ନୂଆଦିଲ୍ଲୀ,୦୮/୦୬: ଚୀନ୍ର ରେୟାର୍ ଆର୍ଥ ରପ୍ତାନି କଟକଣା ବିଶ୍ୱ ଯୋଗାଣ ଶୃଙ୍ଖଳ ଆଗରେ ବାଧକ ସାଜିଛି । ପ୍ରଭାବିତ ହୋଇଛନ୍ତି ଅଟୋମୋବାଇଲ, ଇଲେକ୍ଟ୍ରୋନିକ୍ସ ଏବଂ ପ୍ରତିରକ୍ଷା ଆଦି କ୍ଷେତ୍ର । ଚୀନ୍ର ରେୟାର୍ ଆର୍ଥ ଉପରେ ଭାରତୀୟ ଶିଳ୍ପର ନିର୍ଭରତା ଅଧିକ । ତେଣୁ ଭାରତ ଏବେ ପରିସ୍ଥିତି ଉପରେ ସ୍ପଷ୍ଟତା ଚାହୁଁଛି । ତେବେ ଦେଶଗୁଡ଼ିକ ସହ ଆଲୋଚନା କରିବାକୁ ଚୀନ୍ ରାଜି ହୋଇଛି ।
ୟୁରୋପୀୟ ସଂଘ ଏବଂ ଆମେରିକା ସହିତ ଜାପାନ ଓ ଭାରତ ଭଳି ଏସୀୟ ରାଷ୍ଟ୍ରଗୁଡ଼ିକ ଏହି ସମସ୍ୟାର ସମାଧାନ ନେଇ ବାଟ ସନ୍ଧାନରେ ଅଛନ୍ତି । ଏ ନେଇ ଆଲୋଚନା କରିବା ଲାଗି ଆସନ୍ତା ସପ୍ତାହରେ ଏକ ଭାରତୀୟ ଟିମ୍ ଚୀନ୍ ଯିବ ବୋଲି ଜଣାପଡ଼ିଛି । ବିଶ୍ୱର ମୋଟ ରେୟାର୍ ଆର୍ଥ ଖଣିଜ ପ୍ରକ୍ରିୟାକରଣରେ ଚୀନ୍ର ଭାଗ ରହିଛି ପାଖାପାଖି ୯୦% । ଏଣୁ ବିଶ୍ୱ ଯୋଗାଣ ଶୃଙ୍ଖଳରେ ଏହାର ବଡ଼ ଭୂମିକା ରହିଛି ।
ତେବେ ଚୀନ୍ର ଏହି କଟକଣା ଦ୍ୱାରା ଭାରତର ୫ଟି ପ୍ରମୁଖ କ୍ଷେତ୍ର ପ୍ରଭାବିତ ହେବାକୁ ଯାଉଛି । ଅଟୋମୋବାଇଲ ଶିଳ୍ପ ଉପରେ ଏହାର ଭୟଙ୍କର ପ୍ରଭାବ ପଡ଼ିଛି । ପ୍ରମୁଖ ଘରୋଇ ଏବଂ ବିଦେଶୀ ଅଟୋ ନିର୍ମାତାଙ୍କ ଉତ୍ପାଦନ ବ୍ୟାହତ ହୋଇଛି । ସାଧାରଣତଃ ରେୟାର୍ ଆର୍ଥ ମାଗ୍ନେଟ୍ସ ଇଲେକ୍ଟ୍ରିକ୍ ମୋଟର୍ସ, ପାୱାର୍ ୱିଣ୍ଡୋ, ଅଡିଓ ସିଷ୍ଟମ୍ ଏବଂ ଅନ୍ୟାନ୍ୟ କାର୍ ଉପକରଣରେ ବ୍ୟବହାର ହୋଇଥାଏ । ବର୍ତ୍ତମାନ ଏହାର ଯୋଗାଣ ଠପ୍ ହୋଇଯାଇଛି । ରିପୋର୍ଟ ଅନୁସାରେ, ବଜାଜ ଅଟୋ ଚେତାବନି ଦେଇଛି ଯେ, ଚୀନ୍ରୁ ମାଗ୍ନେଟ୍ ନ ଆସିଲେ ଜୁଲାଇ ସୁଦ୍ଧା ଇଲେକ୍ଟ୍ରିକ୍ ଯାନ ଉତ୍ପାଦନ ଭୟଙ୍କର ଭାବେ ପ୍ରଭାବିତ ହେବ ।
ବୋସ୍ କହିଛି ଯେ, ଏହାର ଯୋଗାଣକାରୀମାନେ ଚୀନ୍ରୁ ରପ୍ତାନି ଅନୁମତି ପ।।ଉନାହାନ୍ତି । ବିଏମ୍ଡବ୍ଲ୍ୟୁ ପ୍ରକାଶ କରିଛି ଯେ, ଏହାର ଯୋଗାଣ ନେଟ୍ୱର୍କର କିଛି ଭାଗ ପ୍ରଭାବିତ ହୋଇଛି । ତେବେ ଏହାର ନିଜସ୍ୱ କାରବାର ସ୍ୱାଭାବିକ ରହିଥିବା ଏହା କହିଛି ।
