁକିମାନଙ୍କୁ ସେ ନିଜ ଦ୍ୱାରା ପ୍ରସ୍ତୁତ ଆପ୍ ଭଡ଼ାରେ ଦେଉଛି ଓ ଅର୍ଥ ରୋଜଗାର କରୁଛି ।
ବିନୟ ନାମକ ଦିଲ୍ଲୀର ମୋତି ନଗର ବାସିନ୍ଦା ସମ୍ପ୍ରତି ଦୁବାଇରେ ରହି ସମସ୍ତ ମ୍ୟାଚ୍ ଦେଖୁଛି ଓ କ୍ରିକେଟ୍ ଗ୍ରାଉଣ୍ଡ ଖବର ବୁକିଙ୍କ ନିକଟରେ ପହଞ୍ଚାଉଛି । ଗିରଫ ହୋଇଥିବା ଅନ୍ୟ ୩ ବୁକି ମନୀଷ ସାହାଣୀ, ଯୋଗେଶ କୁକେଜା ଓ ସୂରଜଙ୍କର ମଧ୍ୟ ଦୁବାଇ ଲିଙ୍କ୍ ରହିଛି । ସେମାନଙ୍କ ଠାରୁ ୨୨ଲକ୍ଷ ଟଙ୍କା ଜବତ କରାଯାଇଛି ।
ସମ୍ପୂର୍ଣ୍ଣ ଗ୍ୟାଙ୍ଗ୍ର ମୁଖିଆ ମନୀଷ ଦିଲ୍ଲୀରେ ବସି ବେଟିଂ ପରିଚାଳନା କରୁଥିଲା । ସେ ଲୋକଙ୍କ କଥାବାର୍ତ୍ତା ରେକର୍ଡ କରୁଥିଲା । କୌଣସି ମଧ୍ୟସ୍ଥି ବିନା ବ୍ୟାଙ୍କ ଓ ନଗଦ ଟଙ୍କା ନେଇ ବେଟ୍ ଲଗାଉଥିଲା ବୋଲି ଜେରା ବେଳେ ସ୍ୱୀକାର କରିଛି । ଜେରା ସମୟରେ ସେମାନେ ଆହୁରି ଅନେକ ବୁକିଙ୍କ ନାମ ପ୍ରକାଶ କରିଛନ୍ତି । ମନୁ ମଟକା, ଅକ୍ଷୟ ଗେହଲତ, ନିଶୁ, ରିଙ୍କୁ, ଅମନ ରାଜପୁତ ନାମକ କିଛି ବୁକି ଭାରତ ବାହାରେ ‘ସଟ୍ଟା’ ନାମକ ଆପ ପ୍ରସ୍ତୁତ କରି ବେଟିଂ କରୁଥିବା ସେମାନେ କହିଛନ୍ତି ।
