ଭୁବନେଶ୍ୱର: ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ଆୟୋଜିତ ଗଭର୍ଣ୍ଣିଂ କାଉନସିଲ ବୈଠକରେ ଓଡ଼ିଶାର ମୁଖ୍ୟମନ୍ତ୍ରୀ ରାଜ୍ୟର ବିକାଶ ଯାତ୍ରା ସେୟାର କରି ବିକଶିତ ଭାରତ @୨୦୪୭ ପାଇଁ ଓଡ଼ିଶାର ମହତ୍ୱାକାଂକ୍ଷୀ ରୋଡମ୍ୟାପ୍ ଉପସ୍ଥାପନ କରିଛନ୍ତି। ୨୦୩୬ରେ ଓଡ଼ିଶାର ଶତବାର୍ଷିକୀ ଓ ୨୦୪୭ରେ ଭାରତର ସ୍ୱାଧୀନତାର ଶତବାର୍ଷିକୀ ଉପଲକ୍ଷେ ବିକଶିତ ଓଡ଼ିଶାର ଦୃଷ୍ଟିକୋଣ ଉପସ୍ଥାପନ କରାଯାଇଛି।
ପାହାଲଗାମରେ ୨୨ ଏପ୍ରିଲ ୨୦୨୫ରେ ହୋଇଥିବା ଆତଙ୍କବାଦୀ ଆକ୍ରମଣ ପରେ, ପ୍ରଧାନମନ୍ତ୍ରୀ ମୋଦୀଙ୍କ ନିଷ୍ପତ୍ତିମୂଳକ ନେତୃତ୍ୱରେ ଅପରେସନ୍ ସିନ୍ଦୂର ଜରିଆରେ ସୀମାପାରରେ ଆତଙ୍କବାଦୀ ଶିବିରଗୁଡ଼ିକୁ ନିଷ୍କ୍ରିୟ କରାଯାଇଛି। ମୁଖ୍ୟମନ୍ତ୍ରୀ ଏହା ପାଇଁ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି।
ପ୍ରଧାନମନ୍ତ୍ରୀଙ୍କ ନେତୃତ୍ୱରେ ଭାରତ ୨୦୨୪-୨୫ରେ ୬.୫% ବୃଦ୍ଧି ହାରରେ ବିଶ୍ୱର ସବୁଠାରୁ ଦ୍ରୁତ ବିକାଶଶୀଳ ଅର୍ଥନୀତି ହୋଇଛି। ଓଡ଼ିଶାର ଡବଲ ଇଞ୍ଜିନ୍ ସରକାର ଶତକଡା ୭.୨% ବୃଦ୍ଧି ହାସଲ କରି ଦେଶର ବିକାଶରେ ପ୍ରମୁଖ ଭୂମିକା ଗ୍ରହଣ କରିଛି।
କେନ୍ଦ୍ର ସରକାର ୭୩,୦୦୦ କୋଟି ଟଙ୍କାର ରେଳ ପ୍ରକଳ୍ପ ଓ ୪,୬୦୦ କୋଟି ଟଙ୍କାର ଜାତୀୟ ରାଜପଥ ପ୍ରକଳ୍ପ ମଞ୍ଜୁର କରିଛନ୍ତି। ଏବଂ ୧୭,୫୦୦ କୋଟି ଟଙ୍କାର ପ୍ରକଳ୍ପ ପାଇପଲାଇନରେ ରହିଛି। ଓଡ଼ିଶା ପିଏମ୍ ଉଷା, ପିଏମ୍ ଶ୍ରୀ, ମମତା-ପିଏମଏମଭିୱାଇ, ଏନଇପି ୨୦୨୦ ଓ ପିଏମ ଜେୱାଇ ଯୋଜନାଗୁଡ଼ିକୁ ଦ୍ରୁତଗତିରେ କାର୍ଯ୍ୟକାରୀ କରୁଛି।