ସ୍ମାର୍ଟଫୋନ୍, ଲାପ୍ଟପ୍ ଏବଂ ଉଚ୍ଚ-ପ୍ରଦର୍ଶନକାରୀ ସେମିକଣ୍ଡକ୍ଟର ଚିପ୍ ଉତ୍ପାଦନରେ ନିଓଡାଇମିୟମ୍ ଏବଂ ଡାଇସ୍ପ୍ରୋଜିୟମ୍ ଭଳି ରେୟାର୍ ଆର୍ଥ ଉପାଦାନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଚୀନ୍ ପକ୍ଷରୁ ଯୋଗାଣ କଟକଣା ଯୋଗୁ ବିଶ୍ୱ ଇଲେକ୍ଟ୍ରୋନିକ୍ସ ଏବଂ ଚିପ୍ ଉତ୍ପାଦନ କ୍ଷେତ୍ରରେ ଖର୍ଚ୍ଚ ବୃଦ୍ଧି ଏବଂ ଉତ୍ପାଦନରେ ସମ୍ଭାବ୍ୟ ବିଳମ୍ବ ନେଇ ଅନୁମାନ କରିଛନ୍ତି ବିଶେଷଜ୍ଞ ।
ଏହି ରପ୍ତାନି କଟକଣା ଦ୍ୱାରା ଟେଲିଯୋଗାଯୋଗ, ବ୍ୟାଟେରି ଟେକ୍ନୋଲୋଜି, ଶିଳ୍ପ ଯନ୍ତ୍ରାଂଶ ଏବଂ ଉପକରଣ ଆଦି କ୍ଷେତ୍ର ପ୍ରଭାବିତ ହେବ। ଏପ୍ରିଲ ୪ରୁ କୌଣସି ଭାରତୀୟ କମ୍ପାନି ଚୀନ୍ରୁ ରେୟାର୍ ଆର୍ଥ ମାଗ୍ନେଟ୍ ପାଇଁ ଆମଦାନି ମଞ୍ଜୁରି ହାସଲ କରି ନ ଥିବା ଜଣାପଡ଼ିଛି ।
ପବନ ଟର୍ବାଇନ୍ ଏବଂ ଅନ୍ୟାନ୍ୟ ସ୍ୱଚ୍ଛ ଶକ୍ତି ପ୍ରଯୁକ୍ତି ରେୟାର୍ ଆର୍ଥ ଉପାଦାନ ଉପରେ ବଡ଼ ମାତ୍ରାରେ ନିର୍ଭରଶୀଳ । କୌଣସି ପ୍ରକାର ବାଧକ ବିଶ୍ୱ ଅକ୍ଷୟ ଶକ୍ତି ଲକ୍ଷ୍ୟର ଅଗ୍ରଗତିକୁ ପ୍ରଭାବିତ କରିପାରେ । ଅନ୍ତର୍ଜାତୀୟ ଶକ୍ତି ଏଜେନ୍ସି ଏବଂ ଆମେରିକା ଜିଓଲୋଜିକାଲ ସର୍ଭେ ଅନୁସାରେ, ଚୀନ୍ ବିଶ୍ୱର ୬୦% ରେୟାର୍ ଆର୍ଥ ମେଟାଲ ଉତ୍ପାଦନ କରିଥାଏ ଏବଂ ୯୦% ବିଶୋଧନ ଚୀନ୍ ଦ୍ୱାରା ହୋଇଥାଏ । ଏଭଳି କ୍ଷେତ୍ରରେ ରପ୍ତାନି କଟକଣା ସମଗ୍ର ବିଶ୍ୱ ପାଇଁ ଶକ୍ତ ଧକ୍କା । ବିମାନ, ମିସାଇଲ୍ ଗାଇଡାନ୍ସ ସିଷ୍ଟମ୍ ଏବଂ ଅନ୍ୟାନ୍ୟ ପ୍ରତିରକ୍ଷା ପ୍ରଯୁକ୍ତି ପାଇଁ ଏରୋସ୍ପେସ୍ କ୍ଷେତ୍ର ରେୟାର୍ ଆର୍ଥ ଉପାଦାନ ଉପରେ ବହୁ ମାତ୍ରାରେ ନିର୍ଭରଶୀଳ । ଏହି ଉପାଦାନ ଉପରେ ଚୀନ୍ର ନିୟନ୍ତ୍ରଣ ରହିଛି । ରାଷ୍ଟ୍ରୀୟ ସୁରକ୍ଷା ଆପ୍ଲିକେଶନ୍ ପାଇଁ ଏସବୁ ଉପାଦାନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ।
ବିଶେଷଜ୍ଞଙ୍କ ମତରେ, ରେୟାର୍ ଆର୍ଥ ମାଗ୍ନେଟ୍ ଉପରେ ଚୀନ୍ର ରପ୍ତାନି କଟକଣା ବାଣିଜ୍ୟ ଯୁଦ୍ଧର ଅଂଶବିଶେଷ । ଆମେରିକା ଟାରିଫ୍ ଉପରେ ଜବାବୀ ହମ୍ଲା ଲାଗି ଡ୍ରାଗନ୍ ଏ ପଦକ୍ଷେପ ନେଇଥିଲା । କିନ୍ତୁ ଏହା ଦ୍ୱାରା ଭାରତ ବଡ଼ ଆକାରରେ ପ୍ରଭାବିତ ହେବ । କାରଣ ରେୟାର୍ ଆର୍ଥ ପାଇଁ ଚୀନ୍ ଉପରେ ଭାରତ ବଡ଼ ମାତ୍ରାରେ ନିର୍ଭରଶୀଳ ।
ଅନ୍ୟପକ୍ଷରେ, ଆମେରିକାକୁ ରେୟାର୍ ଆର୍ଥ ଯୋଗାଇବାକୁ ଚୀନ୍ ରାଜି ହୋଇଥିବା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୂଚନା ଦେଇଛନ୍ତି।
