ନୂଆଦିଲ୍ଲୀ: ତିବ୍ବତୀୟ ସମ୍ପ୍ରଦାୟର ଧାର୍ମିକ ଜୀବନ ଉପରେ କଟକଣା ଲଗାଇଛନ୍ତି ଚୀନ ସରକାର । ୧୮ ବର୍ଷରୁ କମ୍ ବୟସର ପିଲା ମାନଙ୍କୁ ମଠରେ ପ୍ରବେଶ କରିବାକୁ ବାରଣ କରିଛି ଚୀନ୍ । ରିପୋର୍ଟ ଅନୁଯାୟୀ, ଚୀନ୍ ସରକାରଙ୍କ ଏହି ନିଷ୍ପତ୍ତି ତିବ୍ବତୀୟ ସଂସ୍କୃତି, ପରମ୍ପରା ଏବଂ ଧାର୍ମିକ ଅଧିକାର ଉପରେ ଗମ୍ଭୀର ପ୍ରଶ୍ନ ଉଠାଇଛି।
ପିଲା ମାନଙ୍କୁ ମଠରେ ପ୍ରବେଶ କରିବାକୁ ଅନୁମତି ନାହିଁ...
ଚାଇନିଜ୍ ମେସେଜିଂ ଆପ୍ WeChat ରେ ଏକ ଭିଡିଓ ପ୍ରକାଶ ପାଇବା ପରେ ଏହି ପ୍ରତିବନ୍ଧକ ପ୍ରକାଶ ପାଇଛି। ଏହା ତିବ୍ଦତୀୟ ଅଧିକାର ଉଲ୍ଲଂଘନ ବିଷୟରେ ଚିନ୍ତା ବଢ଼ାଇଛି। ତିବ୍ଦତ ଏବଂ ନିର୍ବାସିତ ତିବ୍ଦତୀୟ ମାନଙ୍କ ପାଇଁ ଜଡିତ ଏକ ନ୍ୟୁଜ୍ ପୋର୍ଟାଲ୍ ଫାୟୁଲଙ୍କ ଅନୁଯାୟୀ, ଏକ ନୋଟିସରେ ସ୍ପଷ୍ଟ ଭାବରେ ଲେଖାଯାଇଛି କି, "୧୮ ବର୍ଷରୁ କମ୍ ବୟସ୍କ ପିଲାଙ୍କ ପ୍ରବେଶ ନିଷେଧ।" ରିପୋର୍ଟରେ କୁହାଯାଇଛି ଯେ ଏହି ପ୍ରତିବନ୍ଧକ ଏପରି ସମୟରେ ଆସିଛି ଯେତେବେଳେ ତିବ୍ଦତୀୟ ଅଞ୍ଚଳର ସ୍କୁଲ ଗୁଡ଼ିକ ଶୀତକାଳୀନ ଛୁଟି ପାଇଁ ବନ୍ଦ ରହିଛି। ଏହି ସମୟରେ ପିଲାମାନେ ସାଧାରଣତଃ ସେମାନଙ୍କ ପିତାମାତାଙ୍କ ସହିତ ମଠ ଗୁଡ଼ିକରେ ଧାର୍ମିକ କାର୍ଯ୍ୟକଳାପରେ ଅଂଶଗ୍ରହଣ କରିଥାନ୍ତି, କିନ୍ତୁ ବର୍ତ୍ତମାନ, ପରିବାର ସହିତ ମଧ୍ୟ, ପିଲା ମାନଙ୍କୁ ମଠ ଭିତରକୁ ଅନୁମତି ଦିଆଯାଇନାହିଁ।
ସାଂସ୍କୃତିକ ଐତିହ୍ୟକୁ ଦୁର୍ବଳ କରିବା ପାଇଁ ପ୍ରୟାସ...
ତିବ୍ଦତ ୱାଚ୍ ସହ ଜଡିତ ବିଶେଷଜ୍ଞ ସୋନମ୍ ଟୋବଗ୍ୟାଲ୍ ଏହି ପଦକ୍ଷେପକୁ ତିବ୍ଦତୀୟ ସାଂସ୍କୃତିକ ଐତିହ୍ୟକୁ ଦୁର୍ବଳ କରିବାର ଏକ ଜାଣିଶୁଣି ପ୍ରୟାସ ବୋଲି କହିଛନ୍ତି । ସେ କହିଛନ୍ତି ଯେ, ଗତ କିଛି ବର୍ଷ ଧରି, ଚୀନ୍ ତିବ୍ଦତୀୟ ପିଲା ମାନଙ୍କ ପାଇଁ ବାଧ୍ୟତାମୂଳକ ବୋର୍ଡିଂ ସ୍କୁଲ, ଛୁଟି ସମୟରେ ମଠ ଗୁଡ଼ିକରେ ତିବ୍ଦତୀୟ ଭାଷା ଶିକ୍ଷା ଦେବା ଉପରେ ପ୍ରତିବନ୍ଧକ ଏବଂ ବର୍ତ୍ତମାନ ମଠରେ ପିଲାମାନଙ୍କ ପ୍ରବେଶ ଉପରେ ପ୍ରତିବନ୍ଧକ ସମେତ ତିବ୍ଦତୀୟ ପିଲା ମାନଙ୍କ ପାଇଁ ଅନେକ ନୀତି କାର୍ଯ୍ୟକାରୀ କରିଛି। ଟୋବଗ୍ୟାଲଙ୍କ ଅନୁଯାୟୀ, ଏହି ସମସ୍ତ ପଦକ୍ଷେପ ପିଲାମାନଙ୍କୁ ସେମାନଙ୍କ ସାଂସ୍କୃତିକ ମୂଳରୁ ଦୂରେଇ ରଖିବା ଏବଂ ଧୀରେ ଧୀରେ ତିବ୍ଦତୀୟ ପରିଚୟକୁ ଲୋପ କରିବା ଲକ୍ଷ୍ୟରେ ରହିଛି।
ଏହା ସହ ପଢନ୍ତୁ : ରୁଷ-ୟୁକ୍ରେନ ଯୁଦ୍ଧରେ ଆମେରିକାର ଉଦ୍ଧେଶ୍ୟ କ’ଣ ? ଖୋଲି କହିଲେ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି...