ଓଡ଼ିଶା ୨୦୩୬ ସୁଦ୍ଧା ୫୦୦ ବିଲିୟନ ଡଲାର ଓ ୨୦୪୭ ସୁଦ୍ଧା ୧.୫ ଟ୍ରିଲିୟନ ଡଲାରର ଅର୍ଥନୀତି ଗଠନ କରିବାକୁ ଲକ୍ଷ୍ୟ ରଖିଛି। ଓଡ଼ିଶା ଭିଜନ ଡକ୍ୟୁମେଣ୍ଟ ୧୨ ଜୁନ ୨୦୨୫ରେ ଲଞ୍ଚ ହେବ। ଯେଉଁଥିରେ ୩.୨ ଲକ୍ଷରୁ ଅଧିକ ନାଗରିକଙ୍କ ପରାମର୍ଶକୁ ଏଆଇ ଜରିଆରେ ବିଶ୍ଳେଷଣ କରାଯାଇଛି। ମୁଖ୍ୟମନ୍ତ୍ରୀ ଏହାର କାର୍ଯ୍ୟକାରିତା ନିଜେ ତଦାରଖ କରିବେ।
ସମସ୍ତ ଚାଷଯୋଗ୍ୟ ଅଞ୍ଚଳକୁ ସିଞ୍ଚନ ଅଧୀନକୁ ଆଣି ସିଏମ କିସାନ ଯୋଜନା ଜରିଆରେ ଚାଷୀଙ୍କ ଆୟ ବୃଦ୍ଧି କରାଯିବ। ୨୦୩୬ ସୁଦ୍ଧା ୪୦% ଓ ୨୦୪୭ ସୁଦ୍ଧା ୬୦% ସହରୀକରଣ ଲକ୍ଷ୍ୟ ରହିଛି। ଯେଉଁଥିରେ ଭୁବନେଶ୍ୱର, ଖୋର୍ଦ୍ଧା, ଜଟଣୀ, କଟକ, ପାରାଦୀପ ଓ ପୁରୀ ଆଖପାଖରେ ୭,୦୦୦ ବର୍ଗ କି.ମି.ର ମେଟ୍ରୋପଲିଟାନ ଅଞ୍ଚଳ ଗଠନ ହେବ। ବନ୍ଦର ଆଧାରିତ ସ୍ୱତନ୍ତ୍ର ଅର୍ଥନୈତିକ ଅଞ୍ଚଳ ସହ ଟେକ୍ସଟାଇଲ, ଖାଦ୍ୟ ପ୍ରକ୍ରିୟାକରଣ ଓ ଆଇଟିଇଏସ ଭଳି ଶିଳ୍ପରେ ନିବେଶ ଆକର୍ଷଣ କରାଯାଉଛି। ସ୍କିଲଡ୍ ଇନ୍ ଓଡ଼ିଶା ଉପକ୍ରମ ସିଙ୍ଗାପୁର ସହଯୋଗରେ ବିଶ୍ୱସ୍ତରୀୟ ସାର୍ଟିଫିକେସନ ପ୍ରଦାନ କରି ଯୁବକଙ୍କୁ ବିଶ୍ୱବ୍ୟାପୀ ନିଯୁକ୍ତି ପାଇଁ ପ୍ରସ୍ତୁତ କରୁଛି।
ମୁଖ୍ୟମନ୍ତ୍ରୀ ନାଗରିକଙ୍କ ସମସ୍ୟା ସିଧାସଳଖ ଶୁଣି ନାଗରିକ-କେନ୍ଦ୍ରିକ ନୀତି ପ୍ରଣୟନ କରୁଛନ୍ତି। ଆଗାମୀ ୫ ବର୍ଷରେ ୧.୫ ଲକ୍ଷ ସରକାରୀ ପଦବୀ ପୂରଣ ପାଇଁ ସ୍ୱଚ୍ଛ ନିଯୁକ୍ତି ଅଭିଯାନ ଚାଲିଛି। ସୁଭଦ୍ରା ଯୋଜନା ଜରିଆରେ ୧ କୋଟିରୁ ଅଧିକ ମହିଳାଙ୍କୁ ୧୦,୦୦୦ କୋଟି ଟଙ୍କା ପ୍ରଦାନ କରାଯାଇ ଓଡ଼ିଶାକୁ ୧୬ ଲକ୍ଷ ଲକ୍ଷପତି ଦିଦି ସହ ଦେଶରେ ପ୍ରଥମ ସ୍ଥାନ ଅଧିକାର କରିଛି। ଏକ ପେଡ଼ ମା’ କେ ନାମ ଅଭିଯାନରେ ୬.