କଟକ,୦୭/୧୦: ଚାନ୍ଦିମେଢ ଓ ସୁନା ମୁକୁଟର ସ୍ୱତନ୍ତ୍ରତା ନେଇ ପରିଚିତ ଚାଉଳିଆଗଞ୍ଜ ପୂଜା ମଣ୍ଡପରେ ଏଥର ଚାନ୍ଦିମେଢକୁ ନୂଆ ରୂପରେ ଦେଖିବାକୁ ମିଳିବ । ପ୍ରଥମଥର ପାଇଁ ମେଢରେ ଲାଇଟ୍ କାମ କରି ଆକର୍ଷଣ ସୃଷ୍ଟି କରିବାକୁ ଯାଉଛି ଚାଉଳିଆଗଞ୍ଜ ପୂଜା କମିଟି । ପୂର୍ବରୁ ଅଲିଶାବଜାର, ଖାନ୍ନଗର ମେଢରେ ଲାଇଟ୍ କାମ କରି ସାରିଥିବା ବେଳେ ଚଳିତ ବର୍ଷ ଚାଉଳିଆଗଞ୍ଜ ଏହି ଆକର୍ଷଣକୁ ଯୋଡ଼ିବ ।
କଟକ ସହରରେ ସ୍ୱତନ୍ତ୍ର ମା’ଙ୍କ ମୁଖମଣ୍ଡଳ ଓ ସୁନ୍ଦର ମେଢ ପାଇଁ ପରିଚିତ ଚାଉଳିଆଗଞ୍ଜ ପୂଜା କମିଟି ୧୯୨୫ ମସିହାରେ ଗଠନ ହୋଇଥିଲା । ୧୯୬୨ ମସିହାରେ ମୃଣ୍ମୟୀ ମୂର୍ତ୍ତି ଓ ୧୯୯୧ ମସିହାରେ ନୂତନ ମଣ୍ଡପ ନିର୍ମାଣ କରାଯାଇଥିଲା । ୧୯୯୯ ମସିହାରେ ଚାନ୍ଦିମେଢ କରାଯାଇଥିବା ବେଳେ ୨୦୦୭ ମସିହାରେ ସୁନା ମୁକୁଟ ଶୋଭା ପାଇଥିଲା । ଚଳିତ ବର୍ଷ ଏହି ଆକର୍ଷଣରେ ନୂଆ ବିଭବ ଯୋଡ଼ି ହେବାକୁ ଯାଉଛି । ଚାନ୍ଦିମେଢର ଆକର୍ଷଣ ବଢାଇବ ଲାଇଟ୍ କାମ ।
