ଭୁବନେଶ୍ୱର,୦୪/୦୮: ସାଧାରଣତଃ ନଭେମ୍ବରଠାରୁ ଫେବ୍ରୁଆରୀ ମାସ ଭିତରେ ହାଡ଼ଫୁଟି ଦେଖାଦେଇଥାଏ । ହେଲେ ବର୍ତ୍ତମାନ ସଂକ୍ରମଣ କ୍ଷେତ୍ରରେ ପରିବର୍ତ୍ତନ ଆସିଛି । ଏବେ ସବୁ ଋତୁରେ ହାଡ଼ଫୁଟି ଦେଖାଗଲାଣି । ଯାହାକୁ ନେଇ ସ୍ୱାସ୍ଥ୍ୟ ବିଶେଷଜ୍ଞମାନେ ଚିନ୍ତାରେ ଅଛନ୍ତି । ଏବେ ରାଜ୍ୟରେ ବିଭିନ୍ନ ଜିଲ୍ଲାରେ ହାଡ଼ଫୁଟିରେ ସଂକ୍ରମିତ ହେଲେଣି । ଜଳବାୟୁରେ ପରିବର୍ତ୍ତନ ଓ ଭୂତାଣୁ ଯୋଗୁ ସଂକ୍ରମଣ ବ୍ୟାପୁଥିବା ବିଶେଷଜ୍ଞ ମତ ରଖିଛନ୍ତି ।
ନୟାଗଡ଼, ଗଞ୍ଜାମ, କୋରାପୁଟ, ମାଲକାନଗିରି, ବାଲେଶ୍ୱର, ଯାଜପୁର, ଅନୁଗୁଳ ଓ ସମ୍ବଲପୁର ଜିଲ୍ଲାରେ ହାଡ଼ଫୁଟି ସଂକ୍ରମଣ ହୋଇଛି । ସଂକ୍ରମଣ ସ୍ଥିତି ସେଭଳି ଗମ୍ଭୀର ନଥିଲା ବେଳେ ଅଦିନରେ ଦେଖା ଦେଇଛି । କ୍ୟାପଟାଲ ହସ୍ପିଟାଲ ଭେଷଜ ବିଶେଷଜ୍ଞ ଡାକ୍ତର ରଞ୍ଜନ ରାଜ ଦାସ କହିଛନ୍ତି, ବର୍ତ୍ତମାନ ଜଳବାୟୁରେ ପରିବର୍ତ୍ତନ ଓ ଭୂତାଣୁ ସଂକ୍ରମଣ ଯୋଗୁ ହାଡ଼ଫୁଟିରେ ବ୍ୟାପୁଛି । ଏହି ସଂକ୍ରମଣ ସାଧାରଣତଃ ଶୀତ ଓ ବସନ୍ତ ଋତୁରେ ଦେଖା ଦେଇଥାଏ । ହେଲେ ଆରଏମ୍ଆରସି କହିଛି, ଏହି ରୋଗ ଏତେ ମାରାତ୍ମକ ନୁହେଁ । ରୋଗୀ ଶୀଘ୍ର ସୁସ୍ଥ ହେଇଯାଆନ୍ତି । ଯେହେତୁ ଜଳବାୟୁ ପରିବର୍ତ୍ତନ ଲାଗି ହେଉଛି, ରାଜ୍ୟରେ ସେଭଳି କୌଣସି ବଡ଼ ଧରଣର ସଂକ୍ରମଣ ଖବର ଆସିନି ।
କ୍ୟାପିଟାଲ ହସ୍ପିଟାଲ ଚର୍ମ ବିଭାଗ ବିଶେଷଜ୍ଞ କହିଛନ୍ତି, ଏହି ମାସେ ଭିତରେ ୨୦ ପାଖାପାଖି ହାଡ଼ଫୁଟି ରୋଗୀ ଆସିଛନ୍ତି । ଯେଉଁମାନଙ୍କ ଚର୍ମ ଅଧିକ ପ୍ରଭାବିତ ହେଉଛି ସେମାନେ ଏଠାକୁ ଚିକିତ୍ସା ପାଇଁ ଆସୁଛନ୍ତି । ସଂକ୍ରମିତ ଅତିକମ୍ରେ ୭ଦିନ ଏକାନ୍ତବାସରେ ରହିବା ଉଚିତ। ଆଉ ପରିବାର ଲୋକଙ୍କ ସଂସ୍ପର୍ଶରେ ଆସିବା କଥା ନୁହେଁ ।
