ଉମରକୋଟ, ୧୨।୦୮ (ଆପ୍ର)-ଖେଳୁଥିବା ବେଳେ ପାଣି କୁଣ୍ଡରେ ପଡି ଶିଶୁ ପୁତ୍ର ମୃତ । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ଉମରକୋଟ ଥାନା ଅଧୀନ ପଦିଆଗୁଡା ଗ୍ରାମରେ । ମୃତ ଶିଶୁ ଜଣକ ହେଲେ ଉମରକୋଟ ବ୍ଲକ ବୁର୍ଜା ପଞ୍ଚାୟତ ପଦିଆ ଗୁଡା ଗ୍ରାମର ବୀର ଗଣ୍ଡ ଙ୍କ ଦେଢ ବର୍ଷର ପୁଅ ଦଇନୁ ଗଣ୍ଡ।
ଦଇନୁ ମଙ୍ଗଳବାର ସକାଳେ ଘର ପାଖରେ ଖେଳୁଥିଲେ। ଏହାର କିଛି ସମୟ ପରେ ପରିବାର ଲୋକ ଦଇନୁ ଖେଳୁଥିବା ଜାଗାରେ ନ ଥିବା ଦେଖିବାକୁ ପାଇଥିଲେ। ପରିବାର ଲୋକେ ବ୍ୟସ୍ତ ହୋଇ ଏଣେତେଣେ ବହୁ ଖୋଜାଖୋଜି କରିଥିଲେ। କିନ୍ତୁ ଦଇନୁର କୌଣସି ଖୋଜଖବର ପାଇ ନଥିଲେ। ପରେ ପରିବାର ଲୋକେ ଦଇନୁ ଘର ପାଖରେ ଥିବା ଗୋଟିଏ ପାଣି କୁଣ୍ଡରେ ପଡିଥିବା ଜାଣିବାକୁ ପାଇଥିଲେ। ସଙ୍ଗେ ସଙ୍ଗେ ପରିବାର ଲୋକେ ଦଇନୁଙ୍କୁ ଉଦ୍ଧାର କରି ବାଇକ୍ ଯୋଗେ ଉମରକୋଟ ଉପଖଣ୍ଡ ଚିକିତ୍ସାଳୟକୁ ଆଣିଥିଲେ। କିନ୍ତୁ ଡାକ୍ତର ଦଇନୁଙ୍କୁ ମୃତ ଘୋଷଣା କରିଥିଲେ।