୬ କୋଟି ଗଛ ଲଗାଯାଇଛି। ଗୋଦାବରୀଶ ମିଶ୍ର ଆଦର୍ଶ ପ୍ରାଥମିକ ବିଦ୍ୟାଳୟ ଯୋଜନା ଜରିଆରେ ୭,୦୦୦ ପ୍ରାଥମିକ ବିଦ୍ୟାଳୟରେ ଆଧୁନିକ ଭିତ୍ତିଭୂମି ଓ ଜୀବନ ଦକ୍ଷତା ଶିକ୍ଷା ପ୍ରଦାନ କରାଯାଉଛି। ଆୟୁଷ୍ମାନ ଭାରତ-ପିଏମଜେୱାଇ ଜରିଆରେ ୧ କୋଟି ପରିବାରଙ୍କୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ସେବା ମିଳୁଛି। ଉତ୍କର୍ଷ ଓଡ଼ିଶା କନକ୍ଲେଭରେ ୫୯୩ଟି ପ୍ରସ୍ତାବ ସହ ୧୬.୭୩ ଲକ୍ଷ କୋଟି ଟଙ୍କାର ନିବେଶ ଓ ୧୨.୮୮ ଲକ୍ଷ ନିଯୁକ୍ତି ସୁଯୋଗ ସୃଷ୍ଟି ହୋଇଛି। ହୀରାକୁଦକୁ ସ୍ୱତନ୍ତ୍ର ପର୍ଯ୍ୟଟନ କ୍ଷେତ୍ର ଓ ବୌଦ୍ଧ ସ୍ମାରକୀ ସ୍ଥଳ ଗୁଡିକୁ ବିକାଶ କରାଯାଉଛି ଏବଂ ବରଗଡ଼ର ଧନୁଯାତ୍ରାକୁ ଜାତୀୟ ନାଟକ ବିଦ୍ୟାଳୟ ସହ ସୁଦୃଢ଼ କରାଯିବାର ଯୋଜନା ରହିଛି।
୨୦୨୯-୩୦ ସୁଦ୍ଧା ୯୦% ସିଞ୍ଚନ ଓ ୧୦୦% ଜଳବାୟୁ ସ୍ଥିତିସ୍ଥାପକତା ହାସଲ କରାଯିବ। ଏଆଇ, ରୋବୋଟିକ୍ସ ଓ ବାୟୋଟେକ୍ ଭଳି ଡିପଟେକ୍ କ୍ଷେତ୍ରରେ ନୂତନତ୍ୱ ପ୍ରୋତ୍ସାହନ କରାଯାଉଛି। ଓଡ଼ିଆ ଅସ୍ମିତାକୁ ସଂରକ୍ଷଣ କରି ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତିର ବିକାଶ କରାଯାଉଛି।
ମୁଖ୍ୟମନ୍ତ୍ରୀ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ କେନ୍ଦ୍ର ସରକାର ଓ ଅନ୍ୟ ରାଜ୍ୟଙ୍କ ସମର୍ଥନ ଜରିଆରେ ବିକଶିତ ଓଡ଼ିଶାକୁ ବିକଶିତ ଭାରତର ଅଙ୍ଗ କରିବାକୁ ଅନୁରୋଧ କରିଛନ୍ତି।