ଜନସ୍ୱାସ୍ଥ୍ୟ ନିର୍ଦ୍ଦେଶାଳୟରୁ ମିଳିଥିବା ସୂଚନା ଅନୁଯାୟୀ, ଲୋକଙ୍କ ଶରୀରରେ ରୋଗ ପ୍ରତିରୋଧକ ଶକ୍ତି କମ୍ ଥିଲେ ହାଡ଼ଫୁଟି ହୋଇଥାଏ। ଏଥିରେ ଛୋଟ ପିଲାଙ୍କଠାରୁ ବୟସ୍କ ପର୍ଯ୍ୟନ୍ତ ଆକ୍ରାନ୍ତ ହୋଇଥାନ୍ତି । ହେଲେ ବର୍ତ୍ତମାନ ରାଜ୍ୟରେ ହାଡ଼ଫୁଟି ବଢ଼ିଥିବା ନେଇ ସେଭଳି କୌଣସି ସୂଚନା ନାହିଁ । ଭାରିସେଲା ଜୋଷ୍ଟର ଭୂତାଣୁ ଯୋଗୁଁ ହାଡ଼ଫୁଟି ହୋଇଥାଏ । ଏହି ରୋଗରେ ସଂକ୍ରମିତଙ୍କ ଦେହସାରା ଫୋଟକା ଭଳି ଫଳିଯାଏ ।
କେନ୍ଦ୍ର ପରିସଂଖ୍ୟାନ ଓ କାର୍ଯ୍ୟାନ୍ୱୟନ ମନ୍ତ୍ରଣାଳୟ ତଥ୍ୟ ଅନୁସାରେ, ୨୦୨୧ରେ ଦେଶରେ ୧୦ ହଜାରରୁ ଅଧିକ ମାମଲା ନଜରକୁ ଆସିଥିଲା । ୨୦୨୨ରେ ଏହା ୨୦ହଜାର ଟପିଥିଲା । ଏହି ବର୍ଷ ମୃତ୍ୟୁ ସଂଖ୍ୟା ୧୦ରୁ ଅଧିକ ରହିଥିଲା । ୨୦୨୨ରେ ଓଡ଼ିଶାରେ ୫ଶହରୁ ଅଧିକ ସଂକ୍ରମଣ ମାମଲା ନଜରକୁ ଆସିଛି । ହେଲେ ଓଡ଼ିଶା ସରକାରଙ୍କ ପାଖରେ ସଂକ୍ରମିତଙ୍କ ସମ୍ପର୍କରେ କିଛି ତଥ୍ୟ ନାହିଁ । ଟିକା ନେଇଥିବା ପିଲା ହାଡ଼ଫୁଟିରେ ଆକ୍ରାନ୍ତ ହେବାର ଆଶଙ୍କା କମ୍ । ଯେଉଁମାନେ ବି ସଂକ୍ରମିତ ହୋଇଥାନ୍ତି, ସେମାନଙ୍କଠାରେ କମ୍ ଲକ୍ଷଣ ଦେଖିବାକୁ ମିଳିଥାଏ । ମାତ୍ର କେନ୍ଦ୍ର ସରକାରଙ୍କ ପକ୍ଷରୁ ଜାରି ରହିଥିବା ଟିକାକରଣ କାର୍ଯ୍ୟକ୍ରମରେ ହାଡ଼ଫୁଟି ପାଇଁ କୌଣସି ଟିକା ଦିଆଯାଉନାହିଁ । ଏଥିପାଇଁ ଅଭିଭାବକମାନଙ୍କୁ ବାହାରୁ ଟିକା କିଣି ଦେବାକୁ ପଡ଼ୁଛି ।
